ސޫރިޔާގެ ވެރިރަށް ދިމިޝްޤުގައި ހުންނަ އީރާނުގެ އެންބަސީއަށް ޙަމަލާ ދީފިއެވެ. އީރާނުގެ ދައުލަތުގެ ޓީވީން ބުނެފައި ވަނީ ދިމިޝްޤުގައި ހުންނަ އީރާނުގެ އެންބަސީއަށް ޙަމަލާ ދީފައި ވަނީ ސޫރިޔާގެ ރައީސް ބައްޝާރު އަލް-އަސަދުގެ ވެރިކަން ވެއްޓުނު ފަހުން ކަމަށެވެ. އީރާނަކީ އަސަދުގެ ވެރިކަން ދިފާޢު ކޮށްދިނުމަށް އަސްކަރީ ގޮތުން އެހީތެރިކަން ފޯރުކޮށްދީފައިވާ ޤައުމެކެވެ.
އީރާނުގެ ދައުލަތުގެ ޓީވީން ބުނީ ދިމިޝްޤުގައި ހުންނަ އީރާނުގެ އެންބަސީއަށް ޙަމަލާ ދިނީ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ހަނގުރާމަވެރިން ކަމަށް ނުބެލެވޭ ކަމަށެވެ. ސޫރިޔާގެ ވެރިކަން ވައްޓާލާފައި ވަނީ އެޗްޓީއެސްގެ ހަނގުރާމަވެރިންނެވެ.
އީރާނުގެ އެންބަސީއަށް ޙަމަލާ ދިން މީހުން ވަނީ އެ އިމާރާތުގެ މުދަލަށާއި ލިޔެކިޔުންތަކަށް ގެއްލުން ދީފައެވެ. އަދި އިމާރާތުގެ ބައެއް ކުޑަދޮރުތައް ތަލާލައި ގެއްލުން ދީފައިވެއެވެ. ނަމަވެސް އޭގެ ކުރިން އެންބަސީގެ މުވައްޒަފުންނާއި އެ މީހުންގެ ޢާއިލާއިން އެ އިމާރާތް ހުސްކޮށްފައިވާ ކަމަށްވެއެވެ.
ސޫރިޔާގައި ހުންނަވާ އީރާނުގެ ސަފީރު ޙުސައިން އަކްބަރީ ވިދާޅުވީ އެންބަސީއަށް ޙަމަލާ ދިން ނަމަވެސް އެންބަސީން ކުރަން ޖެހޭ ކަންކަން ކުރަމުންދާ ކަމަށެވެ. އެ ގޮތުން މަތީ ފަންތީގެ ބައްދަލުވުންތަކެއް އެންބަސީގައި ކުރިއަށްދާ ކަމަށް ވެސް އޭނާ ވިދާޅުވިއެވެ.
އީރާނުގެ ދައުލަތުގެ ޓީވީން ބުނީ ސޫރިޔާގައި ހުންނަ ޝިޔަޢީންގެ މަޤްބަރާތަކަށް ގެއްލުން ނުދޭނެ ކަމުގެ ޔަޤީންކަން އެޗްޓީއެސްގެ ހަނގުރާމަވެރިން ދީފައިވާ ކަމަށެވެ. އޭގެ ތެރޭގައި مـحـمـد رسـول اللهގެ ޢާއިލީ ބޭފުޅުންގެ މަޤްބަރާތައް ވެސް ހިމެނެއެވެ.