އަމީނުއާންމާއި، ކައުންސެލް ޖެނެރަލާއި ސާޖެންޓް އެޓް އާމްސް، މަޤާމާ އަލުން ހަވާލުވެވަޑައިގެންފި

ރައްޔިތުންގެ މަޖިލީހުގެ އަމީންއާންމާއި، ކައުންސެލް ޖެނެރަލް އަދި ސާޖަންޓް އެޓް އަރމްސްގެ މަޤާމުގައި ތިއްބެވި ބޭފުޅުން އިތުރުދައުރަކަށް މަޤާމާ ހަވާލުވެވަޑައިގެންފިއެވެ. އެބޭފުޅުން އަލުން މަގާމުތަކާ ހަވާލުވެވަޑައިގެންނެވީ މިދިޔަ ހަފުތާގައި މަޖިލީހުން އެ މަޤާމުގައި ތިއްބެވި ބޭފުޅުން އިތުރުދައުރަކަށް ޢައްޔަންކުރުމަށް ފާސްކުރުމާ ގުޅިގެންނެވެ.

ރައްޔިތުންގެ މަޖިލިހުގެ ޤަވައިދު ބުނާ ގޮތުން އަލަށް އެކުލަވާލާ ކޮންމެ މަޖިލިހެއް އިންތިހާބުވެ މަސައްކަތް ފެށުމަށްފަހު، ހިނގާ ފުރަތަމަ ދެ ދައުރު ނިމުމުގެ ކުރިން އަމީން އާންމާއި ކައުންސެލް ޖެނެރަލް އަދި ސާޖެންޓް އެޓް އަރމްސްގެ މަގާމަށް ބޭފުޅަކު އައްޔަން ކުރަން ޖެހެއެވެ. އަދި ގަވައިދަށް އަމަލު ކުރަން ފެށުމަށްފަހު ހިނގާ ފުރަތަމަ ދެ ދައުރު ނިމުމުގެ ކުރިން މަޖިލިހުން އެހެން ގޮތަކަށް ކަނޑަނާޅާ ހިނދަކު، ހިނގަމުންދާ މަޖިލިހުގައި އެ ތިން މަގާމަށް ބޭފުޅުން އައްޔަން ކުރަންވާނެކަމަށްވެސް ގަވައިދުގައިވެއެވެ.

ރައްޔިތުންގެ މަޖިލީހުގެ އަމީން ޢާންމު އަލްއުސްތާޛާ ފާޠިމަތު ނިޔުޝާ، ކައުންސެލް ޖެނެރަލް އަލްއުސްތާޛާ ފާޠިމަތު ފިލްޒާ އަދި ސާޖަންޓް އެޓް އާމްސް މޭޖަރ (ރޓޑ) ޠަލްޙަތު ޙަސަން އަހުދުގެ ލިޔުމުގައި ސޮއިކުރެއްވުން pic.twitter.com/UiUB5fmggj

— People's Majlis (@mvpeoplesmajlis) December 2, 2024

މި ގަވާއިދުގެ ދަށުން، ރައްޔިތުންގެ މަޖިލީހުގެ ރިޔާސަތުން ވަނީ މިހާރުވެސް އެމަގާމުތަކުގައި ތިއްބެވި ބޭފުޅުންގެ މަގާމުގެ މުއްދަތު އިތުރު ދައުރަކަށް ދެމެހެއްޓުމަށް ވޯޓަށް އަހާފައެވެ. އަދި މަޖިލީހުން ވަނީ އަމީންއާންމުގެ މަޤާމުގައި މިހާރުވެސް ހުންނެވި ފާތިމަތު ނިއުޝާ އެ މަޤާމަށް އައްޔަންކުރުމަށް ވޯޓުގައި ބައިވެރިވި މެންބަރުންގެ އިއްތިފާގުން ފާސްކުރައްވާފައެވެ. އަދި ކައުންސެލް ޖެނެރަލްގެ މަގާމުގައި މިހާރުވެސް ހުންނެވި ފާތިމަތު ފިލްޒާވެސް އެ މަޤާމަށް އަލުން އައްޔަންކުރުމަށް ފާސްކުރައްވާފައިވާއިރު، ސާޖަންޓް އެޓް އަރމްސް ކަމަށް އެމަޤާމުގައިވެސް ކުރިން ހުންނެވި މޭޖަރ (ރޓޑ) ޠަލްހަތު ހަސަން ވަނީ ހަމަޖައްސަވާފައެވެ.

އަމީން އާންމާއި، ކައުންސެލް ޖެނެރަލާއި، ސާޖެންޓް އެޓް އަރމްސްގެ މަގާމުގެ މުއްދަތަކީ ފަސް އަހަރު ދުވަހެވެ.

މަޖިލީހުގެ ގަވައިދުގައިވާ ގޮތުން ރައްޔިތުންގެ މަޖިލިހުގެ ރައީސް އާއި ނައިބު ރައީސަށްފަހު، މަޖިލީހުގައި އެންމެ އިސް ބޭފުޅަކަށް ހުންނަވާނީ އަމީން އާންމެވެ. ކައުންސިލް ޖެނެރަލްއަކީ، ރައްޔިތުންގެ މަޖިލީހުގެ އަމީންއާންމުގެ މަގާމާ ޖެހިގެން ދެ ވަނައަށް އެންމެ އިސްވެރިޔާއެވެ.