އިންޓެގްރިޓީ ކޮމިޝަންގެ މެންބަރުކަމަށް އިންޝާ އައްޔަންކުރަން ކޮމިޓީން ފާސްކޮށްފި

ނެޝަނަލް އިންޓެގްރިޓީ ކޮމިޝަން، އެންއައިސީގެ މެންބަރުކަމަށް އަލްއުސްތާޛާ މަރްޔަމް އިންޝާ ފައިޞަލް އައްޔަންކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ފާސްކޮށްފިއެވެ.

ނެޝަނަލް އިންޓެގްރެޓީ ކޮމިޝަންގެ މެންބަރުކަމަށް އައްޔަންކުރެއްވުމަށްޓަކައި މަރްޔަމް އިންޝާ ފައިޞަލްގެ ނަން، ރައްޔިތުންގެ މަޖިލީހަށް ރައީސުލްޖުމްހޫރިއްޔާ ފޮނުއްވީ މިދިޔަ މަހުގެ 23 ވަނަ ދުވަހުއެވެ. މި ނަން ދިރާސާކުރުމަށް ބޭއްވި ކޮމިޓީ ބައްދަލުވުމުގައި އެ މަޤާމަށް އިންޝާ އައްޔަންކުރުމަށް ފާސްވީ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާޤުންނެވެ.

އެންއައިސީއަށް އައްޔަންކުރެއްވުމަށް ރައީސުލްޖުމްހޫރިއްޔާ ނަން ފޮނުއްވާފައިވާ އިންޝާ ފައިޞަލަކީ ޤާނޫނީ ދާއިރާއިން ޑިގްރީ ޙާސިލްކުރައްވާފައިވާ ބޭފުޅެކެވެ. އޭނާ ވަނީ ކުރިން ޕޮލިސް އިންޓެގްރިޓީ ކޮމިޝަންގައިވެސް މަސައްކަތްކުރައްވާފައެވެ. އަދި އެ ކޮމިޝަން އުވާލުމަށްފަހު، ނެޝަނަލް އިންޓެގްރިޓީ ކޮމިޝަން 2015 ވަނަ އަހަރު އުފެދުމާއެކު އިންޝާ ވަނީ އެ ކޮމިޝަންގައި އިންވެސްޓިގޭޓަރެއްގެ ގޮތުގައި މަސައްކަތްކުރައްވާފައެވެ. އެގޮތުން މިއަހަރުގެ ޖެނުއަރީ މަހާ ހަމައަށްވެސް އޭނާ ހުންނެވީ އެ މަޤާމުގައެވެ. މިހާރު އިންޝާ ދަނީ މާސްޓަރސް ޑިގްރީ ޙާސިލްކުރައްވަމުންނެވެ.

އެންއައިސީގެ މެންބަރުކަމަށް އިންޝާ އައްޔަންކުރެއްވުމަށް ރައީސުލްޖުމްހޫރިއްޔާ ނަން ފޮނުއްވާފައިވަނީ އެ ކޮމިޝަންގެ މެންބަރު އަހުމަދު ޖިހާދުގެ ދައުރު ހަމަވުމާއި ގުޅިގެންނެވެ.

ނެޝަނަލް އިންޓެގްރިޓީ ކޮމިޝަންގައި 5 މެންބަރުން ތިއްބަވައެވެ. މިހާރު އެ ކޮމިޝަންގައި ތިއްބެވި މެންބަރުންނަކީ ކޮމިޝަންގެ ރައީސް ޤާސިމް ޢަބްދުލްކަރީމާއި ނައިބު ރައީސާ އާޝިޔަތު ޝިއުނާއާއި މެންބަރު އާމިނަތު ޝާދިޔާއާއި ޝުއައިބު އަބްދުއްރަޙްމާނެވެ.

ނެޝަނަލް އިންޓެގްރިޓީ ކޮމިޝަނަކީ ޤާނޫނު ތަންފީޛުކުރާ އިދާރާތަކާއި އެ އިދާރާތަކުގެ މުވައްޒަފުންކުރާ ޤާނޫނާއި ގަވާއިދާ ޚިލާފު ޢަމަލުތައް ބަލައި ތަޙުޤީޤުކުރުމާއި އެފަދަ ޢަމަލެއް ހިންގައިފިކަމަށް ތުހުމަތުކުރެވިއްޖެނަމަ، އެއްވެސް ފަރާތަކުން ހިންގައިފިކަމަށް ނުވަތަ ހިންގަން އުޅޭކަމަށް ތުހުމަތުކޮށް މައްސަލައެއް ހުށަހަޅައިފިނަމަ، އަދި ހުށަނޭޅިނަމަވެސް އަމިއްލައަށް އިސްނަގައިގެންވެސް އެކަމެއް ބަލައި ތަޙުޤީޤުކުރަން އުފައްދާފައިވާ އިދާރާއެކެވެ. އަދި މީގެ އިތުރުންވެސް ގިނަ މަސްއޫލިއްޔަތުތަކެއް އެ ކޮމިޝަނާ ވަނީ މަތިކޮށްފައެވެ.

އެންއައިސީގެ މެންބަރުކަމަށް އިންޝާ އައްޔަންކުރާނީ އެ މަޤާމަށް އޭނާ އައްޔަންކުރުމަށް ރައްޔިތުންގެ މަޖިލީހުން ފާސްކުރުމުން، ރައީސުލްޖުމްހޫރިއްޔާއެވެ.