ދުންފަތާ ދުރުވާން ބޭނުންވާ މީހުންނަށް ސިއްޙީ ޚިދުމަތްދޭ ތަންތަނުން އެހީ ފޯރުކޮށްދޭނެ އިންތިޒާމް ހަމަޖައްސަނީ

ދުންފަތުގެ އިސްތިއުމާލުކުރުން ހުއްޓާލަން ބޭނުންވާ މީހުންނަށް ސިއްޙީ ޚިދުމަތްދޭ ހުރިހާ ތަނަކުން އެހީތެރިކަން ފޯރުކޮށްދޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާކަމަށް ހެލްތު ޕްރޮޓެކްޝަން އެޖެންސީ، އެޗްޕީއޭއިން ވިދާޅުވެއްޖެއެވެ.

ވޭޕްގެ އެއްވެސް ބާވަތެއް ރާއްޖެ އެތެރެކުރުން ވަނީ މަނާކޮށްފައެވެ. މިގޮތަށް އަމަލުކުރަން ފަށާފައިމިވަނީ ދުންފަތް ކޮންޓްރޯލް ކުރުމާ ބެހޭ ޤާނޫނަށް ގެނައި އިސްލާހު ރައީސުލްޖުމްހޫރިއްޔާ ތަޞްދީގުކުރެއްވުމާ ގުޅިގެންނެވެ.

ވޭޕްގެ އެއްވެސް ބާވަތެއް ރާއްޖެ އެތެރެކުރުން މަނާ ކުރުމާއި ގުޅިގެން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން އެޗްޕީއޭގެ ޑެޕިއުޓީ ޑިރެކްޓަރު ހަސަން މުހައްމަދު ވިދާޅުވީ ދުންފަތުގެ އިސްތިއުމާލުކުރުމުން ދުރުވާން މިދުވަސްވަރު މީހުން މަސައްކަތް ކުރާނެ ކަމަށާއި މިއީ އެފަދަ މީހުންނަށް އެހީގެ އަތް ދިއްކުރަންޖެހޭ ދުވަސްވަރު ކަމަށެވެ.

ޕްރޮފެޝަނަލް އެހީ ނުހޯދާ ދުންފަތުގެ އިސްތިއުމާލް ކުރުން ހުއްޓާލުމަކީ ފަސޭހަކަމެއް ނޫންކަން ފާހަގަކުރައްވާ ހަސަން މުހައްމަދު ވިދާޅުވީ ދުންފަތުގެ އިސްތިއުމާލުކުރުން ހުއްޓާލަން ބޭނުންވާ މީހުންނަށް މިހާރުވެސް މާލޭގެ 4 ކްލިނިކް އެބަހުރިކަމަށެވެ.

"އަޅުގަނޑުމެން މިހާރު މިކުރާ މަސައްކަތަކީ ރާއްޖޭގެ ސިއްޙީ ޚިދުމަތްދޭ ހުރިހާ ތަނަކުންވެސް ހުއްޓާލަން ބޭނުންވާ މީހުންނަށް އެހީތެރިކަން ފޯރުކޮށްދޭން. ކައުންސިލިން ދިނުމާއި ނިކޮޓިން ރިޕްލޭސްމަންޓް ތެރަޕީވެސް ލިބޭނެގޮތް ހަމަޖެއްސުން. މީގެއިތުރުން ވޭޕްގެ އެއްވެސް ބާވަތެއް ރާއްޖެ އެތެރެކުރުން މަނާކުރުމާ ގުޅިގެން ރަނގަޅު މައުލޫމާތު ފޯރުކޮށްދިނުންވެސް މުހިންމު" ހަސަން މުހައްމަދު ވިދާޅުވިއެވެ.

ރާއްޖޭގައި ދުންފަތް ކޮންޓްރޯލް ކުރުމަށް ސަރުކާރުން އަޅަން ނިންމާފައިވާ ފިޔަވަޅުތަކަށް އެކި މަރުހަލާތަކަށް ބަހާލައިގެން އަމަލުކުރެއްވުމަށް ޤާނޫނުތަކަށް ވަނީ އިސްލާހު ގެނެސްފައެވެ. އެގޮތުން، މި މަހުގެ ފުރަތަމަ ދުވަހުން ފެށިގެން ރާއްޖެއަށް އެތެރެކުރާ ދުންފަތުގެ ބާވަތްތަކުން ނަގާ އިމްޕޯޓް ޑިއުޓީ ވަނީ ބޮޑުކޮށްފައެވެ.

ދުންފަތް ކޮންޓްރޯލް ކުރުމާ ބެހޭ ޤާނޫނަށް ގެނައި އިސްލާހުގައި ވާގޮތުން އެޤާނޫނުގެ 2 ވަނަ މާއްދާއިން 10ވަނަ މާއްދާއާ ހަމައަށް އަމަލުކުރަން ފަށާނީ އަންނަ މަހުގެ 15ވަނަ ދުވަހުން ފެށިގެންނެވެ.

ދެވަނަ މަރުހަލާގެ ދަށުން އަންނަ މަހުގެ 15 ވަނަ ދުވަހުން ފެށިގެން ވޭޕް ބޭނުންކުރުމާއި ވިއްކުމާއި ހިލޭ ބެހުންވެސް މަނާވާނެއެވެ. އަދި 21 އަހަރުން ދަށުގެ މީހުންނާއި ކުޑަކުދިންނަށް ދުންފަތުގެ އެއްވެސް ބާވަތެއް ނުވަތަ ދުންފަތުން އުފައްދާފައި ހުރި އެއްވެސް އެއްޗެއް ވިއްކުން ނުވަތަ ވިއްކުމުގެ މުޢާމަލާތެއްގައި 21 އަހަރުން ދަށުގެ މީހަކު ނުވަތަ ކުޑަކުއްޖަކު ބައިވެރިކުރުންވެސް ވަނީ މަނާކޮށްފައެވެ.

އަދި ދުންފަތުގެ ބާވަތެއް ގަންނަ މީހަކީ 21 އަހަރު ވެފައިވާ މީހެއްކަން ޔަޤީންކޮށް، އެ ފަރާތެއްގެ ކާކުކަން އަންގައިދޭ ކާޑު ނުވަތަ އުމުރު އަންގައިދޭ ޞައްޙަ ރަސްމީ ލިޔުމެއް ދެއްކުމަށް އަންގައި، އެ ލިޔުން ދެއްކުމަށްފަހު މެނުވީ އެއްވެސް ފަރާތަކަށް ދުންފަތުގެ ބާވަތެއް ނުވިއްކުމަށްވަނީ ކަނޑައަޅާފައެވެ.

މިކަމާއި ގުޅިގެން ޕްރޮގްރާމުގައި ވާހަކަ ދައްކަވަމުން ހަސަން މުހައްމަދު ވިދާޅުވީ ރާއްޖޭގައި ހުއްދަ ލިބިގެން ވިއްކާ ދުންފަތުގެ އެއްވެސް ބާވަތެއް ގަނެ ވިއްކޭނީ 21 އަހަރުން މަތީގެ މީހުންނަށް ކަމަށް ކަނޑައެޅީ އެކި ދިރާސާތަކުން ހޯދާފައިވާ ހޯދުންތަކުގެ މައްޗަށް ބިނާކޮށް ކަމަށެވެ. އެގޮތުން އުމުރުން 21 އަހަރުވަންދެން ދުންފަތާ ދުރުކޮށް މީހަކު ބެހެއްޓިއްޖެނަމަ އުމުރަށްވެސް އެމީހަކު ދުންފަތާ ދުރުގައި ހުންނާނެކަމަށް ބޭރުގެ އެކި ދިރާސާތަކުން ދައްކާކަމަށް އެޗްޕީއޭގެ ޑެޕިއުޓީ ޑިރެކްޓަރު ހަސަން މުހައްމަދު ވިދާޅުވިއެވެ.

ވޭޕްކުރަން ބޭނުންކުރާ އެއްވެސް ބާވަތެއްގެ އާލާތެއް ރާއްޖޭގައި ވިއްކައިފިނަމަ އަންނަ މަހުގެ 15ން ފެށިގެން އެ ފަރާތެއް 20،000 ރުފިޔާއިން ޖޫރިމަނާކުރުމާއެކު ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރެވޭނެއެވެ. އަދި އެފަދަ އެއްޗެއް ހިލޭ ބަހައިފިނަމަ އެކަން ކުރި މީހަކު 10،000 ރުފިޔާއިން ޖޫރިމަނާކުރާނެއެވެ.