މިހާރު ކުރަމުންދާ ވިއްސާރައިގައި ރާއްޖޭގެ ބައެއް ރަށްރަށުގެ ގެތަކަށް ގެއްލުންވެއްޖެ

ރާއްޖެއަށް މިހާރު ކުރަމުންދާ ވިއްސާރައިގައި ބައެއް ރަށްރަށުގެ ގެތަކަށް ވަރަށް ބޮޑަށް ގެއްލުންވެއްޖެއެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން ވިދާޅުވީ ރާއްޖެއަށް މިހާރު ކުރަމުންދާ ވިއްސާރައިގައި ދެކުނާއި މެދުރާއްޖެތެރޭގެ ބައެއް ރަށްރަށުގެ ގެތަކަށް ގެއްލުން ލިބިގެން ރިޕޯޓްކޮށްފައިވާކަމަށެވެ. ވިއްސާރައިގައި ގެއްލުންލިބިގެން ރިޕޯޓްކޮށްފައިވާ ރަށްތަކުގެ ތެރޭގައި ދ.ބަނޑިދޫ، ޅ.ކުރެންދޫ، ސ.ފޭދޫ ހިމެނެއެވެ. މިރަށްތަކަށް އެހީތެރިކަން ފޯރުކޮށްދިނުމުގެ މަސައްކަތް ކުރައްވަމުން އަންނަކަމަށް އެންޑީއެމްއޭއިން ވިދާޅުވެއެވެ.

މިހާރުކުރަމުންދާ ވިއްސާރައިގައި ދ. ބަނޑިދޫގެ ގެއެެއްގެ ބަދިގޭގެ ފުރާޅުން ބައެއް އެއްލައިލުމުގެ ސަބަބުން ބަދިގެ އާއި އެ ގޭގައި ހިފައިގެންގުޅޭ ސާމާނަށް ގެއްލުން ވެފައި ކަމަށް އެންޑީއެމްއޭ އިން މައުލޫމާތުދެއްވައެވެ. އަދި ގޭގެ ފުރާޅު މަރާމާތު ކުރުމަށް ވަގުތު ބޭނުންވާތީ އެގޭގައި އުޅެމުން އައި 7 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށްވެސް އެއޮތޯރިޓީން ވިދާޅުވެއެވެ. އަދި އެ ރަށުގެ އެހެން ގެއެއްގެ ވެސް ފުރާޅުން ޓިނުތައް އެއްލާލާފައިވާތީ އެތަން މަރާމާތުކުރުމުގެ މަސައްކަތްވެސް ކުރަމުން އަންނަ ކަމަށެވެ. މީގެ އިތުރުންވެސް ބަނޑިދޫގެ މަގުތަކުގައި ފެންބޮޑުވުމުގެ އިތުރުން ރަށުގެ އެކި ސަރަހައްދުތަކުގައި ހުރި ގަސްތައް ވެއްޓިގެން ވެސް ރިޕޯޓުކޮށްފައިވާކަމަށް އެންޑީއެމްއޭން ވިދާޅުވިއެވެ.

މީގެ އިތުރުން އައްޑޫ ސިޓީ ފޭދޫގެ ގެއެއްގެ ފުރާޅަށް ގެއްލުންވެ، ސީލިންގަށް ފެން އެޅި، ސީލިންގު ވެއްޓިފައިވާތީ އެގޭގެ ފުރާޅު މަރާމާތުކުރުމުގެ މަސައްކަތްވެސް އެންޑީއެމްއޭއިން ވަނީ ކުރައްވާފައެވެ.

މިވިއްސާރައިގައި ކުރެންދޫއަށް ބޯކޮށް ވާރޭ ވެހި ރަށު ތެރޭގައި އެއްކޮށް ފެން ބޮޑުވުމާ ގުޅިގެން ސިފައިންގެ އެހީތެރިކަމާއެކު ކުރި މަސައްކަތުން ރޭގެ 12 ޖެހުމާއި ހަަމައަށް ފެން ހިންދާލެވިފައިވާކަމަށެވެ.

ފެން ބޮޑުވުމާ ގުޅިގެން ގެއްލުން ލިބުނު ގެތަކުގެ ތެރެއިން ދިރިނޫޅެވޭ ހާލަތަށް ގޮސްފައިވާ ގެތައް ދެނެގަނެ، އެ ފަރާތްތަކަށް ބޭނުންވާ ވަގުތީ ބޯހިޔާވަހިކަމާއި ކެއިން ބުއިމުގެ އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނަ ކަމަށް ވެސް އެންޑީއެމްއޭ އިން ވިދާޅުވިއެވެ.

ފެން ބޮޑުވެގެން 104 ގެއަކަށް ގެއްލުން ލިބުނު އިރު، ލިބުނު ގެއްލުންތައް ދެނެގަތުމުގެ މަސައްކަތް ކުރަމުން އަންނަ ކަމަށް އެންޑީއެމްއޭ އިން ވިދާޅުވިއެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން ވަނީ ގަދަވަޔައެކު ވިއްސާރަކުރާ ދުވަސްވަރު ދިމާވެދާނެ ހާދިސާއަކަށް ރައްކާތެރިވުމަށް ދުރާލާ ފިޔަވަޅުއެޅުމަށް އެދިވަޑައިގެންފައެވެ. އެގޮތުން ގަދަވައިގެ ސަބަބުން ގޭގެ ފުރާޅު އެއްލާލަފާނެ ކަމަށް ލަފާކުރެވޭނަމަ ކުރިޔާލާ ވައުފަދަ އެއްޗެއް ބޭނުންކޮށްގެން ފުރާޅު އެއްލާނުލާނެފަދަގޮތަކަށް ހައްޔަރުކުރުމާއި ބޭނުންނުކުރާނަމަ ކަރަންޓު ބޭނުންކުރާ ތަކެތި ނިންވާލާފައި ބެހެއްޓުމުގެ އިތުރުން ކަނޑު ދަތުރުކުރާ ފަރާތްތަކުން މޫސުމަށް ބަލައިގެން ދަތުރު ކުރުމަށް ސަމާލުކަންދިނުމަށްވެސް އިރުޝާދުދެއްވާފައެވެ. އަދި ދަތުރަށް ނުކުންނައިރު ސަލާމަތީ ކަންކަމާއި މުވާސަލާތީ ނިޒާމް ފުރިހަމައަށް ޔަގީން ކުރުމަށްވެސް އެންޑީއެމްއޭއިން ވަނީ އިރުޝާދު ދެއްވާފައެވެ.