އިންޑިޔާގެ ވެރިރަށް ނިއުދިއްލީގެ 40 މަދަރުސާއަކަށް ބޮމުގެ ޙަމަލާތަކެއް ދޭނެކަމުގެ އިންޒާރު ދީފިއެވެ. އީމެއިލް މެދުވެރިކޮށް ދިން އިންޒާރުތަކުގައި ބުނެފައި ވަނީ 30،000 އެމެރިކާ ޑޮލަރު ނުދީފިނަމަ އެ މަދަރުސާތަކުގައި ބޮންތަކެއް ގޮއްވާލާނެ ކަމަށެވެ. އިންޒާރުތަކުގެ ސަބަބުން ނިއުދިއްލީގެ ފުލުހުން ވަނީ އެ މަދަރުސާތައް ބަލާފާސްކޮށްފައެވެ.
މި އަހަރުގެ ތެރޭގައި އިންޑިޔާގެ އެކި މަދަރުސާތަކާއި ރޭލް ސްޓޭޝަންތަކާއި ވައިގެ ބަނދަރުތަކަށް ޙަމަލާ ދޭނެ ކަމުގެ އިންޒާރު ދީފައިވެއެވެ. ނަމަވެސް ފަހުން އެނގިފައިވާ ގޮތުގައި އެއީ ނުރައްކާތެރި އިންޒާރުތަކެއް ނޫނެވެ.
އިންޑިޔާގެ އެއަރލައިނުތަކާއި ވައިގެ ބަނދަރުތަކަށް ބޮމުގެ ޙަމަލާތަކެއް ދޭނެ ކަމުގެ 999 އިންޒާރު މި އަހަރުގެ ނޮވެންބަރު މަހުގެ ނިޔަލަށް ދީފައިވެއެވެ. އެ މައްސަލައާ ގުޅުން ހުރި 12 މީހުން ވަނީ ހައްޔަރުކޮށްފައެވެ.
ނިއުދިއްލީގެ 40 މަދަރުސާއަކަށް ބޮމުގެ ޙަމަލާތަކެއް ދޭނެ ކަމުގެ އިންޒާރު ދިނުމުން ބެލެނިވެރިން ވަނީ ދަރިވަރުން މަދަރުސާތަކުން ގެންގޮސްފައެވެ. އެ މައްސަލައާ ގުޅޭ ގޮތުން ނިއުދިއްލީގެ ފުލުހުން ވަކި އެއްޗެއް ބުނެފައެއް ނުވެއެވެ.
މިދިޔަ މެއި މަހުގެ ތެރޭގައި ވެސް ނިއުދިއްލީގެ 50 މަދަރުސާއަކަށް ބޮމުގެ ޙަމަލާތަކެއް ދޭނެ ކަމުގެ އިންޒާރު ދީފައިވެއެވެ.