ސަރުކާރުގެ ރިފޯމް މަސައްކަތް ކުރުމަށް ޚާއްސަ އޮފީހެއް ޤާއިމްކުރަނީ

ދައުލަތުގެ މާލީ ކަންކަން ހަރުދަނާ ކުރުމަށް، ބޭނުންވާ މަސައްކަތް ކުރުމަށް ރީފޯމް އޮފީހެއް ޤާއިމް ކުރުމުގެ މަސައްކަތް މާލީ ވުޒާރާއިން ފަށްޓަވައިފިއެވެ.

ރީފޯމް އޮފީސް ޤާއިމްކުރުމުގެ މަޤްޞަދަކީ ދައުލަތު މާލީކަންކަން ހަރުދަނާ ކުރުމަށް، ޚަރަދުކުޑަކޮށް، އާމްދަނީ އިތުރުކުރުމަށް ސަރުކާރުން ގެންނަން ނިންމާފައިވާ އިސްލާހީ ބަދަލުތައް ތަންފީޒު ކުރުމުގެ މަސައްކަތް ކުރުމެވެ.

މާލީ ވުޒާރާއިން ވިދާޅުވީ، ރީފޯމް މަސައްކަތް މިހާރުވެސްފެށިގެން ކުރިއަށްދާ ކަމަށާއި، ރީފޯމް އޮފީހާއެކު ރިފޯމް ހުރިހާ މަސައްކަތެއް އެއް ހަމައެއްގައި ކުރިއަށް ގެންގޮސް އެކަމުގެ މަޢުލޫމާތު ރައްޔިތުންނަށް ފޯރުކޮށްދެވޭނެ ކަމަށެވެ. އަދި މިއާއެކު ސަރުކާރުން ކަނޑައަޅާފައިވާ އަމާޒުތައް ހާސިލްކުރުމަށް ފަސޭހަވާނެ ކަމަށްވެސް މާލީ ވުޒާރާއިން ވިދާޅުވިއެވެ.

ރީފޯމް އޮފީސް ޤާއިމް ކުރުމުގެ މަސައްކަތް ފަށާފައިވާއިރު، އެ އޮފީހުގެ މަސައްކަތް ހިންގުމަށް ކޮމިޝަނަރެއް ހޯދުމަށް މާލީ ވުޒާރާއިން ވަނީ އިއުލާންކޮށްފައެވެ. މިމަގާމަށް ޝައުގުވެރިކަން ފާޅުކުރުމުގެ ފުރުސަތު މިމަހުގެ 8 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.

ރީފޯމް ކޮމިޝަނަރުގެ މަގާމަށް ކުރިމަތިލާ މީހެއްގައި ހުންނަން ޖެހޭ ޝަރުޠުތަކުގެ ތެރޭގައި އެކައުންޓިން އެންޑް ފައިނޭންސިން ދާއިރާއިން ޑިގްރީ ނުވަތަ އެއަށްވުރެ މަތީ ފާސް ހާސިލް ކޮށްފައިވުމާއި، މިދާއިރާގައި 10 އަހަރުގެ ތަޖުރިބާ ހުރުން ހިމެނެއެވެ.

ރީފޯމް ކޮމިޝަނަރުގެ މަސްއޫލިއްޔަތުތަކުގެ ތެރޭގައި އިސްލާޙީ ބަދަލުތަކުގެ އިސްތިރާޖުތައް އެކުލަވާލުމާއި، ސަރުކާރު ހިއްސާވާ ކުންފުނިތަކާއި އަދި ފިސްކަލް ރިފޯމުތައް ކުރިއަށްދާ ގޮތުގެ ރިޕޯޓުތައް އެކުލަވާލައި އެކަމާ ގުޅޭ ފްރޭމްވޯކްތައް އެކުލަވާ ރޭވުމުގެ މަސައްކަތް ހިމެނެއެވެ.