ސޫރިޔާގެ ސަރުކާރާއި އަސްކަރިއްޔާއާ ދެކޮޅަށް ހަނގުރާމަ ކުރަމުންދާ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ހަނގުރާމަވެރިން އެ ޤައުމުގެ ހުޅަނގުގައި އޮތް ޙަމާއަށް އަތްގަދަ ކޮށްފިއެވެ. އެޗްޓީއެސްގެ ހަނގުރާމަވެރިން އެ ރަށަށް ވެރިވެގަނެފައި ވަނީ، ހުޅަނގުއުތުރުގައި އޮންނަ ޙަލަބު ޕުރޮވިންސަށް އަތްގަދަ ކުރަން ނޮވެންވަރު 27ވަނަ ދުވަހު ފެށި ޢުދުވާނުގެ ދަށުންނެވެ. ޙަލަބު ޕުރޮވިންސުގެ ބޮޑު ސަރަޙައްދެއްގެ މި ވަގުތު އޮތީ އެޗްޓީއެސްގެ ބާރުގެ ދަށުގައެވެ. އޭގެ ތެރޭގައި ވެރިރަށް ޙަލަބް ސިޓީއާއި އެ ރަށުގެ މައި ވައިގެ ބަނދަރު ވެސް ހިމެނެއެވެ.
އެޗްޓީއެސްގެ ހަނގުރާމަވެރިން ޙަމާއަށް އަތްގަދަ ކުރުމަކީ، ރައީސް ބައްޝާރް އަލް-އަސަދާއި އޭނާގެ ސަރުކާރަށް ވާގިވެރިވަމުންދާ ރަޝިޔާއާއި އީރާނުގެ ފައުޖުތަކަށް ކުރިމަތިވި ވަރަށް ބޮޑު ނާކާމިޔާބީއެވެ. ހަނގުރާމަވެރިން އަތްގަދަ ކޮށްފައިވާ ޙަލަބުގެ ރަށްތަކާއި އަވަށްތައް މިނިވަން ކުރުމަށް ސޫރިޔާގެ އަސްކަރިއްޔާއާއި ރަޝިޔާ ގުޅިގެން ދަނީ މަސައްކަތް ކުރަމުންނެވެ. އަދި، ހަނގުރާމަވެރިން އަމާޒުތަކަށް ވައިގެ ޙަމަލާތައް ދެމުންނެވެ.
2011ވަނަ އަހަރު ސޫރިޔާގައި ފެށިގެން ދިޔަ އަހުލީހަނގުރާމައިގެ ދަށުން ބަދަލު ކުރަމުން ގޮސްފައިވާ ޙަމަލާތައް މެދުކަނޑައިލާފައި ވަނީ 2020ވަނަ އަހަރުގެ މާރިޗު މަހުއެވެ. ޙަމަލާ ބަދަލު ކުރުން މެދުކަނޑައިލާފައި ވަނީ، އަސަދުގެ ސަރުކާރަށް ވާގިވެރިވަމުން ދިޔަ ރަޝިޔާއާއި، ހަތިޔާރުއެޅި ޖަމާޢަތްތަކަށް އެހީތެރިކަން ފޯރުކޮށްދެމުން ދިޔަ ތުރުކީވިލާތާ ދެމެދު ވެވުނު އެއްބަސްވުމެއްގެ ދަށުންނެވެ. ނަމަވެސް، މި ވަގުތު ޙަލަބު ޕުރޮވިންސުގެ އިތުރުން ޙަމާއަށް ވެރިވެގަނެފައިވާ އެޗްޓީއެސަކީ ތުރުކީވިލާތުން ވާގިވެރިވާ ޖަމާޢަތެއް ނޫނެވެ.
ޙަމާއަކީ މީގެ ކުރިން ހަނގުރާމަވެރި ޖަމާޢަތްތަކުން އަތްގަދަ ކޮށްފައިވާ ރަށެއް ނޫނެވެ. އެ ރަށަށް އެޗްޓީއެސްގެ ހަނގުރާމަވެރިން އަރައިގަނެފައި ވަނީ ފާއިތުވި ދެ ދުވަހުގެ ތެރޭގައި އެ ރަށުގައި ތިބި ސިފައިންނަށް ނުރައްކާތެރި ޙަމަލާތަކެއް ދިނުމަށް ފަހުއެވެ. ސޫރިޔާގެ އަސްކަރިއްޔާއިން ބުނީ، އެ ރަށުގައި ދިރިއުޅޭ ރައްޔިތުންގެ ފުރާނަ ދިފާޢު ކުރުމަށް ފިޔަވަޅުތައް އަޅަމުންދާ ކަމުގައެވެ. އަދި، ރަށު ތެރޭގައި އެޗްޓީއެސާ ދެމެދު ޙަމަލާ ބަދަލު ކުރަން ބޭނުން ނުވާ ކަމަށާއި، ރަށްބޭރު ސަރަޙައްދުތަކުގައި އަސްކަރިއްޔާގެ ސިފައިން ހަރަކާތްތެރިވަމުންދާ ކަމުގައެވެ.
ޙަމާއަށް އަތްގަދަ ކުރުމަށް ފަހު އެޗްޓީއެސްގެ ހަނގުރާމަވެރިން ދަނީ އުފާފާޅު ކުރަމުންނެވެ. އެ ރަށުގެ ޖަލުތަކުގައި ހައްޔަރު ކޮށްފައި ތިބި ކުށްވެރިން އެޗްޓީއެސުން މިނިވަން ކޮށްފައިވާ ކަމުގައި ވެސް މަސްރަޙު ދިރާސާ ކުރާ ފަރާތްތަކުން ބުންޏެވެ. މިނިވަން ކޮށްފައިވާ ގިނަ މީހުންނަކީ، ހަނގުރާމަވެރި ޖަމާޢަތްތަކަށް ނިސްބަތްވާ މީހުންނެވެ.
އެޗްޓީއެސުން ބުނީ، ޙަމާއަށް އަތްގަދަ ކުރުމަށް ފަހު، އެ މީހުން ދެން މިސްރާބު ޖަހާނީ ދެކުނުގައި އޮތް ޙުމްޞަށް ކަމުގައެވެ. އެއީ، ސޫރިޔާގެ އުތުރުގައި އޮތް ވެރިރަށް ދިމިޝްޤާއި އައްސޭރިފަށުގެ ސަރަޙައްދުތަކުގެ މެދުގައި އޮތް މައި ރަށެވެ. އެ މީހުންނާ ބައިވެރިވެ، ޙުމްޞު ހިފުމަށް ހަނގުރާމަ ކުރުމުގައި ބައިވެރިވުމަށް އެޗްޓީއެސުން ވަނީ ޙަމާގެ ރައްޔިތުންނަށް ވެސް ގޮވައިލާފައެވެ.
މަސްރަޙު ދިރާސާ ކުރާ ފަރާތްތަކުން ބުނީ، އެޗްޓީއެސްގެ ހަނގުރާމަވެރިންނަށް ފަސޭހަކަމާ އެކު ޙަލަބުގެ އިތުރުން ޙަމާއަށް އަތްގަދަ ކުރެވިފައި ވަނީ، އެ ސަރަޙައްދުތަކުގައި ހަރަކާތްތެރިވަމުން ދިޔަ ޙިޒްބުاللهގެ މެންބަރުން ބަލިކަށިވެފައިވުމުން ކަމަށް ބެލެވޭ ކަމުގައެވެ. ޙިޒްބުاللهއަކީ ލުބްނާންގެ މުޖާހިދުންގެ ޖަމާޢަތެކެވެ.
ސެޕްޓެންބަރު 23ން ނޮވެންބަރު 27އާ ދެމެދު ޔަހޫދީ ފައުޖުން ލުބްނާންގެ މުސްލިމުންގެ ނެސްލުހޭދު ކުރަން ހިންގަމުން ދިޔަ ލާއިންސާނީ ޢުދުވާނާ ގުޅިގެން އެ ޤައުމު ދިފާޢު ކުރުމަށް ސޫރިޔާގައި ތިބި ޙިޒްބުاللهގެ ގިނަ އަދަދެއްގެ މުޖާހިދުން ވަނީ އެނބުރި ވަޒަނަށް ދަތުރު ކޮށްފައެވެ. ނަމަވެސް، ޙިޒްބުاللهގެ ވެރިޔާ ނަޢީމް ޤާސިމް ވިދާޅުވީ، ހަނގުރާމަވެރިންގެ އަތްދަށުން ސޫރިޔާ މިނިވަން ކުރުމަށް އެ ޖަމާޢަތުން އަސަދުގެ ސަރުކާރަށް ވާގިވެރިވުމުގައި ދެމި އޮންނާނެ ކަމުގައެވެ.
މީގެ އިތުރުން، އަސަދުގެ ސަރުކާރާއި އަސްކަރިއްޔާއަށް ވާގިވެރިވަމުން ދިޔަ ރަޝިޔާއިން ވެސް މި ވަގުތު އުޅެނީ ޔޫކްރެއިނާ ދެކޮޅަށް ކުރަމުންދާ ހަނގުރާމައިގައި ޝާމިލުވެއެވެ. 2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ރަޝިޔާއިން ޔޫކްރެއިނާ ދެކޮޅަށް ހަނގުރާމަ ފެށި ފަހުން، ސޫރިޔާއަށް ފޯރުކޮށްދެމުން ދިޔަ އަސްކަރީ އެހީގެ މިންވަރު ދަށްވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުންޏެވެ. ނަމަވެސް، އަސަދުގެ ސަރުކާރާއި އަސްކަރިއްޔާއަށް ބޭނުންވާ ހަތިޔާރާއި އަސްކަރީ އެހީތެރިކަން ފޯރުކޮށްދިނުމަށް މަސައްކަތް ކުރަމުންދާ ކަމުގައި ރަޝިޔާއިން ބުންޏެވެ.