ދެކުނު ކޮރެޔާގައި އަނެއްކާ ވެސް ކުއްލިހާލަތު އިޢުލާނުކުރަން އުޅޭ ވާހަކަތައް ސަރުކާރުން ދޮގުކުރިޔަސް، ރައީސް ޔޫން ސުކް ޔޯލް މަޤާމުން ދުރުކުރަންޖެހޭ ކަމަށް، ޔޫން ނިސްބަތްވެވަޑައިގަންނަވާ ވެރިކަން ކުރާ ޕާޓީން ބުނެފިއެވެ.
މުޅި ދުނިޔެ ސިއްސުވާލައި، ޑިސެމްބަރ 3 ވަނަ ދުވަހު ޔޫން ކުއްލިހާލަތު އިޢުލާނު ކުރެއްވީ، އިދިކޮޅު ޕާޓީތަކުން ދައުލަތާ ދެކޮޅަށް މަސައްކަތް ކުރަމުންދާތީ އެ ކަން ހުއްޓުވަން ކަމަށް ވިދާޅުވެއެވެ. އެކަމަކު ކުއްލިހާލަތު އިޢުލާނު ކުރެއްވިތާ، ހަ ގަޑިއިރު ތެރޭގައި އެ ނިންމުން ޔޫން ބާތިލުކުރެއްވީ، އަމިއްލަ ޕާޓީގެ ބައެއް މެންބަރުންގެ ވެސް ތާއީދާ އެކު، ކުއްލިހާލަތު އުވާލަން ޤާނޫނު ހަދާ މަޖިލީހުން ފާސްކުރުމުންނެވެ.
ކުއްލިހާލަތު އުވާލެއްވިޔަސް، ޔޫން މަޤާމުން ދުރުކުރަން އިދިކޮޅު ފަރާތްތަކުން އިސްވެ ހުށަހަޅާފައިވާ އިތުބާރުނެތް ކަމުގެ މައްސަލައިގެ ވޯޓު ހޮނިހިރު ދުވަހުގެ ހަވީރަށް ވަނީ ތާވަލުކޮށްފައެވެ. އެ މައްސަލައަށް ހުރަސްއަޅަން އަނެއްކާވެސް ކުއްލިހާލަތު އިޢުލާނުކޮށްފާނެކަމުގެ ބިރަށް، އިދިކޮޅު ބައެއް މެންބަރުން މަޖިލީހުގެ ތަޅުމުން ނުނިކުންނަވައި އެބަ ތިއްބެވިއެވެ. އެކަމަކު، އަނެއްކާވެސް ކުއްލިހާލަތު އިޢުލާނުކުރަން އުޅޭ ކަމަށް ބުނެ ދެކެވޭ ވާހަކަތައް، ވަގުތީ ދިފާޢީ ވަޒީރު ކިމް ސޮން-ހޯ ވަނީ ދޮގުކުރައްވައިފައެވެ.
ޤާނޫނު ހަދާ މަޖިލީހުގައި ބޭއްވި ވެރިކަންކުރާ ޕީޕަލް ޕަވަރ ޕާޓީ (ޕީޕީޕީ)ގެ ބައްދަލުވުމަކަށްފަހު، އެ ޕާޓީގެ ވެރިޔާ ހަން ޑޮންގް-ހޫން ނޫސްވެރިންނަށް ވިދާޅުވީ، ކުއްލިހާލަތުގައި ސިޔާސީ އިސް ވެރިން ހައްޔަރުކުރަން ޔޫން މަސައްކަތް ކުރެއްވި ކަމަށެވެ. އެކަމަކު އެ ތުހުމަތުތައް ވެސް ރައީސް އޮފީހުން މީގެކުރިން ވަނީ ދޮގުކޮށްފައެވެ.
ހަން މީގެކުރިން ވިދާޅުވި ގޮތުގައި، ޔޫން މަޤާމުގައި ހުންނަވައިފިނަމަ، "ކުއްލިހާލަތު އަނެއްކާވެސް އިޢުލާނުކުރުން ފަދަ ހަރުކަށި ފިޔަވަޅެއް އެޅުމުގެ ނުރައްކާ ބޮޑު" ކަމަށާއި، އެފަދަ ކަމަކުން ޤައުމު ނުރައްކަލެއްގެ ތެރެއަށް ވެއްޓޭނެއެވެ.
ޔޫން އާ ދެކޮޅަށް ހުށަހަޅާފައިވާ އިތުބާރު ނެތް ކަމުގެ މައްސަލައަށް ތާއީދުނުކުރާނެ ކަމަށް އިއްޔެ ބުނުމަށްފަހު، ޕީޕީޕީގެ ރާގު ކުއްލި ގޮތަކަށް ބަދަލުވެފައިމިވަނީ، ކުއްލިހާލަތުގެ ތެރެއިން ސިޔާސީ ބައެއް ލީޑަރުން ހައްޔަރުކުރަން ޔޫން މަސައްކަތް ކުރެއްވި ކަމުގެ ހެކި ހުރި ކަމަށް ހަން ވިދާޅުވި ފަހުންނެވެ.
"ދެކުނު ކޮރެޔާ އާއި މި ޤައުމުގެ ރައްޔިތުން ރައްކާތެރިކުރެވޭނީ، ރައީސް ޔޫން ސުކް ޔޯލް މަޤާމުން ސަސްޕެންޑުކޮށްގެން ކަމަށް އަޅުގަނޑު ޤަބޫލުކުރަނީ،" ހަން ވިދާޅުވިއެވެ.
އެކަމަކު އިދިކޮޅުން ހުށަހަޅާފައިވާ އިތުބާރު ނެތް ކަމުގެ މައްސަލައަށް ޕީޕީޕީން ތާއީދުކުރާނެތޯ ނޫސްވެރިން ތަކުރާރުކޮށް ސުވާލުކުރުމުން ވެސް، ހަން ސީދާ ޖަވާބެއް ނުދެއްވައެވެ.
ރައީސްގެ މައްޗަށް އިތުބާރު ނެތް ކަމުގެ މައްސަލައެއް ކާމިޔާބު ކުރަން، 300 މެންބަރުންގެ މައްޗަށް އެކުލެވޭ ޤާނޫނު ހަދާ މަޖިލީހުގެ ތިން ބައި ކުޅަ ދެ ބައިގެ އަޣުލަބިއްޔަތު ބޭނުންވެއެވެ. މަޖިލީހުގައި ޕީޕީޕީގެ ޖުމްލަ 108 މެންބަރުން ތިބި އިރު، ޔޫން މަޤާމުން ދުރުކުރަން، ޕީޕީޕީގެ މަދުވެގެން އަށް މެންބަރުންގެ ތާއީދު އިދިކޮޅު ފަރާތްތަކުން ހޯދަންޖެހޭނެއެވެ.