އިޓަލީގައި ކުރިއަށްދިޔަ އޭޓީޕީ ފައިނަލްސްގެ ޗެމްޕިއަންކަން ދުނިޔޭގެ އެއްވަނަ ޓެނިސް ކުޅުންތެރިޔާ އިޓަލީގެ ޔަނިކް ސިނާ ހޯދައިފިއެވެ.
ސިނާ މި މުބާރާތުގެ ޗެމްޕިއަންކަން ހޯދާފައިވަނީ ފައިނަލުގައި އެމެރިކާގެ ޓޭލާ ފްރިޓްޒްއާ ދެކޮޅަށް ކުޅުނު މެޗު ހައެއް ހަތަރެއް އަދި ހައެއް ހަތަރެއްގެ ނަތީޖާއަކުން ކާމިޔާބުކޮށްގެންނެވެ.
މިދިޔަ އަހަރުގެ މުބާރާތުގެ ފައިނަލުގައި ސަބިޔާގެ ނޯވަކް ޖޯކޮވިޗް އަތުން ބަލިވި ސިނާ މި އަހަރުގެ މުބާރާތް ކާމިޔާބުކޮށްފައިވަނީ އެއްވެސް ސެޓެއް ގެއްލުވާނުލާ ހުރިހާ މެޗެއް ކާމިޔާބުކޮށްގެންނެވެ. މި މުބާރާތުގެ ޗެމްޕިއަންކަން ހޯދުމާއެކު އޭނާއަށް ފައިސާގެ އިނާމުގެ ގޮތުގައި ވަނީ 4.88 މިލިއަން އެމެރިކާ ޑޮލަރު ލިބިފަ އެވެ.
މި އަހަރުގެ ޔޫއެސް އޯޕަން ޓެނިސް މުބާރާތުގެ ފައިނަލުގައިވެސް ވާދަކުރި މި ދެ ކުޅުންތެރިންގެ ފައިނަލަކީ ފަހަކަށް އައިސް ޓެނިހަށް ލޯބިކުރާ ގިނަ ބަޔަކު ޝައުގުވެރިވާ މެޗުތަކަކެވެ.
މި މުބާރާތުގެ ފައިނަލުގައި ފްރިޓްޒް ކުޅުމާއެކު އޭނާ ވެފައިވަނީ 2006 ވަނަ އަހަރަށް ފަހު މި މުބާރާތުގެ ފައިނަލަށް ދަތުރުކުރި އެމެރިކާގެ ފުރަތަމަ ކުޅުންތެރިޔާ އަށެވެ.