އަސްކަރީ ޑްރޯން އުފެއްދުން އިތުރު ކުރުމަށް އުތުރު ކޮރެޔާގެ ޒައީމު ކިމް ޖޮންގ އުން އެ ޤައުމުގެ ހަތިޔާރު އުފައްދާ އިދާރާތަކަށް އަމުރުކޮށްފިއެވެ. އުތުރު ކޮރެޔާގެ ދައުލަތުގެ މީޑިޔާ، ކޭސީއެންއޭން މިކަން ރިޕޯޓުކުރުމާއެކު، ރަޝިޔާއާއި އުތުރު ކޮރެޔާއާ ދެމެދު އޮތް ގުޅުންތަކާ މެދު ކަންބޮޑުވުން އުފައްދަމުންދާ ހުޅަނގުގެ ބާރުތަކުގެ މެދުގައި މި ވަނީ ހާސްކަން އިތުރުވެފައެވެ.
އަސްކަރީ ޑްރޯން އުފައްދާ މިންވަރު އިތުރު ކުރަން ކިމް އަމުރު ކޮށްފައި ވަނީ ވެރިރަށް ޕްޔޯންގޔަންގގައި ހުންނަ އަންމޭންޑް އޭރިޔަލް ޓެކްނޮލޮޖީ ކޮމްޕްލެކްސަށް ކުރި ޒިޔާރަތެއްގައި، އުތުރު ކޮރެޔާގެ އަސްކަރިއްޔާއިން ބޭނުން ކުރާ އަސްކަރީ ޑްރޯންތައް ބަލައިލުމަށް ކުރި ދަތުރެއްގައި ކަމުގައި ކޭސީއެންއޭން ރިޕޯޓު ކުރިއެވެ. އުތުރު ކޮރެޔާގައި އުފައްދާ އަސްކަރީ ޑްރޯނަކީ އެއްގަމާއި ކަނޑުގެ އަމާޒުތަކަށް ޙަމަލާ ދިނުމަށް ބޭނުން ކުރެވޭނެ، ގައިޑެޑް މިސައިލާއި އެއް ފަދަ ޤާބިލު ކަމެއް ލިބިފައިވާ ނުރައްކާތެރި ޑްރޯންތަކެއް ކަމުގައި ވެސް ކޭސީއެންއޭން ރިޕޯޓު ކުރިއެވެ.
އުތުރު ކޮރެޔާއިން އުފައްދާފައިވާ އަސްކަރީ ޑްރޯންތައް އެންމެ ފުރަތަމަ ދައްކައިލާފައި ވަނީ އޮގަސްޓު މަހުއެވެ. ކިމް ޤަބޫލު ކުރާ ގޮތުގައި، ޒަމާނީ ހަނގުރާމައިގައި އަސްކަރީ ޑްރޯނަކީ މުހިންމު ދައުރެއް އަދާކުރާނެ ހަތިޔާރެކެވެ. މި ވަގުތު ދުނިޔޭގެ އެކި ކަންކޮޅުތަކުގައި ކުރަމުންދާ ހަނގުރާމަތަކުގައި ވެސް ފުޅާ ދާއިރާއެއްގައި އަސްކަރީ ޑްރޯންތައް ދަނީ ބޭނުން ކުރަމުންނެވެ. އޭގެ ތެރޭގައި ރަޝިޔާ-ޔޫކްރެއިން ހަނގުރާމައާއި، މެދުރިއުމަތީގައި ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތައް ހިމެނެވެ.
އައު ޑްރޯންތައް ބޭނުން ކޮށްގެން ޙަމަލާ ދިނުމުގެ ތަމްރީނުތަކެއް ކިމް ބަލައިލާފައިވާ ކަމުގައި ވެސް ކޭސީއެންއޭން ރިޕޯޓު ކުރިއެވެ. މަސްރަޙު ދިރާސާ ކުރާ ފަރާތްތަކުން ބުނީ، އުތުރު ކޮރެޔާއިން ރަޝިޔާއާ އެކު އަސްކަރީ އަދި ދިފާޢީ ގުޅުންތައް ބަދަހި ކުރަމުންދާ ދަނޑިވަޅެއްގައި އުތުރު ކޮރެޔާއިން އަސްކަރީ ޑްރޯން އުފައްދާ މިންވަރު އިތުރު ކުރުމަކީ ކަންބޮޑުވާން ޖެހޭ މައްސަލައެއް ކަމަށް ހުޅަނގުގެ ބާރުތަކުން ދެކޭ ކަމުގައެވެ.
ރަޝިޔާއާއި އުތުރު ކޮރެޔާއާ ދެމެދު އަސްކަރީ އަދި ދިފާޢީ ގުޅުންތައް ހަރުދަނާ ކުރުމަށް އެއްބަސްވުމެއްގައި ސޮއިކޮށްފައި ވަނީ ރަޝިޔާގެ ރައީސް ވްލަޑިމިޔަރ ޕުޓިން ޖޫން މަހު ޕްޔުންގޔަންގއަށް ކުރެއްވި ދަތުރުފުޅެއްގައި ކިމްއާ އެކު ބޭއްވެވި ބައްދަލުވުމެއްގައެވެ. އެ އެއްބަސްވުމުގެ ހަތަރުވަނަ މާއްދާގައި ބުނެފައި ވަނީ, ރަޝިޔާ ނުވަތަ އުތުރު ކޮރެޔާއާ ދެކޮޅަށް އެއްވެސް ޤައުމަކުން, ނުވަތަ ޤައުމުތަކަކުން, ޙަމަލާދީފި ނަމަ, ނުވަތަ ހަނގުރާމަ ފަށައިފިނަމަ, އުތުރު ކޮރެޔާއާއި ރަޝިޔާއިން އެއް ޤައުމުން އަނެއް ޤައުމަށް އަސްކަރީ އެހީތެރިކަން ފޯރުކޮށްދޭން އެއްބަސްވާ ކަމުގައެވެ. މިއީ ހުޅަނގުގެ ބާރުތަކަށް، ޚާއްޞަކޮށް އެމެރިކާއަށް، ހަޖަމު ކުރެވޭ ގުޅުމެއް ނޫނެވެ.
ޑީޕީއާރްކޭން އަސްކަރީ ޑްރޯން އުފެއްދުން އިތުރު ކޮށްފައި މި ވަނީ، އެ ޤައުމުގެ ގިނަ އަދަދެއްގެ ސިފައިން ރަޝިޔާގައި ތިބި ކަމަށް އެމެރިކާއާއި އެމެރިކާގެ އެކުވެރިން ތުހުމަތު ކުރަމުންދާ ދަނޑިވަޅެއްގައެވެ. އޭގެ ތެރޭގައި ހުޅަނގުގެ ދިފާޢީ އިއްތިޙާދު (ނޭޓޯ)އާއި، ވިލާތުގެ އިއްތިޙާދު (އީޔޫ)ގެ އިތުރުން ދެކުނު ކޮރެޔާ ވެސް ހިމެނެއެވެ.
ޑީޕީއާރްކޭގެ 10,000އަށްވުރެ ގިނަ ސިފައިން މި ވަގުތު ރަޝިޔާގައި ތިބި ކަމުގައި ދެކުނު ކޮރެޔާއިން ތުހުމަތު ކުރެެއެވެ. ދެކުނު ކޮރެޔާގެ ދިފާޢީ ވުޒާރާއިން ބުނީ, ރަޝިޔާގައި ތިބި އުތުރު ކޮރެޔާގެ ސިފައިން, ރަޝިޔާއިން ޔޫކްރެއިނާ ދެކޮޅަށް ކުރަމުންދާ ހަނގުރާމައިގައި ބައިވެރިވަމުންދާ ކަމުގައެވެ. އަދި, ރަޝިޔާގެ ހުޅަނގުގައި އޮތް ކޫރްސްކްގެ އިތުރުން ހަނގުރާމައިގެ ކުރީ ސަފުގައި އުތުރު ކޮރެޔާގެ ސިފައިން ހަރަކާތްތެރިވަމުންދާ ކަމުގައެވެ.
އެމެރިކާގެ ދިފާޢީ އިދާރާ, ޕެންޓެގަނުން ވެސް ބުނީ, ކޫރްސްކް ސަރަޙައްދުގައި އުތުރު ކޮރެޔާގެ 10,000އެއްހާ ސިފައިން ރަޝިޔާގެ އަސްކަރިއްޔާއަށް އެހީތެރިކަން ފޯރުކޮށްދެމުންދާ ކަމުގައެވެ. ނަމަވެސް, އެ ސަރަޙައްދަށް އަރައިގަނެފައިވާ ޔޫކްރެއިންގެ ސިފައިންނާ ދެކޮޅަށް ރަޝިޔާގެ ސިފައިން ކުރަމުންދާ ހަނގުރާމައިގައި އުތުރު ކޮރެޔާގެ ސިފައިން އަމަލީ ގޮތުން ބައިވެރިވަމުންދާ ކަން ޕެންޓެގަނަށް ވެސް ސާފެއް ނޫނެވެ.
އުތުރު ކޮރެޔާގެ ސިފައިން ރަޝިޔާގައި ތިބި ކަމުގައި ޔޫކްރެއިނުން ވެސް ވަނީ ތުހުމަތު ކޮށްފައެވެ. ޔޫކްރެއިންގެ ޖާސޫސީ އިދާރާއިން ބުނީ, އުތުރު ކޮރެޔާގެ 12,000އަށްވުރެ ގިނަ ސިފައިން ރަޝިޔާގައި ތިބި ކަމުގައެވެ. އަދި, އޭގެ ތެރޭގައި 500އެއްހާ އޮފިސަރުންނާއި ތިން ޖެނެރަލުން ހިމެނޭ ކަމުގައެވެ. އުތުރު ކޮރެޔާގެ ސިފައިން ރަޝިޔާގެ ފަސް ސަރަޙައްދެއްގައި އަސްކަރީ ތަމްރީނުތައް ފުރިހަމަ ކުރަމުންދާ ކަމުގައި ވެސް ޔޫކްރެއިނުން ތުހުމަތު ކުރެއެވެ.