ފުލުހުންގެ "ސައިބަރ އެކްސްޕޯ 2024" މިރޭ، 3 ދުވަހަށް ކުރިއަށްދާނެ

ދިވެހި ފުލުހުންގެ ޚިދުމަތުން ކުރިއަށްގެންދާ "ސައިބަރ އެކްސްޕޯ 2024" މިރޭ ފަށަން ތައްޔާރުވެއްޖެއެވެ.

ފުލުހުން މައުލޫމާތުދެއްވާ ގޮތުގައި އެކްސްޕޯ ފަށާނީ މިރޭ 8:00ގައި ހުޅުމާލެ ސެންޓްރަލް ޕާކުގައެވެ. މި އެކްސްޕޯ ހުޅުވުމުގެ ރަސްމިއްޔާތުގެތެރެއިން މިރޭ ސެންޓްރަލް ޕާކުގައި 3 މިނެޓަށް ހަވާ އެރުވުމަށްވެސް ވަނީ ހަމަޖެހިފައެވެ.

އަންނަ ހުކުރު ދުވަހުގެ ނިޔަލަށް ކުރިއަށްގެންދާ މި އެކްސްޕޯއަކީ ސަރުކާރުގެ މުއައްސަސާތަކާއި ކުންފުނިތަކާއި އަމިއްލަ ކުންފުނިތަކާއި ފަންނީ ބޭފުޅުންނަށް ހުޅުވާލައިގެން ކުރިއަށް ގެންދިއުމަށް ހަމަޖެހިފައިވާ އެކްސްޕޯއެކެވެ. މި އެސްޕޯއަކީ އެންމެން ގުޅިގެން ރައްކާތެރި ޑިޖިޓަލް މާހައުލެއް ގާއިމުކުރުމާއި އާންމު ރައްޔިތުން ސައިބަރ ސެކިއުރިޓީއަށް އަހުލުވެރިކުރުވުމަށް ބާއްވާ އެކްސްޕޯއެކެވެ.

މި އެކްސްޕޯ އާންމުކޮށް ހުޅުވާފައި ހުންނާނީ މިރޭ 8:00 އިން 23:00އަށް، ބުރާސްފަތި ދުވަހާއި ހުކުރުދުވަހު ހަވީރު 4:00 އިން 23:00އަށެވެ.

އެކްސްޕޯގެ ތެރެއިން މާދަމާ ހާއްސަ ކީނޯޓް ސްޕީޗްތައް ދިނުމަށްވެސް ވަނީ ހަމަޖެހިފައެވެ. މި ސްޕީޗްތައް ދެއްވާ ބޭފުޅުންގެ ތެރޭގައި ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާނާއި ފުލުހުންގެ ބައެއް އިސްވެރިން އަދި ސައިބަރ ސެކިއުރިޓީއާ ގުޅުންހުރި ދާއިރާތަކުގެ ރާއްޖެއާއި ބޭރުގެ ތަޖުރިބާކާރުން ހިމެނެއެވެ.

މި އެކްސްޕޯގެ މީޑިއާ ޕާޓްނަރަކީ ޕަބްލިކް ސަރވިސް މީޑިއާ، ޕީއެސްއެމްއެވެ. ޕީއެސްއެމްގެ އިތުރުން ބްރޯންޒް ޕާޓްނަރުގެ ގޮތުގައި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ، އެމްޓީސީސީ ހަމަޖައްސާފައިވާއިރު ބޭންކިންގ ޕާޓްނަރަކަށް، މޯލްޑިވްސް އިސްލާމިކް ބެންކު، އެމްއައިބީ، ޓެލެކޮމިއުނިކޭޝަން ޕާޓްނަަރަކަށް ދިރާގު އަދި ކޭޓަރިންގ ޕާޓްނަރަކަށް، ޕާކްސައިޑް ވަނީ ހަމަޖައްސާފައެވެ.