އަންހެނުންނަށް ކުރާ އަނިޔާ ހުއްޓުވައި އަނިޔާވެރިކަމަށް ނޫނެކޭ ބުނަމާ!

މީގެ ކުރިން ގެވެށި އަނިޔާއާއި އަންހެނުންނަށް ކުރާ އަނިޔާގެ މައްސަލަތައް ސިފަވެފައި އޮންނަނީ ހަމައެކަނި އާއިލީ މައްސަލަތަކެއްގެ ގޮތުގައެވެ. އަދި އެއީ އެހެން ފަރާތްތަކުން ނުވަތަ ސަރުކާރުން ވެސް އެކަމާއި ދެކޮޅަށް މަސައްކަތް ކުރަން ޖެހޭ ކަމެއް ނޫންކަމަށް ދެކެމުން އައި ދުވަސްތަކެއް ދިޔައެވެ.

މިފަދަ ވިސްނުމުގެ ނަތީޖާއަކަށް ވެފައިވަނީ، ގިނަ އަންހެނުން އެމީހުންގެ މުޅި އުމުރު އަނިޔާއާއި، ހިތާމައާއި، ބިރުވެރިކަމުގެ ތެރޭގައި
ދިރިއުޅެން މަޖުބޫރުވުމެވެ. އެ ހާލަތުން އަރައިގަނެ އުފާވެރި ދިރިއުޅުމެއް އުޅެން ބޭނުންވި ނަމަވެސް، މުޖުތަމަޢުން އެކަމާމެދު ދެކޭނެ ގޮތާމެދު ބިރުގަނެ، އެކަމަށް އިސްނަގަން ނުކެރި ތިބި މީހުންވެސް މަދެއް ނޫނެވެ.

އެހެން ކަމުން އެފަދަ އަނިޔާވެރި އަދި ބިރުވެރިކަމުން އަނިޔާިބެމުންދިޔަ އަންހެނުން ސަލާމަތްކުރުމަށް މުޖުތަމަޢުގެ ހުރިހާ ފަރާތްތަކެއްގެ އެއްބާރުލުމާއި އެހީތެރިކަމުގެ އިތުރުން ސަމާލުކަން ބޭނުންވެއެވެ. މިއީ ޙައްލު ހޯދަން އެންމެން ގުޅިގެން މަސައްކަތްކުރަންޖެހޭ މުހިންމު މައްސަލައެކެވެ. އެއްވެސް ސަބަބެއް ނެތި ހޮބީއެއްގެ ގޮތުގައިވެސް އަނިޔާކުރާ މީހުންތިބޭކަން އަނިޔާލިބޭ ބައެއް އަންހެނުން ފާހަގަކުރެއެވެ. އެހެންކަމުން ގެވެށި އަނިޔާއާއި އަންހެނުންނަށް ކުރިމަތިވާ ތަފާތު އެކި އަނިޔާގެ މައްސަލަތަކަކީ ހަމައެކަނި އާއިލީ މައްސަލައެއްގެ ގޮތުގައި ދެކުމުގެ ބަދަލުގައި، އިޖުތިމާޢީ އަދި ޤާނޫނީ ފިޔަވަޅު އަޅަންޖެހޭ ބޮޑު މައްސަލައެއްގެ ގޮތުގައި ދެކެންޖެހެއެވެ. އަދި އެގޮތަށް އެންމެންވެސް ވިސްނުން ބަދަލުކުރަންޖެހެއެވެ.

ދީނީ ނަޒަރަކުން މި މައްސަލައަށް ބަލާއިރު އަނިޔާވެރިވުމުގެ ހުރިހައި ކަމެއް އިސްލާމްދީނުގައި ވަނީ ހަރާމްކުރައްވައިފައެވެ. މުސްލިމް އަންހެނުންނަކީ އިސްލާމީ މުޖުތަމަޢުގެ ބިނާކުރުމުގެ އެއްބއެވެ. އަދި އެކަނބަލުންނަކީ މުސްލިމް ފިރިހެނުންގެ އަނބީންނަށް ނުވަތަ މައިންނަށް ނުވަތަ އުޚްތުންނަށް، ނުވަތަ ދަރިންނަށްވާއިރު އެ ކަނބަލުންނަށް އަނިޔާވެރިވުމުގެ ކުރީން އެކަމާ މެދު ކޮންމެ މުސްލިމަކު ވިސްނަން ޖެހޭނެކަން ދީނީ އިލްމުވެރިން ގެންދަވަނީ ވިދާޅުވަމުންނެވެ.

އެގޮތުން އެ ކަނބަލުންގެ އަގުވައްޓައިލުމަށްޓަކައި އެ ކަނބަލުންގެ އަބުރާބެހުމާއި، އެ ކަނބަލުންނަށް ފުރައްސާރަކުރުމާއި، އެ ކަނބަލުންގެ އިއްފަތްތެރިކަމަށް އަރައިގަތުމާއި އެ ކަނބަލުން ނާޖާއިޒު ގޮތުގައި ބޭނުންކުރުމަކީ އިސްލާމްދީން މަނާކުރާ ބޮޑެތި ފާފަތަކުގެ ތެރޭގައި ހިމެނޭ ކަންކަމެވެ. ކީރިތި ރަސޫލާ ﷺ ދުވަހަކުވެސް އަންހެނެއްގެ ގައިގައި ޖައްސަވައިފައެއް ނުވެއެވެ. އިތުރު އެކަލޭގެފާނުގެ އެންމެ ފަހު ވަސިއްޔަތްޕުޅުތަކުގެ ތެރޭގައި އަންހެނުންނަށް ހެޔޮކޮށް ހިތުމަށް ވަސިއްޔަތް ކުރައްވައިފައިވެއެވެ.

ގެވެށި އަނިޔާގެ ތެރޭގައި ހިމެނެނީ ފިރީން އަނބީންނަށް، އަނބީން ފިރިންނަށް ކުރާ އަނިޔާއާއި، މައިންބަފައިން ދަރިންނަށް ކުރާ އަނިޔާއާއި، ދަރީން މައިންބަފައިންނަށް ކުރާ އަނިޔާއާއި، އެކަކު އަނެކަކަށް ކުރާ ތަފާތު ބާވަތްތަކުގެ އަނިޔާތަކެވެ. މި ފަދަ އަނިޔާ ތަކުގެ ތެރެއިންވެސް އެންމެ ގިނައިން ހުށައަޅާކަމަށް ތަފާސްހިބާތުކަށް ދައްކަނީ އަންހެނުންނަށް ކުރާ ތަފާތު އެކި ބާވައްތަކުގެ އަނިޔާއެއެވެ.

އެގޮތުން ފެމިލީ ޕްރޮޓެކްޝަން އޮތޯރިޓީގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރު ހުށަހަޅާފައިވާ މައްސަލަތަކުގެ ތެރޭގައި އަނިޔާލިބިފައިވާ މީހުންގެ އަދަދަކީ 973އެވެ. އަނިޔާ ލިބިފައިވާ ފަރާތްތަކުގެ ތެރޭގައި ހިމެނެނީ 619 އަންހެނަކާއި 240 ފިރިހެނުންގެ ހިމެނެއެވެ. މީގެއިތުރުން ރިޕޯޓް ކުރިއިރު ޖިންސްގެ މަޢުލޫމާތު ލިބިފައިނުވާ 114 މީހަކުވެސް ހިމެނެއެވެ. އަނިޔާ ލިބުނު މީހުންގެ ތެރެއިން 503 މީހުންނަކީ 18 އަހަރުން މަތީގެ މީހުންނެވެ. އަދި 469 މީހުންނަކީ 18 އަހަރުން ދަށުގެ ކުޑަކުދިންނެވެ.

ގެވެށި އަނިޔާއަށް ހޭލުންތެރިކުރުމަށް ކުރާ މަސައްކަތުގެ ހެޔޮ ނަތީޖާވެސް މުޖުތަމަޢުން އަންނަނީ ފެންނަމުންނެވެ. އެގޮތުން މައްސަލަ ރިޕޯޓްކުރާ އަދަދު އިތުރުވުމުން ދައްކުވައިދެނީ މިފަދަ މައްސަލަ ރިޕޯޓްކުރަން މީހުން މިހާރު ފަސްނުޖެހޭ ކަމެވެ.

ކޮންމެ އަހަރެއްގެ ނޮވެމްބަރު މަހުގެ 25 ވަނަ ދުވަހަކީ އަންހެނުންނަށް ކުރާ އަނިޔާއާ ދެކޮޅަށް ފާހަގަކުރާ ބައިނަލްއަގުވާމީ ދުވަހެވެ. އަންހެނުންގެ ހައްޤުތައް ރައްކާތެރިކުރުމާއި، އަންހެނުންނަށް ކުރާ އެކި ބާވަތުގެ އަނިޔާ ހުއްޓުވުމަށް ކުރާ މަސައްކަތްތަކުގެ ތެރެއިން އިޖުތިމާއި އަދި އާއިލީ ތަރައްޤީއާއި ބެހޭ ވުޒާރާއިން ކޮންމެ އަހަރެއްގެ 25 ނޮވެމްބަރ އިން 10 ޑިސެމްބަރ އަށް ކުރިއަށް ގެންދާ ބައިނަލް އަޤްވާމީ ގޮތުން ފާހަގަ ކުރާ "ސިކްސްޓީން ޑޭސް އޮފް އެކްޓިވިޒަމް އެގެއިންސްޓް ޖެންޑަރ ބޭސްޑް ވަޔަލަންސް" ކެމްޕޭންގެ ދަށުން މި އަހަރު ކަނޑައަޅާފައިވާ ޝިޔާރަކީ "އެވްރީ ޓެންމިނެޓްސް، އަ ވޮމެން އިޒް ކިލްޑް. ނޯ އެކްސްކިއުޒް. ޔުނައިޓް ޓު އެންޑް ވަޔަލަންސް އެގެއިންސްޓް ވޮމެން" އެވެ.

މުޖުތަމަޢުގައި ހިނގާ ގެވެށި އަނިޔާގެ މައްސަލަތައް ހުއްޓުވުމަށް ގިނަ މަސައްކަތްތަކެއް ފެމިލީ ޕްރޮޓެކްޝަން އޮތޯރިޓީން އަންނަނީ ކުރައްވަމުންނެވެ. އެގޮތުން ގެވެށި އަނިޔާގެ ޢަމަލުތައް ހިންގާ މީހުން ރީހެބިލިޓޭޓްކުރުމާއި އެފަދަ ފަރާތްތަކާމެދު ޤާނޫނީ ފިޔަވަޅު އެޅުމަށް ކޯޓުތަކަށް މައްސަލަތައް ފޮނުވުން ހިމެނެއެވެ. އަދި ގެވެށި އަނިޔާގެ ޝިކާރައަކަށްވާ މީހުންގެ ތެރެއިން ޤާނޫނީ ވަކީލެއްގެ އެހީތެރިކަން ހަމަނުޖެއްސޭ ފަރާތްތަކަށް ޤާނޫނީ ވަކީލުން ހަމަޖައްސައިދިނުމުގެ ޚިދުމަތްވެސް ފެމިލީ ޕްރޮޓެކްޝަން އޮތޯރިޓީން ވަނީ ފަށައިފައެވެ.