އެފްރިކާ ކަޕް އޮފް ނޭޝަންސް ކޮލިފައިންގައި ރޭ ކުޅުނު މެޗުތަކަށްފަހު ބޮޓްސްވާނާ، މޮޒަމްބީގް އަދި ޓެންޒޭނިއާ އެ މުބާރާތަށް ކޮލިފައިވެއްޖެއެވެ.
ބޮޓްސްވާނާ ވަނީ ރަށުން ބޭރުގައި 1-1 އިން މިސްރާ އެއްވަރުކޮށްފައެވެ. ގިނީ-ބިސާއު އަތުން މޮޒަމްބީގް މޮޅުވީ 2-1 އިންނެވެ. ގީނީ އަތުން ޓެންޒޭނިއާ މޮޅުވީ 1-0 އިންނެވެ.
މިސްރުން މި ފަހަރުގެ އިންޓަރނޭޝަނަލް ބްރޭކަށް ނިކުތްއިރު އެންމެ މުހިއްމު ކުޅުންތެރިޔާ ކަމަށްވާ، ލިވަޕޫލްގެ ފޯވާޑް، މުޙައްމަދު ސަލާހު އަށް އަރާމުކުރަން ފުރުޞަތުދިނުމުގެ ގޮތުން ސްކޮޑަށް ނުނަގައެވެ.
މެޗު ފެށިގެން އަށްވަނަ މިނެޓުގައި ބޮޓްސްވާނާ އިން ލީޑްނެގީ އޮމާޓްލާ ކެބަތޯ އެވެ. އޭގެ ހަތް މިނެޓުފަހުން، މިސްރުން އެއްވަރުކުރީ މަހްމޫދު ޓްރެޒެގޭ އެވެ. މުޅި މެޗުގައި މިސްރުން ގިނަވަގުތު ބޯޅަ ގެންގުޅުނު ނަމަވެސް، ބޮޓްސްވާނާގެ ދިފާއު ފޫއަޅުވާލުމުގައި އެ ޓީމަށް ދެން ކާމިޔާބުވާގޮތެއްނުވިއެވެ.
ޓެންޒޭނިއާގެ ބެންޖަމިން އެމްކާޕާ ނޭޝަނަލް ސްޓޭޑިއަމްގައި ރޭ ކުޅުނު މެޗުގައި ފެނިގެންދިޔަ ހަމައެކަނި ލަނޑު، 61 ވަނަ މިނެޓުގައި ކާމިޔާބުކޮށްދިނީ ސިމޮން އެމްސޫވާ އެވެ. މިއީ އެ ޓީމުން އެ މުބާރާތުގައި ވާދަކުރާ ހަތަރުވަނަ ފަހަރެވެ.
ގިނީ-ބިސާއުގެ ދަނޑުގައި ކުޅުނު މެޗުގައި ކުރީން ލީޑްނެގީވެސް މޮޒަމްބީގުންނެވެ. މެޗު ފެށިގެން ނުވަވަނަ މިނެޓުގައި އެ ޓީމަށް މި ލަނޑުޖަހައިދިނީ ބްރޫނޯ ލަންގާ އެވެ. އެކަމަކު، ފުރަތަމަ ހާފު ނިމުމުގެކުރީން ގިނީ-ބިސާއު އިން ވަނީ ނަތީޖާ އެއްވަރުކޮށްފައެވެ. މެޗުގެ 42 ވަނަ މިނެޓުގައި އެ ޓީމަށް މި ލަނޑުޖަހައިދިނީ އެވަޓަންގެ ފޯވާޑް، ބެޓޯ އެވެ.
މި މެޗުން މޮޒަމްބީގް މޮޅުވި ލަނޑު، 52 ވަނަ މިނެޓުގައި ކާމިޔާބުކޮށްދިނީ ސްޓެންލީ ރަޓީފޯ އެވެ.
މޮރޮކޯގައި އަންނަ އަހަރު ބާއްވާ 24 ޓީމު ވާދަކުރާ މުބާރާތް ކުރިއަށްދާނީ އަންނަ އަހަރުގެ ޑިސެންބަރު މަހުގެ 21 އިން 2026 ވަނަ އަހަރުގެ ޖަނަވަރީ މަހުގެ 18 ގެ ނިޔަލަށެވެ.