އިންޑިޔާގެ ނައިބު ރައީސް ޖަގްދީޕް ދަންކަރް މަޤާމުން ވަކިކުރުމުގެ މަސައްކަތް އިދިކޮޅު ޕާޓީތަކުން ފަށައިފިއެވެ.
އިންޑިޔާގެ ޤާނޫނު ހަދާ މަޖިލީހުގެ މަތިގޭގެ ރިޔާސަތުގައި އިންނަވައިގެން، ދަންކަރް ވަކި ފަރާތަކަށް ބުރަވެ، ޤާނޫނު ހެދުމަށް ހުރަސްއަޅާކަމަށް އިދިކޮޅު ފަރާތްތަކުން ވަނީ ތުހުމަތުކޮށްފައެވެ.
މިއީ އިންޑިޔާގެ ތާރީޚުގައި، ނައިބު ރައީސަކު މަޤާމުން ވަކި ކުރަން މަސައްކަތް ފެށި ފުރަތަމަ ފަހަރެވެ.
އެ ތުހުމަތުތަކާ ގުޅިގެން ދަންކަރްގެ އޮފީހުން އެއްޗެއް ނުބުނި ނަމަވެސް، ޕާލަމެންޓްރީ އެފެއާޒް މިނިސްޓަރު ކިރެން ރިޖިޖޫ ވިދާޅުވީ ދަންކަރް އަކީ"އިންތިހާއަށް ޕްރޮފެޝަނަލް އަދި ވަކި ފަރާތަކަށް ނުޖެހި" މަސައްކަތް ކުރައްވާ ބޭފުޅެއް ކަމަށެވެ.
ދަންކަރް މަޤާމުން ވަކި ކުރަން އިދިކޮޅުން މަސައްކަތް ފެށީ، ތަފާތު އެކި ސިޔާސީ މައްސަލަތައް އުފައްދައިގެން ޤާނޫނު ހަދާ މަޖިލީހުގެ މަސްޢޫލިއްޔަތުތަކަށް ފުރުސަތު ނުދޭ ކަމަށް ބުނެ، ސަރުކާރާއި އިދިކޮޅު ޕާޓީތަކުން އެތައް ހަފްތާއެއް ވަންދެން އެކަކު އަނެކަކަށް ތުހުމަތުތައް ބަދަލުކުރުމަށްފަހުއެވެ.
ނައިބު ރައީސް އަކީ އިންޑިޔާގައި ދުސްތޫރީ ގޮތުން ދެވަނައަށް އެންމެ މަތީ މަޤާމު ފުރުއްވާފައިވާ ބޭފުޅާގެ އިތުރުން މަޖިލީހުގެ މަތިގޭގެ ރައީސްކަން ވެސް ކުރައްވާ ބޭފުޅާއެވެ. އަދި ރައީސްގެ މަޤާމު ހުސްވެއްޖެ ޙާލަތެއްގައި ވަގުތީ ގޮތުން، ރައީސްގެ މަސްޢޫލިއްޔަތުތަކާއި ވާޖިބުތައް އަދާކުރައްވަން ޖެހިވަޑައިގަންނަވާނީ ނައިބު ރައީސަށެވެ.
ދަންކަރް މަޤާމުން ދުރުކުރަން އިދިކޮޅު ޕާޓީތަކަށް އެކަށީގެންވާ އަދަކަށް ވޯޓު ނެތުމުން މި ފިޔަވަޅަކީ ރަމްޒީ ފިޔަވަޅަކަށް ވިޔަސް، ދަންކަރް އަކީ ބޮޑުވަޒީރު ނަރެންދުރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) ގެ ކެންޑިޑޭޓަކަށްވާތީ، އިދިކޮޅު ފަރާތްތަކާއި ބޮޑުވަޒީރު މޯދީގެ ސަރުކާރާ ދެމެދު އުފެދިފައިވާ ނުތަނަވަސްކަން، މިކަމުގެ ސަބަބުން އިތުރަށް ގޯސްވާނެ ކަމަށް ބެލެވެއެވެ.
އިދިކޮޅު ކޮންގްރެސް ޕާޓީގެ ތަރުޖަމާނު ޖޭރާމް ރަމޭޝް ވިދާޅުވީ، ދަންކަރް އާ ދެކޮޅަށް އިތުބާރު ނެތް ކަމުގެ މައްސަލައެއް ހުށަހަޅަން މަޖުބޫރުވީ، ޤާނޫނު ހަދާ މަޖިލީހުގެ މަތިގެ ހިންގެވުމުގައި "ހުދުމުހުތާރު" ކަން އިންތިހާއަށް އިސްކުރަމުންދާތީ ކަމަށެވެ.
ނަމަވެސް، އިތުބާރު ނެތް ކަމުގެ މި މައްސަލައަކީ، ޤާނޫނު ހަދާ މަޖިލީހުގެ މަތިގޭގެ ރިޔާސަތަށް ދިން "ޙަމަލާއެއް"ގެ ގޮތުގައި މިނިސްޓަރު ރިޖިޖޫ ވަނީ ސިފަކުރައްވައިފައެވެ.
"މިހެން ޖަހާ ސަކަރާތަށް ހިތްވަރު ނުދީ. މިއީ ޑިމޮކްރަސީއަށް ރަނގަޅު ކަމެއް ނޫން. ނައިބު ރައީސަށް އިޙްތިރާމް ކުރަން ޖެހޭ. މަޖިލީހަށާއި ގޮނޑިއަށް އިޙްތިރާމް ކުރަން ޖެހޭ. އެފަދަ މައްސަލަތަކާ ދެކޮޅު ހަދަން. ދުވަހަކުވެސް ކާމިޔާބެއް ނުކުރެވޭނެ" ނޫސްވެރިންނާ ވާހަކަ ދައްކަވަމުން އޭނާ ވިދާޅުވި އެވެ.