މަތިވެރީގައި އެއަރޕޯޓެއް ތަރައްޤީކުރުމުގެ މަސައްކަތް އަންނަ އަހަރު ފަށާނަން: ރައީސް

އަންނަ އަހަރު އަލަށް ފަށާ މަޝްރޫޢުތަކުގެ ތެރެއިން، އަރިއަތޮޅު އުތުރުބުރީ މަތިވެރީގައި އެއަރޕޯޓެއް ތަރައްޤީކުރުމުގެ މަސައްކަތް ފައްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އއ.މަތިވެރީ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

މަތިވެރީގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ އެމަނިކުފާނު އެންމެ އިސްކަމެއްދެއްވަނީ ރައްޔިތުންނަށް އެންމެ މުހިންމު ތާވަލުކުރެވިގެން ކުރިއަށްގެންދިއުމަށްކަމަށެވެ. އެމަގުން މަސައްކަތްކުރުމަށް މިއަހަރުގެ ބަޖެޓުގައި ދަތިތަކެއް ހުރިނަމަވެސް އަންނަ އަހަރުން ފެށިގެން ރައްޔިތުންނަށް އެމަނިކުފާނު ވެވަޑައިގެންފައިވާ ވަޢުދުތައް ފުއްދުމުގެ މަސައްކަތް ފެށޭނެކަމަށް ރައީސް ވިދާޅުވިއެވެ.

ރައީސް ވިދާޅުވީ ކުރިއަށް އޮތް ދެ އަހަރުގެތެރޭގައި އެ ވަޢުދުތަކުގެތެރޭގައި ހިމެނޭ މަޝްރޫޢުތައް ފެށި، އަދި ބައެއް މަޝްރޫޢުތައް ނިންމާތަން ޢަމަލީގޮތުން ފެންނާނެކަމަށެވެ. ރައީސްގެ ވާހަކަފުޅުގައި މަތިވެރީގެ ތަރައްޤީއަށް ރާވާފައިވާ މަޝްރޫޢުތަކުގެ ތަފްސީލް ހިއްސާކުރެއްވިއެވެ.

އއ.އަތޮޅަކީ މިހާތަނަށް އެއަރޕޯޓެއް ނެތް މަދު އަތޮޅުތަކުގެ ތެރެއިން އެއް އަތޮޅަށްވާއިރު އަންނަ އަހަރު ފަށާ އައު މަޝްރޫޢުތަކުގެ ތެރެއިން މަތިވެރީގައި އެއަރޕޯޓެއް ތަރައްޤީކޮށްދެއްވާނެކަމަށް ރައީސް ވިދާޅުވިއެވެ.

ރައީސް ވިދާޅުވީ މަތިވެރީގައި އެއަރޕޯޓެއް ތަރައްޤީކުރުމަށް ނިންމެވީ، އއ އަތޮޅަކީ ގިނަ ރިސޯޓްތަކެއް ހިންގާ އަދި ފަތުރުވެރިކަންވެސް ފުޅާވެފައިވާ ސަރަހައްދެއްކަމުގައިވާތީކަމަށެވެ. އެހެންކަމުން އއ.އަތޮޅަށް އެއަރޕޯޓެއް ކޮންމެހެން މުހިންމުކަމަށް ރައީސް ވިދާޅުވިއެވެ.

މަތިވެރީގައި މިވަގުތު 18 ގެސްޓްހައުސް ހިންގަމުންދާއިރު ރައީސް ވިދާޅުވީ މުޅި ރާއްޖެ ދަތުރުފަތުރުން ގުޅާލުމަށް ކުރާ މަސައްކަތުގެ ދަށުން އއ އަތޮޅަކީ އެއަރޕޯޓެއް އޮންނަންޖެހޭ ސަރަހައްދެއްކަމަށެވެ. އަދި އިތުރު ގެސްޓްހައުސް ޢިމާރާތްކުރުމުގެ މަސައްކަތް ކުރެވެމުން އަންނައިރު، އެއަރޕޯޓާއެކު މުޅި ސަރަހައްދަށް އިޤްތިޞާދީގޮތުން ކުރިއެރުން އަންނާނެކަމަށް ރައީސް ވިދާޅުވިއެވެ.

"ނަތީޖާއަކީ މިރަށާ މިސަރަހައްދަށް ޓޫރިޒަމްގެ ދާއިރާއިން އިތުރު ދޮރުތައް ހުޅުވި އިޤްތިޞާދީ ނަފާ ލިބުގެން ދިއުން” ރައީސުލްޖުމްހޫރިއްޔާ ވިދާޅުވިއެވެ.

ރައީސްގެ ވާހަކަފުޅުގައި އެއަރޕޯޓް އެޅުމުގެ ކޮންސެޕްޓް އަވަސްކޮށް ކުރިއަށްގެންދިއުމަށް ބޭނުންވާކަން ފާހަގަކުރެއްވިއެވެ.

މަތިވެރީގެ ތަރައްޤީގެ އެހެނިހެން މަޝްރޫޢުތަކަށް އަލިއަޅުއްވާލައްވަމުން ރައީސް ވިދާޅުވީ މަތިވެރީގެ ބިން ހިއްކައި ގޮނޑުދޮށް ހިމާޔަތްކުރައްވާނެކަމަށެވެ. އަދި ސިއްޙީ މަރުކަޒަށް ޖާގަ އިތުރުކުރައްވާ ޚިދުމަތްތައް އިތުރަށް ފުޅާކުރައްވާނެކަމަށްވެސް ރައީސް ވިދާޅުވިއެވެ. އަދި އަންނަ އަހަރު ބޯހިޔާވަހިކަމަށްވެސް ޚާއްޞަ އަހަމިއްޔަތުކަމެއް ދެއްވާނެކަން ފާހަގަކުރައްވަމުން ރައީސް ވިދާޅުވީ މަތިވެރިއާއި އެ ސަރަހައްދަށް ބޮޑު ކުރިއެރުމެއް އަންނާނެކަމަށެވެ.