ޗައިނާ ފަތުރުވެރިންނަށް، ރައްކާތެރިކަމުގެ މައުލޫމާތު ދިނުމުގެ ޚާއްސަ ހަރަކާތެއް ފަށައިފި

ފަތުރުވެރިކަމުގެ ހައި ސީޒަނާ ދިމާކޮށް، ރާއްޖެ އަންނަ ޗައިނާގެ ފަތުރުވެރިންނަށް އަމާޒުކޮށްގެން މައުލޫމާތު ދިނުމުގެ ހަރަކާތެއް ފުލުހުންގެ ޚިދުމަތުން ފަށައިފިއެވެ.

މިދިޔަ ހުކުރު ދުވަހު ފެށި މި ހަރަކާތަކީ ރާއްޖެއަށް ޒިޔާރަތްކުރާ ޗައިނާ ފަތުރުވެރިންނަށް ދިމާވާ ހިތާމަވެރި ހާދިސާތައް މަދުކުރުމަށްޓަކައި ޓުއަރިސްޓް ޕޮލިހުން އިސްނަގައިގެން ފަތުރުވެރިކަމާބެހޭ ވުޒާރާ އާއި ޗައިނާ އެމްބަސީ ގުޅިގެން ކުރިއަށް ގެންދާ ހަރަކާތެއް ކަމަށް ފުލުހުން ވިދާޅުވެއެވެ.

މި ހަރަކާތުގެ ތެރެއިން ޗައިނާގެ ފަތުރުވެރިން ވެލާނާ އިންޓަރނޭޝަނަލް އެއަރޕޯޓަށް އައުމާއެކު އެފަތުރުވެރިންނާ ބައްދަލުކޮށް، މޫދުގެ އެކި ހަރަކާތްތަކުގައި ބައިވެރިވުމުގައި އަދި ޗުއްޓީ ހޭދަކުރުމުގައި ސަމާލުކަން ދޭންވީ ކަންތައްތަކާ ގުޅޭގޮތުން މަޢުލޫމާތު ދޭނެކަމަށް ފުލުހުން ވިދާޅުވެއެވެ.

މި ހަރަކާތުގެ ތެރެއިން ޗައިނާ ބަހުން ތައްޔާރުކޮށްފައިވާ ލީފްލެޓެއް ފަތުރުވެރިންނަށް ދިނުމަށް ހަމަޖެހިފައިވާއިރު، ލީފްލެޓްގައި މޫދުގެ އެކި ހަރަކާތްތަކުގައި ބައިވެރިވާއިރު ފަތުރުވެރިން ސަމާލުކަންދޭންވީ ކަންކަމާއި ފަތުރުވެރިން ރާއްޖޭގައި އުޅޭއިރު ސަމާލުކަންދޭންވީ ކަންކަމުގެ އިތުރުން، ކަމެއް ދިމާވެއްޖެ ހާލަތެއްގައި އަމަލުކުރަންވީ ގޮތުގެ މައުލޫމާތާއި އިމަރޖެންސީ ހާލަތްތަކުގައި އަމަލުކުރަންވީ ގޮތުގެ މައުލޫމާތު ވަނީ ހިމަނާފައެވެ.

ޗައިނާގެ ފަތުރުވެރިންނަށް އަމާޒުކޮށްގެން މައުލޫމާތު ދިނުމުގެ ހަރަކާތެއް ފަށާފައިވާއިރު، ފަތުރުވެރިންނަށް ޚާއްސަކޮށްގެން މޫދުކުޅިވަރާއި މޫދާއި ގުޅުންހުރި އެހިނިހެން ހަރަކާތްތައް ކުރިއަށް ގެންދިއުމާއި ގުޅޭ ޤަވާއިދެއް އެކުލަވާލުމުގެ މަސައްކަތް ކުރަމުންދާ ކަމަށް ފަތުރުވެރިކަމާއި ބެހޭ ވުޒާރާއިން ވަނި ހާމަކުރައްވާފައެވެ. އަދި އެ ޤާވާއިދު ހެދެންދެން އަމަލުކުރާ މިންގަނޑެއް އެކުލަވާލައި އެއަށް އަމަލުކުރުމަށް ވުޒާރާއިން ވަނީ އަންގަވާފައެވެ.