ބޭރުގެ އިންވެސްޓަރުންނަށް ލައިސެންސް ދިނުމުގެ މަސައްކަތް އިޤްތިޞާދީ ވުޒާރާއިން ފަށައިފި
-
އަލަށް ޢަމަލުކުރަން ފެށި ފޮރިން އިންވެސްޓްމެންޓް ޤާނޫނަށް މިހާރުވަނީ އަމަލުކުރަން ފަށާފައި
އަލަށް ޢަމަލުކުރަން ފެށި ފޮރިން އިންވެސްޓްމެންޓް ޤާނޫނުގެ ދަށުން ރާއްޖޭގައި އިންވެސްޓްކުރުމުގެ ލައިސެންސް ދޫކުރުމުގެ މަސައްކަތް އިޤްތިޞާދީ ވުޒާރާއިން ފަށައިފިއެވެ.
އިންވެސްޓްމެންޓް ޤާނޫނުގެ ދަށުން ރާއްޖޭގައި އިންވެސްޓް ކުރެވޭނީ އިޤްތިޞާދީ ވުޒާރާއިން ދޫކުރާ ފޮރިން އިންވެސްޓްމެންޓް ލައިސަންސް ލިބިގެންނެވެ.
މިދިޔަ ސެޕްޓަމްބަރު މަހުގެ 3 ވަނަ ދުވަހު ރައީސުލްޖުމްހޫރިއްޔާ ތަސްދީޤުކުރައްވާފައިވާ ފޮރިން އިންވެސްޓްމެންޓް ޤާނޫނަށް ޢަމަލުކުރަން ފެށުމަށް ހަމަޖެހިފައިވަނީ އެ ބިލު ތަސްދީޤުކޮށް ގެޒެޓް ކުރާތާ 3 މަސް ދުވަހުގެ ތެރޭގައެވެ. އެގޮތުން ޤާނޫނުގެ ދަށުން އިންވެސްޓްކުރުމުގެ ހުއްދަ ހޯދުމުގެ މަރުހަލާތައް ހިމަނާފައިވާއިރު އެކަމަށް އެދި ހުށަހަޅަން ޖެހެނީ އިޤްތިޞާދީ ތަރައްޤީޢާބެހޭ ވުޒާރާއަށެވެ.
އިންވެސްޓް ކުރުމުގެ ހުއްދަ ހޯދުމުގެ މަރުހަލާތައް
- 1. އިންވެސްޓްކުރަން ޝައުޤުވެރިވާ ފަރާތްތަކުން އެކަމަށް އެދި ހުށަހެޅުން
- 2. ޝަރުތު ފުރިހަމަވާ ފަރާތްތަކަށް އިޢުތިރާޟެއް ނެތްކަމުގެ ލިޔުން ވުޒާރާއިން ދިނުން
- 3. އިންވެސްޓްކުރާ ފަރާތުގެ ވިޔަފާރި ރަޖިސްޓްރީކުރުން
- 4. ފޮރިން އިންވެސްޓްމެންޓް ލައިސަންސް ވުޒާރާއިން ދޫކުރުން
- 5. ފޮރިން އިންވެސްޓަރާއި އިޤްތިޞާދީ ވުޒާރާއާއި ދެމެދު އެއްބަސްވުމުގައި ސޮއިކުރުން
ފޮރިން އިންވެސްޓްމަންޓް ޤާނޫނުގެ މަޤުޞަދަކީ ދިވެހިރާއްޖޭގައި ކުރެވޭ ބޭރުގެ އިންވެސްޓްމަންޓްތައް އިތުރުކޮށް، އިންވެސްޓްމަންޓްތައް މެދުވެރިކޮށް ފޮރިން ކެޕިޓަލާއި، ޓެކްނޮލޮޖީއާއި ޢިލްމާއި ހުނަރު ގެނައުމަށް ފަހި މާޙައުލެއް އުފައްދައި، ދިވެހިރާއްޖޭގެ އިޤްޠިޞާދު ތަރައްޤީކުރުމަށްޓަކައި ހަރުދަނާ އުޞޫލުތަކެއް ކަނޑައެޅުމެވެ.
މި ޤާނޫނުގައި، ދިވެހިރާއްޖޭގައި ބޭރުގެ ފަރާތްތަކަށް އިންވެސްޓްކުރެވޭނެ ދާއިރާތައް ކަނޑައެޅުމާގުޅޭ އުސޫލުތަކާއި، އެފަދަ ފަރާތްތަކަށް ދިވެހިރާއްޖޭގައި އިންވެސްޓްކުރުމުގެ ހުއްދަ ދޫކުރުމާގުޅޭ އުސޫލުތަކާއި، އެފަދަ އިންވެސްޓަރުންނަށް ލިބިދެވޭނެ ޙިމާޔަތާއި ރައްކާތެރިކަމާގުޅޭ އުސޫލުތަކާއި، އެފަދަ އިންވެސްޓްމަންޓްތައް ދައުލަތަށް ނެގޭނެ ޚާއްޞަ ޙާލަތްތަކާއި އެފަދައިން ނެގޭ އިންވެސްޓްމަންޓްތަކަށް ބަދަލުދެވޭނެ އުސޫލުތަކާއި، އެނޫންވެސް ކަމާގުޅޭ އުސޫލުތައް ބަޔާންކުރައްވާފައިވެއެވެ.
މީގެއިތުރުން މި ޤާނޫނުގައި އިންވެސްޓްމަންޓް ދައުލަތަށް ނެގިދާނެ ޚާއްޞަ ޙާލަތްތަކާއި، ޤާނޫނާ ޚިލާފުވާނެ ޢަމަލުތައް ކަނޑައަޅައިފައިވެއެވެ. އަދި ސްޕެޝަލް އިކޮނޮމިކް ޒޯނުގެ ޤާނޫނު ފިޔަވައި ފޮރިން އިންވެސްޓްމަންޓާ ގުޅޭގޮތުން އެހެން ޤާނޫނެއްގައި ބަޔާންކޮށްފައިވާ އުސޫލެއް މި ޤާނޫނާ ފުށުއަރާނަމަ، އިސްކަންދޭނީ މި ޤާނޫނަށެވެ.
މި ޤާނޫނާއެކު އިންވެސްޓަރުން ރާއްޖެއަށް ކުރާ އިތުބާރު އިތުރުވެ، ބޭންކްތަކުންނާއި މާލީ އިދާރާތަކުން ފައިސާގެ އެހީ ލިބުމަށް އިތުރަށް މަގުފަހިވެގެންދާނެކަމަށް ސަރުކާރުން ވިދާޅުވެއެވެ. އަދި މި ޤާނޫނުގެ ސަބަބުން އިންވެސްޓްމަންޓް ޕްރޮޓެކްޝަން ޕްރޮމޯޝަން އެގްރީމަންޓެއް ހެދި، އެ އެގްރީމަންޓް ބަލައިގަތުމުގެ ޖާގަ ފަހިވެގެންދާނެ ކަމަށެވެ.
ދިވެހިރާއްޖޭގައި ކުރެވޭ ފޮރިން އިންވެސްޓްމަންޓާބެހޭ ޤާނޫނަކީ 01 މޭ 1979 އެކުލަވާލާފައިވާ ޤާނޫނެކެވެ. މި ޤާނޫނު ވުޖޫދަށް އައިތާ 45 އަހަރު ފަހުން، ޒަމާނީ ބަދަލެއް ގެނެވުނު މިއީ ފުރަތަމަ ފަހަރެވެ. މި ޤާނޫނަށް ޢަމަލުކުރަން ފެށުމާއެކު، ކުރިން އަމަލުކުރަމުންދިޔަ ދިވެހިރާއްޖޭގައި ކުރެވޭ ފޮރިން އިންވެސްޓްމަންޓާބެހޭ ޤާނޫނު އުވުނީއެވެ.