ދަރުމަވަންތަ ހޮސްޕިޓަލް ރަސްމީކޮށް ހުޅުވާ، ހުޅުމާލެ ހޮސްޕިޓަލް ޓަރޝަރީ ހޮސްޕިޓަލަކަށް ބަދަލުކުރަނީ

ޓަރޝަރީ ހޮސްޕިޓަލެއްގެ ގޮތުގައި ހުރިހާ ފެސިލިޓީއެއް ޤާއިމްކޮށް ދަރުމަވަންތަ ހޮސްޕިޓަލް މިމަހުގެ 16 ވަނަ ދުވަހު ރަސްމީކޮށް ހުޅުވުމަށް ނިންމަފިއެވެ. މިކަން ހާމަކުރެއްވީ ޖުމްހޫރީ ދުވަހުގެ މުނާސަބާގައި ބޭއްވި ރަސްމީ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

އައިޖީއެމްއެޗާއި އިންވެގެން އިމާރާތްކޮށްފައިވާ ދަރުމަވަންތަ ހޮސްޕިޓަލަކީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި ހިންގި އެންމެ ބޮޑު އެއް މަޝްރޫއެވެ. ނަމަވެސް މި ވޭތުވެދިޔަ 5 އަހަރުގެ ތެރޭ އެ ހޮސްޕިޓަލްގެ އެކި ފަންގިފިލާތައް ބޭނުންނުކޮށް އެންމެ އެކަށީގެންވާ ޚިދުމަތްތަކެއްވެސް ފޯރުކޮށްދީފައެއް ނުވެއެވެ. އޭގެ ސަބަބުން މެޝިނަރީތައް ހަލާކުވެ، މަރާމާތައް ވަރަށް ބޮޑު ހޭދައެއްވެސް ކުރަން ޖެހުނެއެވެ. އެހެންކަމުން ސަރުކާރުން މިހާރު ވަނީ ހުރިހާ ޚިދުމަތްތަކާއެކު އެ ހޮސްޕިޓަލް ރަސްމީކޮށް ހުޅުވުމަށް ނިންމަވާފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ދަރުމަވަންތަ ހޮސްޕިޓަލް، ޓަރޝަރީ ހޮސްޕިޓަލަކަށް ހަދައި، އެ ތަނަށް ބޭނުންވާ ހުރިހާ ޚިދުމަތެއް ޤާއިމުކުރާނެކަމަށެވެ. އެ ހޮސްޕިޓަލަކީ ހޮހޮޅައެއްކަމަށް ބައެއް މީހުން ސިފަކުރިނަމަވެސް ދަރުމަވަންތަ ހޮސްޕިޓަލް، ޙަޤީޤީ ހޮސްޕިޓަލަކަށް ހަދައި، ޓަރޝަރީ ހޮސްޕިޓަލެއް ގޮތުގައި ހުރިހާ ފެސިލިޓީއެއް ޤާއިމުކޮށް މިމަހުގެ 16 ވަނަ ދުވަހު ހުޅުވާނެކަމަށެވެ. އަދި ހުޅުމާލެ ހޮސްޕިޓަލުގެ ހުރިހާ ޚިދުމަތްތަކެއް ޓަރޝަރީ ފެންވަރަށް ގެނެސް އެ ހޮސްޕިޓަލްވެސް ޓަރޝަރީ ހޮސްޕިޓަލަކަށް އަންނަ ހަފްތާގައި ބަދަލުވާނެކަމަށް ރައީސް ވިދާޅުވިއެވެ.

"ހުޅުމާލެއަކީ ވަރަށްގިނަ ރައްޔިތުން އުޅޭ ތަނެއް. އެހެން ނަމަވެސް، ޓަރޝަރީ ފެންވަރަށް ޚިދުމަތެއް އެތާކުންނެއް ނުދެވޭ. އިރާދަކުރެއްވިއްޔާ، މި މަހު 16 ނޫނީވިއްޔާ 15، މި ދެ ދުވަހުންކުރެ އެއް ދުވަހެއްގައި އަޅުގަނޑަށް ސީދާ ތާރީޚު ޔަޤީންކޮށް ދަންނަވާކަށް ނޭނގެ. ޔަޤީނުންވެސް އެންމެ ލަސްވެގެން 16 ގައި، ހުޅުމާލޭގެ ހޮސްޕިޓަލްވެސް މި ދެންނެވި ގޮތަށް ހުރިހާ ފެންވަރެއް، ހުރިހާ ޚިދުމަތެއް ޓަރޝަރީ ފެންވަރަށް ގެނެސްފައި، ހުޅުމާލެ ހޮސްޕިޓަލްވެސް ޓަރޝަރީ ހޮސްޕިޓަލަކަށް އިރާދަކުރެއްވިއްޔާ އަޅުގަނޑުމެން ހަދާނަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ދަރުމަވަންތަ ހޮސްޕިޓަލުގައި މިވަގުތުވެސް ގިނަ ޚިދުމަތްތަކެއް އަންނަނީ ފޯރުކޮށްދެމުންނެވެ. މީގެ އިތުރުން ހުޅުމާލެ ހޮސްޕިޓަލް އިތުރަށް ތަރައްޤީކުރުމުގެ މަސައްކަތުގެ ދަށުން 4 އޮޕަރޭޝަން ތިއޭޓަރާއި 14 އެނދުގެ އެންއައިސީޔޫއަކާއި 10 އެނދުގެ އައިސީޔޫއެއް ތަރައްޤީކުރުމުގެ މަސައްކަތް އަންނަނީ ކުރަމުންނެވެ.