2030 ވަނަ އަހަރާއި 2034 ވަނަ އަހަރުގެ ފީފާ ވޯލްޑް ކަޕް ބާއްވާ ގައުމުތައް މާދަމާ ބާއްވާ ފީފާގެ އެކްސްޓްރާ އޯޑިނަރީ ކޮންގްރެސްގައި ފާސްކުރާނެ ކަމަށް މީޑިއާ ރިޕޯޓުތައް ބުނެފިއެވެ.
2030 ވަނަ އަހަރުގެ ވޯލްޑްކަޕް ބޭއްވުމަށް ސްޕެއިން, ޕޯޗުގަލް އަދި މޮރޮކޯ އިން ވަނީ ބިޑްކޮށްފަ އެވެ. އަދި މި މުބާރާތަކީ ވޯލްޑްކަޕް ބާއްވާތާ 100 އަހަރު ވާ މުބާރާތް ކަމަށްވާތީ މި މުބާރާތް ކުލަގަދަ ކުރުމުގެ ގޮތުން މުބާރާތުގެ ފުރަތަމަ ތިން މެޗު އުރުގުއޭ އާއި އާޖެންޓީނާގެ އިތުރުން ޕެރަގުއޭގައި ކުޅުމަށް ފީފާ އިން ވަނީ ނިންމާފަ އެވެ.
ވޯލްޑްކަޕް ގެ ފުރަތަމަ މުބާރާތް 1930 ވަނަ އަހަރު ބާއްވާފައިވަނީ އުރުގުއޭގަ އެވެ. އުރުގުއޭގެ މޮންޓެވީޑިއޯގައި އާޖެންޓީނާ އާއި ދެކޮޅަށް އުރުގުއޭ ކުޅުނު މި މެޗުން އުރުގުއޭ ވަނީ މޮޅުވެ ވޯލްޑްކަޕް ކާމިޔާބުކޮށްފަ އެވެ.
މިއީ ވޯލްޑްކަޕްގެ ދިގު ތާރީޚުގައި މި މުބާރާތް ދުނިޔޭގެ ތިން ބައްރެއްގައި ބާއްވާ ފުރަތަމަ ފަހަރެވެ. އަދި އެއް މުބާރާތެއްގެ މެޗުތައް ހަ ގައުމެއްގައި ކުޅޭ ފުރަތަމަ ފަހަރުވެސްމެ އެވެ.
2034 ވަނަ އަހަރުގެ ފީފާ ވޯލްޑްކަޕް ބޭއްވުމުގެ ފުރުސަތު ހުޅުވާލުމުން މި މުބާރާތް ބާއްވަން ޝައުގުވެރިވެ މުބާރާތް ބޭއްވުމަށް ބިޑް ހުށައެޅި ހަމައެކަނި ގައުމަކީ ސައުދި އަރަބިއްޔާ އެވެ. އެހެންކަމުން މާދަމާ ބާއްވާ އެކްސްޓްރާ އޯޑިނަރީ ކޮންގްރެސްގައި މި ދެ މުބާރާތް ބާއްވާ ގައުމުތައް ރަސްމީކޮށް އިއުލާން ކުރުމުގެ ކުރިން އެކަމަށް އެންޑޯސްކޮށް ވޯޓަށް އަހާނެ އެވެ.
މިދިޔަ އަހަރުގެ އޮކްޓޯބަރ މަހުގެ 4 ވަނަ ދުވަހު 2034 ވަނަ އަހަރުގެ ވޯލްޑްކަޕް ބޭއްވުމަށް ޝައުގުވެރިވާ ގައުމުތަކަށް އެ ފުރުސަތު ފީފާއިން ހުޅުވާލިތާ ދިހަ މިނިޓުގެ ތެރޭގައި ސައުދި އަރަބިއްޔާއިން ވަނީ ޝައުގުވެރިކަން ފާޅުކޮށްފަ އެވެ. އަދި އެ ގައުމުން މިހާރު މަސައްކަތް ކުރަމުންދަނީ 2035 ވަނަ އަހަރުގެ އަންހެނުންގެ ވޯލްޑްކަޕް ބޭއްވުމަށް ބިޑް ކުރުމަށެވެ.
ސައުދި އަރަބިއްޔާއިން ވަނީ މިދިޔަ ނޮވެމްބަރ މަހު ވޯލްޑްކަޕް ބޭއްވުމަށް ޕްލޭން ކޮށްފައިވާ ކިންގް ސަލްމާން ސްޓޭޑިއަމްގެ ކުރެހުންތައް އާންމުކޮށްފަ އެވެ. 92 ހާސް މީހުންގެ ޖާގައިގެ މި ސްޓޭޑިއަމް އެޅުމަށް ހަމަޖެހިފައިވަނީ ރިޔާދު ގައެވެ.