ޚަރަދުކުޑަކުރުމަށް އާސަންދަ ޕޯޓަލްއަށް ބަދަލު ގެންނަނީ

އާސަންދައިގެ ޚަރަދު ކުޑަކުރުމަށްޓަކައި އާސަންދަ ޕޯޓަލްއަށް ބަދަލުތަކެއް ގެންނަމުންދާކަމަށް އާސަންދައިން ވިދާޅުވެއްޖެއެވެ.

އާސަންދަ ޚިދުމަތުގެ ތެރެއިން އިސްރާފުގެ ބައި ބޮޑުވުމަކީ މުޅި ނިޒާމުގެ ޚަރަދު ބޮޑުވާ އެއް ސަބަބުކަމަށް އާސަންދައިން ވިދާޅުވެއެވެ.

އާސަންދައަކީ ހެލްތު އިންޝުއަރެންސްގެ ޤައުމީ ނިޒާމެވެ. ކޮންމެ ދިވެއްސަކަށް ހުސްނުވާ އާސަންދަ މެދުވެރިކޮށް ޚިދުމަތްދިނުމަށް ވޭތުވެދިޔަ ތަނުގައި މަސައްކަތް ބައްޓަންކޮށްފައިވަނީ އެންމެ އެކަށީގެންވާ ގޮތަށް ނޫންކަމުގެ ކަންބޮޑުވުން ކަމާ ބެހޭ އިދާރާތަކުންދަނީ ފާޅުކުރައްވަމުންނެވެ. މީގެ ނަތީޖާއަކީ އާސަންދައަށް ކަނޑައަޅާ ބަޖެޓުން ދެކޮޅު ނުޖެހިގެން އަލުން ބަޖެޓު ހޯދައިގެން ބޭސްފަރުވާއަށް ޚަރަދުކުރުމުގެ އާދަ އަށަގަތުމެވެ. އެގޮތުން އަހަރަކު 3 ބިލިއަނާ ގާތްކުރާ ޢަދަދަކަށް ދައުލަތުގެ ބަޖެޓުން އާސަންދައަށްދަނީ ހޭދަކުރަމުންނެވެ. މިކަން ޙައްލުކޮށް ދެކޮޅުޖެހޭ ނިޒާމަކަށް އާސަންދަ ބަދަލުކޮށް އެންމެ ބޭނުންވާ މީހުންނަށް އާސަންދަ ޚިދުމަތްދިނުމަށް މިހާރުވަނީ މަސައްކަތް ފައްޓަވާފައެވެ.

މިޚަރަދުތައް ކުޑަކުރުމަށް އާސަންދައިން ކުރައްވަމުންދާ މަސައްކަތްތަކާ ގުޅޭގޮތުން އާސަންދަ ކުންފުނީގެ މެޑިކަލް އިންވެސްޓިގޭޝަން ސެކްޝަންގެ މެނޭޖަރ މަރްޔަމް ފިޔާޒާ ވިދާޅުވީ، އެންމެ ބޮޑު އެއް ބަދަލުގެ ގޮތުގައި އާސަންދަ ޕޯޓަލް އަޕްގްރޭޑްކުރުމުގެ މަސައްކަތް ކުރަމުންދާކަމަށެވެ.

"އަސަންދަ ޕޯޓަލްއަށް ބަދަލުތަކެއް ގެންނަމުންދަނީ ޚަރަދު ކުޑަކުރުމަށް. މިހާރު އެބަހެދޭ ޓެސްޓުތައްވެސް ތަކުރާރުކޮށް. އެކަންވެސް މިހާރު ސިސްޓަމަށް ގެންނަމުންދާ ބަދަލުތަކާއެކު ހައްލުކުރެވޭނެ. މިހާރު ސިސްޓަމުން ނުފެންނާނެ ޓެސްތުތަކުގެ ނަތީޖާ އެހެންވީމަ ފަރުދީ ޒިންމާވެސް މީގައެބަ އޮތް. ޑޮކްޓަރަށްދާއިރު ޓެސްޓުތަކުގެ ނަތީޖާ ހިފައިގެންދިޔުމަކީ މުހިންމުކަމެއް." ފިޔާޒާ ވިދާޅުވިއެވެ.

އާސަންދަ ޕޯޓަލް މެދުވެރިކޮށް ތަކުރާރުކޮށް ބޭސްތައް ނަގާނަމަ، އެކަން މިހާރު ފާމަސީއަށް އެނގޭނެކަމަށް އާސަންދައިން ވިދާޅުވެއެވެ. އަދި ބޭސް ތަކުރާރުކޮށް ނަގަންޖެހޭ ސަބަބުތައް ސިސްޓަމްގައި ލޮގްކުރަމުންދާންޖެހޭނެކަމަށް އާސަންދައިން ވިދާޅުވެއެވެ. އަދި ހަމައެއާއެކު ބޭސް ދޫކުރެވެނީ ކާކަށްކަން ކަށަވަރުކުރުމަށް ޑިސްޕެންސް ކޯޑެއް ދޫކުރަމުންދާނެކަމަށް އާސަންދައިން ވިދާޅުވެއެވެ. ޑިޕެންސް ކޯޑާ ނުލާ ފާމަސީތަކަށް ބޭހުގެ ޓްރާންސެކްޝަންސްތައް މިހާރު ނުހެދޭނެކަމަށް އާސަންދައިން ވިދާޅުވެއެވެ. އެހެންކަމުން އެހެން މީހުން މެދުވެރިކޮށް ބޭސް ނެގިނަމަވެސް ބޭސް ނެގީކާކުކަން އާސަންދައިން ބަލަމުންދާތީ ބަލި މީހާއަށް ބޭސް ނުލިބޭ ޙާލަތްތަކުގައި އެމައްސަލަ ބެލޭނެ އިންތިޒާމުވަނީ ހަމަޖެހިފައެވެ.

ހަމައެއާއެކު އާސަންދައިގެ ޚަރަދުތައް ކުޑަކުރުމަށް، ފަރުދީ ޒިންމާ މުހިންމުކަން އެކުންފުނިން ފާހަގަކުރައްވައެވެ. އެގޮތުން ޑޮކްޓަރަށް ދެއްކުމަށް މެމޯ ހެއްދުމަށްފަހު އެއްވެސް ހާލެއްގައި ޑޮކްޓަރަށް ނުދެވި ހުއްޓާ އާސަންދަ ޕޯޓަލްއިން ޓްރާންސެކްޝަނެއް ހެދިކަމުގެ އެސްއެމްއެސްއެއް ލިބިއްޖެނަމަ އެކަން އާސަންދައަށް ރިޕޯޓުކުރުމަށް އާސަންދައިން އިލްތިމާސްކުރެއެވެ.

އެޕޮއިންޓްމަންޓް ޓްރާންސެކްޝަން ކެންސަލްވީކަން އެންގުމަށްވެސް ޕޯޓަލްއިން އެސްއެމްއެސްއެއް ދާނެކަމަށް އާސަންދައިން ފާހަގަކުރައްވައެވެ. ހަމައެއާއެކު ޑޮކްޓަރަށް ދެއްކުމަށްދާއިރު ބޭސް ސިޓީތަކާއި، ޓެސްޓުތަކުގެ ނަތީޖާތައް ހިފައިގެން ދިޔުމުން، ބޭސްތަކުރާރުކޮށް ދޫކުރުމުގެ މައްސަލައާއި ތަކުރާރުކޮށް ޓެސްޓުތައް ހެދުމުގެ މައްސަލަ ހައްލުވާނެކަމަށް އާސަންދައިން ވިދާޅުވެއެވެ.

އާސަންދައަށް ދައުލަތުން ކޮންމެ އަހަރަކު ބޮޑު ހޭދައެއް ކުރަމުންދާއިރު މިއީ ދެކޮޅުޖެހޭ ނިޒާމަކުން ކުރެވޭކަމަކަށް ހަދަންޖެހެއެވެ. ރައްޔިތުންނަށް ލުއިފަސޭހަކޮށްދިނުމަށް ސަބްސިޑީ ދެމުންދާއިރު އެކަމުގައި ޒިންމާދާރުވުމަކީ ކޮންމެ ރައްޔިތެއްގެވެސް ޒިންމާއެއްކަމުގައި ޤަބޫލުކުރަންޖެހެއެވެ.