އަލިފާނުގެ ހާދިސާއާއި ގުޅިގެން އެމްޓީސީސީ ބަހުގެ ބައެއް ރޫޓްތައް މެދުކަނޑާލައިފި

ހައުސިންގ މިނިސްޓްރީގައި ހިނގި އަލިފާނުގެ ހާދިސާގައި އެމްޓީސީސީގެ ބައެއް ބަސް ރޫޓަށް ބުރޫއަރައިފިއެވެ.

އެމްޓީސީސީއިން ވިދާޅުވީ، އަމީނީ މަގުގައި ހުންނަ ހައުސިންގ މިނިސްޓްރީގެ އިމާރާތުގައި ހިނގި އަލިފާނުގެ ހާދިސާއާއި ގުޅިގެން އާރުޓީއެމް ބަހުގެ ޚިދުމަތުގައި ހިމެނޭ އަމީނީ ރޫޓްގެ ދަތުރުތައް ވަގުތީގޮތުން ހުއްޓާލާފައިވާކަމަށެވެ.

މި ހާދިސާއާއި ގުޅިގެން ވެސްޓްޕާކް ރޫޓްތަކުގެ ދަތުރުތަކަށްވެސް ބުރޫއެރުމަކީ އެކަށީގެންވާކަމެއްކަމަށް އެމްޓީސީސީއިން ވަނީ ވިދާޅުވެފައެވެ.

އިތުރު މައުލޫމާތު ހޯދުމަށް އެ ކުންފުނީގެ ހޮޓްލައިން 1650 އަށް ގުޅުމަށް އެމްޓީސީސީއިން ވަނީ ވިދާޅުވެފައެވެ.

ހައުސިންގ މިނިސްޓްރީ ހިންގަމުންދާ އިމާރާތުގައި އަލިފާނުގެ ހާދިސާ ހިނގާފައިވަނީ މިއަދު ހެނދުނުއެވެ. އަލިފާންގަނޑު އަދިވެސް ނިއްވާލެވިފައެއް ނުވެއެވެ.