ޢުމުރުން ދުވަސްވީ މީހުންނަށްދޭ 5،000 ރުފިޔާ ކަނޑާނުލާނެ

ވަޒީފާއިން ރިޓަޔަރވުމުންނާއި، ވަކި ޢުމުރެއް ހަމަވުމުން ސަރުކާރުން ދެއްވާ އިނާޔަތް ނުވަތަ ޕެންޝަން ނިޒާމު އިސްލާޙުކުރުމަށްކުރާ މަސައްކަތުގެ ތެރެއިން 65 އަހަރުވުމުން ސަރުކާރުންދޭ "ޢުމުރުން ދުވަސްވީ މީހުންގެ އަސާސީ ޕެންޝަން" ނިޒާމަށް އެއްވެސް ބަދަލެއް ނާންނާނެކަމުގެ ޔަޤީންކަން ސަރުކާރުން ދެއްވައިފިއެވެ. ސަރުކާރުން ވިދާޅުވީ ކުރިއަށްއޮތްތަނުގައިވެސް 65 އަހަރުފުރުމުން ލިބޭ 5،000 ރުފިޔާ ހަމައެގޮތުގައި ލިބެމުންދާނެކަމަށެވެ.

ސަރުކާރުން މިކަން ހާމަކުރައްވާފައިމިވަނީ، ޕެންޝަން ނިޒާމަށް ސަރުކާރުން ގެންނަވާ ބަދަލުތަކުގެ ތެރެއިން 65 އަހަރުފުރުމުން ސަރުކާރުންދޭ އިނާޔަތް ނުދިނުމަށް ނިންމަވާފައިވާފަދަ މޭރުމަކުން ސޯޝަލް މީޑިޔާގައި ދައުރުވަމުންދާ ވާހަކަތަކަކާ ގުޅިގެން އެކަން އޮޅުންފިލުއްވައިދެއްވަމުންނެވެ.

2008 ވަނަ އަހަރު އެކުލަވާލެވުނު ފެހި ޤާނޫނުއަސާސީއާއެކު ދިވެހިރާއްޖޭގެ ޕެންޝަނާބެހޭ ޤާނޫނެއް ވުޖޫދުވިއެވެ. މި ޤާނޫނުގެ ދަށުން 2009 ވަނަ އަހަރު، މަލްޓިޕިލަރ ޕެންޝަން ނިޒާމެއް ތަޢާރަފުވިއެވެ. މި ނިޒާމުގައި ހިމެނެނީ މައިގަނޑު ދެ ޕެންޝަން ސްކީމެކެވެ. އެއީ މޯލްޑިވްސް ރިޓަޔަރމެންޓް ޕެންޝަން ސްކީމާއި ޢުމުރުން ދުވަސްވީ މީހުންގެ އަސާސީ ޕެންޝަން ސްކީމެވެ.

ޢުމުރުން ދުވަސްވީ މީހުންގެ ޕެންޝަން ސްކީމް

ޢުމުުރުން ދުވަސްވީ މީހުންގެ އަސާސީ ޕެންޝަން ސްކީމަކީ 65 އަހަރުފުރުމުން ސަރުކާރުންދޭ 5،000 ރުފިޔާގެ އިނާޔަތެވެ. މި އިނާޔަތް ދޭ ނިޒާމަށް ބަދަލުތަކެއް ގެނައުމަށް ސަރުކާރުން ވަނީ ނިންމަވާފައެވެ. ނަމަވެސް އެ ބަދަލުގެ ސަބަބުން އިނާޔަތް ޙައްޤުވާ އެއްވެސް ފަރާތަކަށް އިނާޔަތް ކަނޑައެއްނުލާނެއެވެ.


މި ސްކީމަށް ސަރުކާރުން ގެންނަ ބަދަލަކީ ހައްގުވެރިންނަށް ދައުލަތުން އިނާޔަތްދިނުމެވެ. މުއްސަނދިންނަށް ދައުލަތުން ދެމުން އައި އިނާޔަތް ހުއްޓާލުމެވެ. މީގެ ސަބަބުން މިލްކިއްޔާތުގައި ގިނަ އަދަދެއްގެ ފައިސާ ހުންނަ މުއްސަނދިންނަށް ސަރުކާރުން ދެން އިނާޔަތެއް ނުދޭނެއެވެ.

މި ބަދަލު ގެނައުމަށްޓަކައި 65 އަހަރު ފުރުމުން ލިބޭ 5،000 ރުފިޔާގެ ޕެންޝަން ސްކީމަށް އެދުމަށް އޮންލައިން ޕޯޓަލެއް މެދުވެރިކޮށް ސަރުކާރުން ހުޅުވާލާނެއެވެ. އެހެންކަމުން އޭޕްރީލް މަހުން ފެށިގެން 5،000 ރުފިޔާ ދޭނީ ޕޯޓަލަށް ހުށައަޅާ ފަރާތްތަކުގެ ތެރެއިން ޙައްޤުވާ ފަރާތްތަކަށް އެކަންޏެވެ. މި ނިޒާމު ބަދަލުވާނީ ޓާގެޓެޑް ޕެންޝަން ސްކީމަކަށެވެ.

ރިޓަޔަރމެންޓް ޕެންޝަން ސްކީމަކީ ކޮބައި؟

2009 ވަނަ އަހަރު ތަޢާރަފްވި މަލްޓިޕިލަރ ޕެންޝަން ނިޒާމުގެ ތެރެއިން ޢުމުރުން ދުވަސްވީ މީހުންގެ ސްކީމްގެ އިތުރުން ދެން އެކުލަވާލާފައިވަނީ މޯލްޑިވްސް ރިޓަޔަރމެންޓް ޕެންޝަން ސްކީމެވެ. މި ސްކީމަކީ ދިވެހި ދައުލަތުގެ މުއައްސަސާއަކުން މުވައްޒަފުން ރިޓަޔަރވާއިރު، އެމީހުންނަށް ގަނޑުކޮށް ފައިސާ ދިނުމާއެކު މުޅި ޢުމުރަށް މަހުންމަހަށް ފައިސާ ލިބެމުންދާ ނިޒާމެވެ.

މި ނިޒާމު ފަރުމާވެފައިވަނީ ވަޒީފާދޭ ފަރާތާއި ވަޒީފާ އަދާކުރާ ފަރާތުން ކަނޑައެޅިފައިވާ ވަކި އަދަދަކަށް ސްކީމަށް ފައިސާ ދައްކައި، އެ ފައިސާ އިންވެސްޓްކޮށްގެން ރިޓަޔަރމަންޓަށް ފައިސާ ރައްކާކުރެވޭ ގޮތަށެވެ. އެގޮތުން ވަޒީފާދޭ ފަރާތުންނާއި ވަޒީފާއަދާކުރާ ފަރާތުން ޕެންޝަން ކޮންޓްރިބިއުޝަންގެ ގޮތުގައި ކޮންމެ މަހަކު މުވައްޒަފުގެ އަސާސީ މުސާރައިގެ %7 ސްކީމަށް ދައްކަންޖެހޭނެއެވެ. އަދި ސަރުކާރުންވެސް 7 އިންސައްތަ ދައްކައެވެ. އަދި މުވައްޒަފު ރިޓަޔަރވުމުން ލިބޭ މިންވަރު ބިނާވާނީ ރިޓަޔަރވާއިރު، އެމީހެއްގެ ރިޓަޔަރމަންޓް ސޭވިންގްސްގެ ގޮތުގައި ޖަމާވެފައިހުރި އަދަދެއްގެ މައްޗަށެވެ. މި ސްކީމްގައި ބައިވެރިވުން ސަރުކާރުގެ އިދާރަތަކަށާއި ޕްރައިވެޓް ސެކްޓަރތަކުގެ މައްޗަށްވެސް ލާޒިމްވާނެއެވެ.

މޯލްޑިވްސް ރިޓަޔަރމެންޓް ޕެންޝަން ސްކީމް ރާއްޖޭގައި އެކުލަވާލާފައިވަނީ މުހިންމު މަޤުޞަދެއްގައެވެ. ނަމަވެސް މި މުހިންމު މަޤުޞަދާ ޚިލާފަށް ރާއްޖޭގައި ޕެންޝަން ދެވެން ފެށުނީ ދައުލަތުގެ ބައެއް އިދާރާތަކުން އަމިއްލައަށް އެކުލަވާލި ގަވާއިދުތަކާއި އުޞޫލުތަކުގެ ސަބަބުންނެވެ. މި ޤަވާއިދުތަކާއި އުޞޫލްތަކުގެ ސަބަބުން ދައުލަތުގައި މަސައްކަތްކޮށް، ރިޓަޔަރވާ ފަރާތްތަކަށް ލިބޭ ޕެންޝަންގައި ހަމަހަމަކަން ގެއްލުނެވެ. ބައެއް ފަރާތްތަކަށް ޢާންމު އުޞޫލުގެ ބޭރުން މާ ގިނައިން ފައިސާ ލިބުމަށް މަގުފަހިވެއެވެ. ނަމަވެސް ސަރުކާރުން މިހާރު ގެންނަ ބަދަލަކީ ސަރުކާރުގެ ހުރިހާ އިދާރާއެއްގެ މެދުގައި ޕެންޝަނަށް ފައިސާ ދިނުމުގައި ހަމަހަމަކަން އުފެއްދުމަށް ގެންނަ ބަދަލުތަކެކެވެ. އެ ފައިސާދޭ އުސޫލު އެއްހަމަ ކުރުމެވެ.

ރިޓަޔަރމެންޓް ޕެންޝަން ސްކީމުގައިހުރި މައްސަލަތައް:

ރިޓަޔަރމެންޓް ޕެންޝަން ސްކީމްގެ ނަމުގައި ދައުލަތުގެ ބައެއް އިދާރާތަކުން ހަދާފައިވާ އުޞޫލްތަކުގެ ސަބަބުން ހަގު ޢުމުރުފުރާގައި ރިޓަޔަރވުމުގެ ފުރުޞަތު ލިބެއެވެ. މީގެ ސަބަބުން ދިގު މުއްދަތަކަށް އެ މީހަކަށް ދައުލަތުން ޚަރަދުކުރަންޖެހެއެވެ. އަދި އެމީހަކު އަލުން ދައުލަތުގެ މަޤާމެއްގައި މަސައްކަތްކުރަން ފެށި ނަމަވެސް، އޭނާ ކުރިން އުޅުނު ވަޒީފާއިން ރިޓަޔަރވުމުން ލިބޭ ޕެންޝަން ކަނޑާލެވޭނެ ގޮތެއް ޤަވާއިދާއި އުޞޫލުތަކުގެ ތެރެއިން ނޯވެއެވެ. އަދި ދެވަނަ ފަހަރަށް އޭނާ އަދާކުރަމުންދިޔަ ވަޒީފާއިން ރިޓަޔަރވުމުން، ދެ ވަޒީފާގެ ޕެންޝަން ފައިސާ އޭނާއަށް ދާނީ ލިބެމުންނެވެ. ނަމަވެސް ދެވަނަ ވަޒީފާގައި އުޅެމުންދާއިރު، ކުރީ ވަޒީފާގެ ޕެންޝަން ފައިސާ އޭނާއަށް ލިބިލިބި ހުރުމަކީ ޕެންޝަން ޤާނޫނުގެ މަޤުޞަދުތަކާ ޚިލާފު ކަމެކެވެ.

މީގެ އިތުރުން ރިޓަޔަރމެންޓް ޕެންޝަން ސްކީމްގެ ދަށުން ސަރުކާރުން 7 އިންސައްތަ ޖަމާކޮށްދީފައިވީނަމަވެސް، ދައުލަތުގެ ބައެއް އިދާރާތަކުން ހަދާފައިވާ ޤަވާއިދުތަކާއި އުޞޫލްތަކުގެ ސަބަބުން މުވައްޒަފުންގެ ހިއްސާއެއްނެތި ދައުލަތުގެ ބަޖެޓުން ޚަރަދުކޮށްގެން އިނާޔަތްދޭންޖެހެއެވެ. މިއީ ޑަބަލް ޕެންޝަން ދިނުމެވެ. އެހެނީ ރިޓަޔަރމެންޓް ޕެންޝަން ސްކީމްގެ ދަށުން ފައިސާލިބި އަދި އޭގެ އިތުރަށް މަސައްކަތްކުރި އިދާރާއަކުން ހަދާފައިވާ އުޞޫލެއްގެ ސަބަބުން ދައުލަތުގެ ބަޖެޓުންވެސް މުޅި ޢުމުރަށް އޭނާއަށް އެދަނީ ފައިސާ ލިބެމުންނެވެ. މިއީ ރާއްޖޭގެ މާލީ ޙާލަތު ގޯސްވެފައިވާ މި ދަނޑިވަޅުގައި ކުރުން އެންމެ ރަނގަޅު ޚަރަދެއް ނޫނެވެ. އަދި މިފަދަ އުޞޫލުތައް ހަދާފައިވާ ނުވާ އިދާރާތަކުގައި މަސައްކަތްކޮށް ރިޓަޔަރވާ މީހުންނަށް ޑަބަލް ޕެންޝަނެއް ނުލިބެއެވެ.

އެހެންކަމުން މިހާރު ނިޒާމު ބައްޓަންވެފައިވާ ގޮތުން ދައުލަތުގައި މަސައްކަތްކޮށް ރިޓަޔަރވާ ބައެއް ފަރާތްތަކަށް ރިޓަޔަރމެންޓް ޕެންޝަންގެ އިތުރުން 65 އަހަރު ފުރުމުން 5،000 ރުފިޔާ ލިބޭއިރު، ބައެއް ފަރާތްތަކަށް އެ ދެ ސްކީމްގެ ފައިސާގެ އިތުރުން ދައުލަތުގެ ބަޖެޓުން އިތުރު ފައިސާތަކެއް ލިބެއެވެ. އަދި އެއް ވަޒީފާއަކުން ރިޓަޔަރވެ، ބޮޑު މުސާރަ ލިބޭ އެހެން ވަޒީފާއަކަށް ގޮސްފިނަމަ، އޭނާއަށް ލިބޭ ރިޓަޔަރމެންޓް ޕެންޝަން ވަރަށް ބޮޑަށް އިތުރުވެއެވެ.

ސަރުކާރުން މިހާރުކުރަމުންދާ މަސައްކަތަކީ މި ނިޒާމުގައި ހަމަހަމަކަން ޤާއިމްކުރުމެވެ. އަދި ނިޒާމުގެ ތެރެއިން ދައުލަތުންކުރަންޖެހޭ ޚަރަދު ކުޑަކުރުމެވެ. އިންސާފު ޤާއިމްކުރުމެވެ.

މީޑިޔާތަކަށް މަޢުލޫމާތު ދެއްވަމުން މާލީ ވުޒާރާއިން ވަނީ ޕެންޝަން ރިޓަޔަރމެންޓް ސްކީމްގެ ތެރެއިން ބައެއް މީހުންނަށް މަހުން މަހަށް ގާތްގަނޑަކަށް 46،000 ރުފިޔާ ލިބޭކަން ހާމަކުރައްވާފައެވެ. އަދި ގަނޑުކޮށް 1 މިލިޔަން ރުފިޔާ ބައެއް މީހުންނަށް ލިބިފައި އެބަހުރިކަން އެ ވުޒާރާއިން ހާމަކުރައްވާފައިވެއެވެ.

ރިޓަޔަރމެންޓް ޕެންޝަންގައިހުރި މައްސަލަތައް ޙައްލުކޮށް ހަމަހަމަކަން ޤާއިމްކުރުން:

މޯލްޑިވްސް ރިޓަޔަރމެންޓް ޕެންޝަން ސްކީމްގައިހުރި މައްސަލަތައް ހައްލުކުރުމަށް ސަރުކާރުން އަޅުއްވާ އެންމެ މުހިންމު އެއް ފިޔަވަޅަކީ އައު ޕޭ ފްރޭމްވަރކެއް ޤާއިމްކުރުމާއި، އަލަށް ރިޓަޔަރވާ ފަރާތްތަކަށް އެއްހަމަ އުޞޫލެއްގެ ދަށުން ޕެންޝަންގެ އިނާޔަތްތައް ދިނުމަށްޓަކައި ގެންނަންޖެހޭ ޤާނޫނީ ބަދަލުތައް ގެނައުމެވެ.

މިކަން ކުރުމަށް މާލީ ވަޒީރު މޫސާ ޒަމީރު ސޮއިކުރައްވައި އިދާރާތަކަށް އުޞޫލްތައް އިސްލާޙުކުރުމަށް އެދި ސިޓީއެއް ވަނީ ފޮނުއްވާފައެވެ. އެ ސިޓީގައިވަނީ އަންނަ އަހަރުގެ ޖެނުއަރީ މަހުން ފެށިގެން އަލަށް ވަޒީފާއިން ރިޓަޔަރކުރާ މުވައްޒަފުންނަށް ޕެންޝަން ސްކީމގެ ބޭރުން އިތުރު މަހު އެލަވެންސްއެއް ނުދެވޭނެކަމަށެވެ.

އެހެންކަމުން ރިޓަޔަރމެންޓް ސްކީމްގެ ދަށުން "މަހުން މަހަށް" ދެވޭ ފައިސާ އުނިވާނީ އަންނަ އަހަރުގެ ޖެނުއަރީމަހުން ފެށިގެން ރިޓަޔަރވާ ފަރާތްތަކަށް އެކަންޏެވެ. އަދި ވަކިވަކި އުޞޫލު ހަދައިގެން ރިޓަޔަރމެންޓް ޕެންޝަންދޭ އިދާރާތަކުން މިމަހުގެ 15 ވަނަ ދުވަހުގެ ކުރިން އުޞޫލު އިސްލާޙުކޮށް، ވުޒާރާއަށް ހުށައަޅައި، ގެޒެޓުކުރުމަށް މާލީ ވަޒީރުގެ ސިޓީގައި ވަނީ އެދިވަޑައިގެންފައެވެ.

ރިޓަޔަރމެންޓް ޕެންޝަން ސްކީމަށް ސަރުކާރުން ގެންނަން ނިންމާފައިވާ ބަދަލުތަކަކީ ދުރު މުސްތަޤުބަލަށް ވިސްނައިގެން ރާއްޖޭގައި ޕެންޝަން ދެމުން އަންނަ ނިޒާމު ހަރުދަނާކުރުމަށް ގެންނަ މުހިންމު ބަދަލުތަކެކެވެ. މި ބަދަލުތަކުގެ ސަބަބުން ކޮންމެ ދިވެއްސަކަށްވެސް ހަމަހަމަކަމާއެކީ ޕެންޝަން ފައިސާ ކުރިއަށްއޮތްތަނުގައި ލިބޭނެއެވެ. އަދި ޕެންޝަނަށް ދައުލަތުންކުރަންޖެހޭ ޚަރަދުވެސް ކުޑަ ކުރެވޭނެއެވެ.

މިދިޔަ އަހަރަށް ދައުލަތުން ލަފާކޮށްފައިވާ ބަޖެޓުގައި ޢުމުރުން ދުވަސްވީ މީހުންނަށް ދޭ ޕެންޝަނަށް 1.2 ބިލިޔަން ރުފިޔާ ޚަރަދުވާނެކަމަށް ލަފާކޮށްފައިވާއިރު، ރިޓަޔަރވާ ފަރާތްތަކަށް 298.4 މިލިޔަން ރުފިޔާ ޚަރަދުވާނެކަމަށް ލަފާކޮށްފައިވެއެވެ. އަދި އަންނަ އަހަރަށް ލަފާކުރާ ދައުލަތުގެ ބަޖެޓުގައި ޢުމުރުން ދުވަސްވީ މީހުންނަށް ދޭ ޕެންޝަނަށް 1.4 ބިލިޔަން ރުފިޔާ ޚަރަދުވާނެކަމަށް ލަފާކޮށްފައިވާއިރު، ރިޓަޔަރވާ ފަރާތްތަކަށް 325.6 މިލިޔަން ރުފިޔާ ޚަރަދުވާނެކަމަށް ލަފާކޮށްފައިވެއެވެ.