ފަލަސްޠީނުގެ މުޖާހިދުންގެ ޖަމާޢަތް، ޙަމާސުން ރަހީނު ކޮށްފައި ތިބި އަސީރުންގެ ތެރެއިން ހަ މީހުން މަރުވެފައި ވަނީ އަމިއްލައަށް ދިން ޙަމަލާތަކެއްގައި ކަމަށް ބެލެވޭ ކަމަށް ބުނެ، ޔަހޫދީ ފައުޖުން އެ ހަ އަސީރުންގެ މަރަށް އިޢުތިރާފުވެއްޖެއެވެ. ޙަމާސުން ޔަހޫދީންގެ 250އެއްހާ މީހުން ރަހީނުކޮށްފައި ވަނީ 2023 އޮކްޓޫބަރު 7ވަނަ ދުވަހު ޒަޔަނިސްޓު އިސްރާއީލުގެ ރަށްތަކަށް އަމާޒުކޮށް ދިން ޖިހާދީ ޙަމަލާއެއްގައެވެ. އެއީ، ޔަހޫދީންގެ އަޅުވެތިކަމާއި އިސްތިޢުމާރީ ވެރިކަަމަށް ކެތް ނުކުރެވިގެން ދީފައިވާ ޙަމަލާތަކެކެވެ.
އެ ޙަމަލާގެ ބަދަލު ހިފުމުގެ ގޮތުން ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ވަނީ ލާއިންސާނީ ޖަރީމާތަކެއް ހިންގަން ފަށާފައެވެ. މީގެ 14 ވަރަކަށް މަސް ކުރިން ފެށި ޢުދުވާނުގެ ދަށުން ޝަހީދު ކޮށްލާފައިވާ މީހުންގެ އަދަދު ވަނީ 44,500އަށްވުރެ މައްޗަށް އުފުލިފައެވެ. ޔަހޫދީ ފައުޖުން ބުނީ، ފެބުރުވަރީ މަހު ޣައްޒާއަށް ދީފައިވާ ޢުދުވާނީ ޙަމަލާތަކުގައި ޙަމާސުން ރަހީނު ކޮށްފައިވާ އަސީރުންގެ ތެރެއިން ހަ މީހުން މަރުވެފައިވާ ކަމަށް ޤަބޫލު ކުރާ ކަމުގައެވެ. އެ މީހުންގެ ހަށިގަނޑު ފެނިފައި ވަނީ އޮގަސްޓު މަހުއެވެ.
ޔަހޫދީ ފައުޖުން ބުނީ، ޙަމާސް ޖަމާޢަތް ނައްތައިލުމުގެ ނަމުގައި ޙަމަލާ ދީފައިވާ ސަރަޙައްދުގެ ބިންގަރާހެއްގެ ތެރޭގައި އަސީރުންގެ ތެރެއިން ހަ މީހަކު ތިބި ކަން ކުރިން އެނގިފައި ނުވާ ކަމުގައެވެ. އަދި، އެ މީހުން މަރުވީ، ޔަހޫދީ ފައުޖުގެ ނިރުބަވެރި ޙަމަލާތަކުގެ ސަބަބުން ކަމަށް ވުމަކީ އެކަށީގެންވާ ކަމެއް ކަމުގައެވެ. ނަމަވެސް، އެ ހަ އަސީރުންގެ މަރުގެ ޒިންމާ އުފުލަން ޔަހޫދީ ފައުޖުން ވަނީ ދެކޮޅު ހަދާފައެވެ. އަދި، އެއީ ޙަމާސްގެ މުޖާހިދުން ބަޑިޖަހައި މަރައިލާފައިވާ އަސީރުންތަކެއް ކަމަށް ދެއްކުމަށް ޔަހޫދީ ފައުޖުން ވަނީ އޮޅުވައިލަން މަސައްކަތް ކޮށްފައެވެ.
އަސީރުން މިނިވަން ކުރުމަށް ގޮވައިލައި ވަކާލާތު ކުރަމުންދާ ހޮސްޓޭޖަސް އެންޑް މިސިންގ ފެމިލީޒް ފޯރަމްގެ އިތުރުން އަސީރުންގެ ޢާއިލާތަކުން ވަނީ މި ކަމާ މެދު ކަންބޮޑުވުން ފާޅުކޮށްފައެވެ. "އަސީރުންގެ ފުރާނައަށް ކޮންމެ ދުވަހަކު ވެސް، މެދުކެނޑުމެއް ނެތި ނުރައްކާވަމުންދާ ކަން ސާބިތުވެފައިވާ ކަން" ޔަހޫދީންގެ ބަޔާނުން ހާމަވެފައިވާ ކަމުގައި އެ ޖަމުޢިއްޔާއިން ބުންޏެވެ.
ޙަމާސުން ރަހީނު ކުރި އަސީރުންގެ ތެރެއިން 100އެއްހާ މީހުން މިނިވަން ކޮށްފައިވާއިރު، އެ ޖަމާޢަތުގެ ބެލުމުގެ ދަށުގައި އަދިވެސް އިތުރު 101 އަސީރުން ތިބި ކަމަށް ބެލެވެއެވެ، ޙަމާސުން ބުނީ، ޔަހޫދީންގެ ނިރުބަވެރި ޙަމަލާތަކުގައި އޭގެ ތެރެއިން 33 އަސީރުން މަރުވެފައިވާ ކަމުގައެވެ. ނަމަވެސް، އެ ކަމުގެ ޒިންމާ އުފުލަން ޔަހޫދީން ދަނީ ދެކޮޅު ހަދަމުންނެވެ.
ޙަމާސުން ރަހީނު ކޮށްފައިވާ އަސީރުންގެ ތެރެއިން އިތުރު މީހެއްގެ ހަށިގަނޑު ވެސް ޔަހޫދީ ފައުޖުން ވަނީ ހޯދާފައެވެ. އެ މީހާގެ ހަށިގަނޑު އިސްރާއީލަށް އަނބުރާ ގެންގޮސްފައިވާ ކަމުގައި ޔަހޫދީ ފައުޖުން ބުންޏެވެ. އެ މީހާ މަރުވެފައި ވަނީ ޔަހޫދީންގެ ނިރުބަވެރި ޙަމަލާތަކުގައި ކަން، ނުވަތަ ޙަމާސްގެ މުޖާހިދުންގެ އަތްދަށުގައި ކަން ސާފެއް ނޫނެވެ.
ޙަމާސުން ރަހީނު ކޮށްފައިވާ އަސީރުން މިނިވަން ކުރަން ޒަޔަނިސްޓު އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫ އެކަށީގެންވާ މަސައްކަތްތަކެއް ކުރަމުން ނުދާ ކަމަށް ބުނެ، އެތަކެއް ސަތޭކަ ހާސް ޔަހޫދީން ދަނީ އިސްރާއީލުގެ ރަށްތަކުގައި އަޑުއުފުލަމުންނެވެ. އަދި، އޭނާގެ އިސްތިޢުފާއަށް ގޮވައިލައި މެދުކެނޑުމެއް ނެތި މުޒާހަރާ ކުރަމުންނެވެ. އެ މީހުން ގޮވައިލަމުން ދަނީ، ޙަމާސް ނައްތައިލުމުގެ ނަމުގައި ޣައްޒާގެ މުސްލިމުންގެ ނަސްލުހޭދު ކުރަން ހިންގަމުންދާ ލާއިންސާނީ ޖަރީމާތައް ހުއްޓައިލުމަށް ފަހު، އަސީރުން މިނިވަން ކުރުމަށް ޙަމާސާ އެކު ސުލްޙައިގެ އެއްބަސްވުމެއް އެކުލަވައިލުމަށެވެ.
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 44,532އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 105,538 މީހުން ޒަޚަމު ކޮށްލާފައެވެ.