ކައްކާ ގޭސް ރައްކާކުރުމުގެ ގާބިލްކަން އިތުރުކުރުމަށް 70 މިލިޔަން ރުފިޔާގެ މަޝްރޫޢެއް
-
މިއީ ކުންފުންޏަށް ހޯދިފައިވާ ބޮޑު ކާމިޔާބީއެއްކަމަށް
-
ކެޕޭސިޓީ 3 ގުނަ އިތުރުވެގެންދާނެ ކަމަށް މެނޭޖިން ޑިރެކްޓަރ ވިދާޅުވި
ކައްކާ ގޭސް ރައްކާކުރުމުގެ ގާބިލްކަން އިތުރުކުރުމަށް ގާތްގަނޑަކަށް 70 މިލިޔަން ރުފިޔާގެ މަޝްރޫޢެއް ފަށާފައިވާ ކަމަށް މޯލްޑިވް ގޭސް ޕްރައިވެޓް ލިމިޓެޑްގެ މެނޭޖިން ޑިރެކްޓަރ ޢަބްދުﷲ މުޙައްމަދު ވިދާޅުވެއްޖެއެވެ.
ޕީއެސްއެމް ނިއުސްގެ ހަފްތާ 52 ޕްރޮގްރާމުގައި ވާހަކަދައްކަވަމުން މޯލްޑިވް ގޭސް ޕްރައިވެޓް ލިމިޓެޑްގެ މެނޭޖިން ޑިރެކްޓަރ ޢަބްދުﷲ މުޙައްމަދު ވިދާޅުވީ އެކުންފުންޏަށް އޮތް އެންމެ ބޮޑު ގޮންޖެހުމަކީ ކައްކާ ގޭސް ރައްކާކުރުމުގެ ޖާގައިގެ ދަތިކަން ކަމަށެވެ. އަދި މިކަމަށް ހައްލެއް ހޯދުމަށް ކުރެވުނު މަސައްކަތްތަކުގައި މިހާރު ކާމިޔާބީތަކެއް ހޯދިފައިވާކަމަށެވެ.
"ވޭތުވެދިޔަ 25 އަހަރު ކުންފުންޏަށް އޮތް އެންމެ ބޮޑު ގޮންޖެހުމަކީ ގޭހުގެ ސްޓޯރޭޖްގެ ދަތިކަން، މުޅި ރާއްޖެއަށް ބޭނުންވާ ކައްކާ ގޭސް ހުންނާނީ އެއް މަސް ދުވަހުގެ ގާބިލްކަން، އެހެންނަމަވެސް މި މަޝްރޫޢާއެކު 4 ނޫނީ 5 މަސް ދުވަހަށް ޤާބިލްކަން އިތުރުވެގެންދާނެ،" ޢަބްދުﷲ މުޙައްމަދު ވިދާޅުވިއެވެ.
މެނޭޖިންގ ޑިރެކްޓަރ ޢަބްދުﷲ މުޙައްމަދު ވިދާޅުވީ މި މަޝްރޫޢު އަންނަ އަހަރުތެރޭ ނިމޭނެ ކަމަށެވެ. އަދި މި މަޝްރޫޢާއެކު، ކައްކާ ގޭސް ރައްކާކުރުމުގެ ގާބިލްކަން 3 ގުނައަށް އިތުރުވެގެންދާނެ ކަމަށެވެ.
ޢަބްދުﷲ މުޙައްމަދު ވިދާޅުވީ މޯލްޑިވް ގޭސްއަކީ ކުންފުންޏަށް ލިބޭ އާމްދަނީން ހިންގަމުން އަންނަ ފައިދާވާ ކުންފުންޏެއްކަމަށެވެ.
"މި ވޭތުވެދިޔަ އެއް އަހަރު %33ގެ ކުރިއެރުމެއްވަނީ ލިބިފައި، އެއް އިރެއްގައިވެސް ފައިސާ ދޭން ޖެހޭ ލޭ އަޅަންޖެހޭ ކުންފުންޏެއް ނޫން، ވަރަށް ދުޅަހެޔޮކޮށް މިދަނީ، ސަރުކާރުގެ ސިޔާސަތުގެ ސަބަބުން މިކުރިއެރުން މި ލިބެނީ،" ޢަބްދުﷲ މުޙައްމަދު ވިދާޅުވިއެވެ.
ޢަބްދުﷲ މުޙައްމަދު ވިދާޅުވީ ކުންފުނި ހިންގަމުންދަނީ ޚާއްސަ އަމާޒުތަކެއް ކަނޑައަޅާ އެކަންކަން ހާސިލްކުރުމަށް މުވައްޒަފުން ގުޅިގެން މަސައްކަތްކުރުމުގެ ރޫހުގައި ކަމަށެވެ. އެގޮތުން މިއަހަރުތެރޭގައި ހޯދާފައިވާ ކާމިޔާބީތަކާއެކު 3 ފަހަރެއްގެ މަތިން މުވައްޒަފުންނަށް ބޯނަސް ދީފައިވާކަމަށް އޭނާ ވިދާޅުވިއެވެ.