މުޅި އައްޑޫ ސިޓީގެ ސީސީޓީވީ މޮނިޓަރ ކުރެވޭގޮތަށް ފުލުހުންގެ ދެކުނު ކޯޑިނޭޝަން ސެންޓަރު ހުޅުވައިފި

މުޅި އައްޑޫ ސިޓީގެ ހުރިހާ ރަށެއްގެ ސީސީޓީވީ ކެމެރާތައް ބެލޭގޮތަށް ފުލުހުންގެ ދެކުނުގެ ކޮމިއުނިކޭޝަން އެންޑް ކޯޑިނޭޝަން ސެންޓަރުގެ މަސައްކަތްތައް ފަށައިފިއެވެ. މި ސެންޓަރު ހުޅުއްވައި ދެއްވީ ކޮމިޝަނަރ އޮފް ޕޮލިސް ޢަލީ ޝުޖާޢުއެވެ.

ދެކުނުގެ ސަރަހައްދުގެ ކޮމިއުނިކޭޝަން އެންޑް ކޯޑިނޭޝަން ސެންޓަރަކީ ފުލުހުންގެ ސައުތު ރީޖަން ކޮމާންޑުގައި ހިމެނޭ ގއ. ގދ އަތޮޅު އިތުރުން ފުވައްމުލަކު ސިޓީ އަދި އައްޑޫ ސިޓީގެ ފުލުހުންގެ ޚިދުމަތަށް ޚާއްސަ ކޮށްގެން ޤާއިމް ކުރެވިފައިވާ ސެންޓަރެކެވެ. އެގޮތުން މި ސެންޓަރު ޤާއިމްވެގެން ދިއުމާއެކު މި ސަރަހައްދުގެ ރައްޔިތުންނަށް ފުލުހުންގެ ޚިދުމަތް ހޯދުމަށާއި، މައުލޫމާތު ސާފުކޮށް ފުލުހުންނަށް ދޭން ބޭނުންވާ މައުލޫމާތު ފޯރުކޮށްދިނުމުގައި ފަސޭހަ ވެގެންދާނެ ކަމަށް ފުލުހުން ވިދާޅުވެއެވެ.

ސައުތު ޕޮލިސް ރީޖަންގައި ހިމެނޭ ހުރިހާ ރަށެއްގެ ފުލުހުންގެ ޚިދުމަތް ގުޅުވާލުމުގެ އިތުރުން، މި ސެންޓަރުން އައްޑޫ ސިޓީގައި މިހާރު ގާއިމްކޮށްފައިވާ ސީސީޓީ ކެމެރާތައް މޮނިޓަރ ކުރެވޭނެއެވެ. އެގޮތުން އައްޑޫގެ ގުޅިފައިވާ ރަށްތަކުގެ އިތުރުން ވަކިން އޮންނަ ހުޅުދޫ އާއި މީދޫގައި ގާއިމް ކޮށްފައިވާ ކެމެރާތައް މިސެންޓަރު މެދުވެރިކޮށް ބަލާލެވޭނެ ކަމަށް ފުލުހުން ވިދާޅުވެއެވެ.

އައްޑޫ ސިޓީގައި ޤާއިމް ކޮށްފައިވާ ފުލުހުންގެ ނޭޝަނަލް ކޮލެޖް އޮފް ޕޮލިސިންގް އެންޑް ލޯ އެންފޯސްމަންޓުގައި ބޭއްވި ރަސްމިއްޔާތެއްގައި މިސެންޓަރު ހުޅުއްވައި ދެއްވުމަށް ފަހު ޕީއެސްއެމްއާއި ވާހަކަ ދައްކަވަމުން ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ މި ސެންޓަރަކީ މާލޭ ސަރަހައްދުން ބޭރުގައި ޤާއިމް ކުރެވޭ މިފަދަ ފުރަތަމަ ސެންޓަރު ކަމަށެވެ. އަދި މި ސެންޓަރުގެ ބޭނުމަކީ ރައްޔިތުންނާއި ވީހާވެސް ގާތުން ޚިދުމަތް ދިނުން ކަމަށް ކޮމިޝަނަރ ވިދާޅުއެވެ.
އަދި މި ސެންޓަރާއެކު އައްޑޫގައި ގާއިމްކުރެވިފައިވާ 300 އަށްވުރެ ގިނަ ސީސީޓީވީ ކެމެރާ، މެދުވެރިކޮށް މުޅި އައްޑޫސިޓީ 24 ގަޑިއިރު ބެލެހެއްޓޭނެ ކަމަށްވެސް ސީޕީ ޝުޖާޢު ވިދާޅުވިއެވެ.

"މިއީ 24 ގަޑިއިރު ޚާއްސަކޮށް އައްޑޫ ސިޓީ ބެލެހެއްޓިގެންދާނެ ސެންޓަރެއް މި ސެންޓަރަކީ. އަޅުގަނޑުމެންގެ މުވައްޒަފުން މިތަނުގައި 24 ގަޑިއިރު މަސައްކަތް ކުރާނެ. ކޮންމެ ވަގުތަކުވެސް އަޅުގަނޑުމެންނަށް ޝައްކުކުރެވޭ ކަމެއް މިކެމެރާތަކުގެ އެހީގައި އައިޑެންޓިފައި ކުރެވިއްޖެނަމަ، އެހިސާބުން ފެށިގެން ފުލުހުންގެ މަސައްކަތް ފެށިގެންދާނެ. އެއީ ކޮންކަމެއްތޯ ބަލާ އެތަނަށް ދޭންޖެހޭ ރެސްޕޮންސް ދިނުމުގައި މިތަން މުހިންމު ދައުރެއް އަދާކުރާނެ. " ކޮމިޝަނަރ ޝުޖާޢު ވިދާޅުވިއެވެ.

މި ސެންޓަރު ހުޅުވުމާއި ގުޅިގެން ފުލުހުންގެ ސައުތު ޑިވިޝަން ކޮމާންޑަރ އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝަމީމް ވިދާޅުވީ މި ސެންޓަރުގެ ސަބަބުން ފުލުހުންނާއި ރައްޔިތުންގެ މެދުގައި އޮންނަ އިތުބާރު އިތުރުވެގެންދާނެ ކަމަށެވެ.

"ސެންޓަރަށް ގުޅާ ފަރާތެއްގެ މައުލޫމާތު އެ ފަރާތަކުން ސިއްރުކުރަން ބޭނުންނަމަ އެގޮތަށްވެސް މައުލޫމާތު ފޯރުކޮށްދެވޭނެ. އެހެންވީމަ ފުލުހުންނާއި ރައްޔިތުން ދެމެދު އޮންނަ އިތުބާރާއި ޔަޤީންކަމަށް މި ސެންޓަރުގެ ސަބަބުން ފަހިކަމެއް އަންނާނެ." ޝަމީމް ވިދާޅުވިއެވެ.

މާލެ ސަރަހައްދުން ބޭރުގައި ޤާއިމްކުރެވިގެން ދިޔަ ފުރަތަމަ ކޯޑިނޭޝަން ސެންޓަރުގެ ސަބަބުން ފުލުހުން ރައްޔިތުންނަށް ދޭ ޚިދުމަތް އަވަސްވާނެ ކަމަށް ފުލުހުން ވިދާޅުވެއެވެ. ކުރިއަށް އޮތްތަނުގައި މިފަދަ ސެންޓަރުތައް ރާއްޖޭގެ އެހެން ސަރަހައްދުތަކުގައިވެސް ގާއިމްކޮށް ފުލުހުން ޚިދުމަތް ލާމަރުކަޒު ކުރުމަކީ އަމާޒެއް ކަމަށް ފުލުހުން ވަނީ ވިދާޅުވެފައެވެ.