މާދަމާ ފެށުމަށް ހަމަޖެހިފައިވާ 90 ޕްލަސް ގޯލްޑް ކަޕް ފުޓްބޯޅަ މުބާރާތުގެ މެޗުތައް ބެލުމަށް ޓިކެޓް ވިއްކައިގެން ކުޅިބަލަން ވަންނަ ގޮތަށް ނިންމީ ޓީމުތަކަށް އެއްޗެއް ހޯދައިދިނުމުގެ މަގުސަދުގައި ކަމަށް މުބާރާތް އިންތިޒާމުކުރުމުގައި އިސްކޮށް ހަރަކާތްތެރިވާ ތަޖުރިބާކާރު ކޯޗު މުޙައްމަދު ޝާޒްލީ ބުނެފިއެވެ.
މުބާރާތުގެ ގުރުނެގުމުގެ ރަސްމިއްޔާތަށްފަހު "ޕީއެސްއެމް ސްޕޯޓްސް" އާ ވާހަކަދައްކަމުން ޝާޒްލީ ބުނީ މުބާރާތުގައި ރާއްޖެއިން 17 ޓީމު ބައިވެރިވީ ބޮޑެތި ޅަރަދުތަކެއް ކުރުމަށްފަހު ކަމަށެވެ.
ޝާޒްލީ ބުނީ މުބާރާތުގައި ބައިވެރުވުމަށް ރާއްޖޭ ހުރިހާ ރަށަކުން ބޭނުންވި ކަމަށާއި، މިއީ ކުއްލިއަކަށް އިއުލާންކުރި މުބާރާތަކަށްވުމުން، ބައެއް ޓީމުތަކަށް ދުވަސްވަރުގެ ގޮތުން ބައިވެރިވުމަށް ދަތިތަކެއް ހުރި ކަމަށެވެ. އެގޮތުން ޓީމުތަކުން މާލޭގައި މުބާރާތަށް ކޭމްޕް ކުރުމަކީ އުނދަގޫ ކަމެއް ކަމަށާއި، އެހެންނަމެވެސް ބައެއް ޓީމުތަކުން ބައިވެރިވުމަށް ފަހު ވަގުތާ ހަމައަށް މަސައްކަތް ކުރި ކަމަށްވެސް ވަނީ ބުނެފައެވެ. އަދި މާލީ ކަންކަން ހަމަނުޖެހިގެން ބައެއް ޓީމުތަކުން ވަކިވި ނަމަވެސް، 17 ޓީމަކީ މުޅި ރާއްޖައަށް ހުޅުވާލައިގެން ބާއްވާ މުބާރާތަކަށް ބަލާއިރު ހިތްހަމަޖެހޭ އަދަދެއް ކަމަށްވެސް ޝާޒްލީ ވަނީ ބުނެފައެވެ.
މުބާރާތުގެ ގުރޫޕް ސްޓޭޖުގެ މެޗުތައް ކުޅުމަށް ހަމަޖެހިފައިވަނީ ދެ ފިޔަވައްސަކަށް ބަހާލައިގެންނެވެ. އަދި ފުރަތަމަ ފިޔަވަހީގައި ހަތަރު ގުރޫޕުން އެންމެ ފުލައްދާ ޓީމު ކަޓާއިރު، ދެވަނަ ބުރުގައިވެސް އެންމެ ފުލަށްދާ ޓީމު ކަޓާނެއެވެ. މުބާރާތުގެ ތާވަލާ ގުޅޭގޮތުން ވާހަކަދައްކަމުން ޝާޒްލީ ބުނީ ބައިވެރި ޓީމުތަކަށް ފަރަތިކުރަން މަދު ދުވަސްތަކެއް ލިބުމުން، ގުރޫޕް ސްޓޭޖުގައި ވާދަކުރަންޖެހޭ މެޗުގެ އަދަދު އިތުރުކުރުމަށް ނިންމީ ކަމަށެވެ.
"އަޅުގަނޑުމެން ޝެޑިއުލް ހެދިއިރު އެންމެ ބޮޑަށް ވިސްނީ، މުބާރާތަށް ފަރިތަކުރަން އެހާ ބޮޑަކަށް އެއްވެސް ޓީމަކަށް ވަގުތެއް ނުލިބުނު، އެހެންވީމަ ފަރިތަކުރުންތައް މިހިރީ ވަރަށް ކުޑަ ދުވަސްކޮޅެއް ތެރޭގައި،" ޝާޒްލީ ބުންޏެވެ.
ޝާޒްލީ ބުނީ މުބާރާތުގެ ތެރެއިން ޓީމުތައް ބައްޓަންވުމަށް ފުރަސަތު ދިނުމުގެ ގޮތުން ގުރޫޕް ސްޓޭޖަށް ބަދަލުގެންނަން ނިންމީ ކަމަށެވެ. އެގޮތުން މުބާރާޓުގެ ދެވަނަ ބުރަށް ދެވޭނީ ގުރޫޕުގެ ފުލަށް ނުގޮސް ކުރީގައި އޮންނަ ޓީމު ކަމަށާއި، އެ ގޮތަށް ހެދުމުގެ އެންމެ ބޮޑު ބޭނުމަކީ ކޮންމެ ޓީމަކަށްވެސް ފުރުސަތު ހުޅުވާލިން ކަމަށެވެ.
ޝާޒްލީ ބުނީ މުބާރާތުގެ އެންމެ ބޮޑު ބޭނުމަކީ ރާއްޖޭގެ ރެފުރީންނާއި ރާއްޖޭގެ ކޯޗުން އަދި ކުޅުންތެރިންނަށް ފުރުސަތު ދިނުން ކަމަށާއި، އެގޮތުން އަދަދު ހަމަވެއްޖެ ނަމަ މުބާރާތަށް އިންސާފުކުރާނީ ދިވެހި ރެފުރީން ކަމަށެވެ. އަދި މުސްތަގުބަލުގައި މުބާރާތް ހަމައެކަނި ދިވެހި ކުޅުންތެރިންނަށް ޚާއްސަ ކުރުމަކީވެސް އަމާޒެއް ކަމަށާއި، އެކަން އެގޮތަށް ނިންމާއިރު ޓީމުތަކުގައި ލަފަޔާ މަޝްވަރާއަށް ބަލާނެ ކަމަށްވެސް ވަނީ ބުނެފައެވެ.