2030 ވަނަ އަހަރާއި 2034 ވަނަ އަހަރުގެ ފީފާ ވޯލްޑް ކަޕް ބާއްވާ ގައުމުތައް ފީފާއިން އިއްޔެ އިއުލާންކޮށްފިއެވެ.
2030 ވަނަ އަހަރުގެ ވޯލްޑްކަޕް ބޭއްވުމަށް ސްޕެއިން, ޕޯޗުގަލް އަދި މޮރޮކޯ އިން ހުށައަޅާފައިވާ ބިޑް ފީފާއިން އިއްޔެ ބޭއްވި އެ ޖަމްއިއްޔާގެ އެކްސްޓްރާ އޯޑިނަރީ ކޮންގްރެސްގައި ވަނީ ފާސްކޮށްފަ އެވެ. 2030 ވަނަ އަހަރުގެ ވޯލްޑްކަޕް ބޭއްވުމަށް އެންމެ ފުރަތަމަ ބިޑްކޮށްފައިވަނީ ސްޕެއިން އާއި ޕޯޗުގަލްގެ އިތުރުން ޔުކްރޭން ގުޅިގެންނެވެ. ނަމަވެސް ރަޝިޔާއާއި ޔުކްރޭން އާއި ދެމެދު ހިނގަމުންދާ ހަނގުރާމަ އާއި ގުޅިގެން ޔުކްރޭންވަނީ ބިޑް ނުކުރާން ނިންމާފަ އެވެ. އަދި އޭގެ ފަހުން މޮރޮކޯ ވަނީ އެ ދެ ގައުމާއިއެކު މުބާރާތް ބޭއްވުމަށް އެއްބަސްވެ އެ ބިޑުގައި ބައިވެރިވެފަ އެވެ.
އަދި 2030 ވަނަ އަހަރަކީ ވޯލްޑްކަޕް ބާއްވާތާ 100 އަހަރު ފުރޭ އަހަރު ކަމަށްވާތީ މި މުބާރާތުގެ ފުރަތަމަ ތިން މެޗު އުރުގުއޭ އާއި އާޖެންޓީނާގެ އިތުރުން ޕެރަގުއޭގައި ކުޅުމަށްވެސް ފީފާއިން ވަނީ ނިންމާފަ އެވެ. ވޯލްޑްކަޕްގެ ފުރަތަމަ މުބާރާތް 1930 ވަނަ އަހަރު ބާއްވާފައިވަނީ އުރުގުއޭގަ އެވެ. އުރުގުއޭގެ މޮންޓެވީޑިއޯގައި އާޖެންޓީނާ އާއި ދެކޮޅަށް އުރުގުއޭ ކުޅުނު މި މެޗުން އުރުގުއޭ ވަނީ މޮޅުވެ ވޯލްޑްކަޕް ކާމިޔާބުކޮށްފަ އެވެ.
މިއީ ވޯލްޑްކަޕްގެ ދިގު ތާރީޚުގައި މި މުބާރާތް ދުނިޔޭގެ ތިން ބައްރެއްގައި ބާއްވާ ފުރަތަމަ ފަހަރެވެ. އަދި އެއް މުބާރާތެއްގެ މެޗުތައް ހަ ގައުމެއްގައި ކުޅޭ ފުރަތަމަ ފަހަރުވެސްމެ އެވެ.
2034 ވަނަ އަހަރުގެ ފީފާ ވޯލްޑްކަޕް ބޭއްވުމުގެ ފުރުސަތު ހުޅުވާލުމުން މި މުބާރާތް ބާއްވަން ޝައުގުވެރިވެ މުބާރާތް ބޭއްވުމަށް ބިޑް ހުށައެޅި ހަމައެކަނި ގައުމަކީ ސައުދި އަރަބިއްޔާ އެވެ.
މިދިޔަ އަހަރުގެ އޮކްޓޯބަރ މަހުގެ 4 ވަނަ ދުވަހު 2034 ވަނަ އަހަރުގެ ވޯލްޑްކަޕް ބޭއްވުމަށް ޝައުގުވެރިވާ ގައުމުތަކަށް އެ ފުރުސަތު ފީފާއިން ހުޅުވާލިތާ ދިހަ މިނިޓުގެ ތެރޭގައި ސައުދި އަރަބިއްޔާއިން ވަނީ ޝައުގުވެރިކަން ފާޅުކޮށްފަ އެވެ. އަދި އެ ގައުމުން މިހާރު މަސައްކަތް ކުރަމުންދަނީ 2035 ވަނަ އަހަރުގެ އަންހެނުންގެ ވޯލްޑްކަޕް ބޭއްވުމަށް ބިޑް ކުރުމަށެވެ.
ސައުދި އަރަބިއްޔާއިން ވަނީ މިދިޔަ ނޮވެމްބަރ މަހު ވޯލްޑްކަޕް ބޭއްވުމަށް ޕްލޭން ކޮށްފައިވާ ކިންގް ސަލްމާން ސްޓޭޑިއަމްގެ ކުރެހުންތައް އާންމުކޮށްފަ އެވެ. 92 ހާސް މީހުންގެ ޖާގައިގެ މި ސްޓޭޑިއަމް އެޅުމަށް ހަމަޖެހިފައިވަނީ ރިޔާދު ގައެވެ.
ފީފާގެ މެމްބަރު 211 ގައުމުން ވީޑިއޯ ކޮންފަރެންސް މެދުވެރިކޮށް ބޭއްވި ކޮންގްރެސްގައި ހުރިހާ ގައުމަކުންވެސް މި ދެ ވޯލްޑްކަޕް ބާއްވަން ބިޑްކޮށްފައިވާ ފަރާތްތަކަށް ތާއިދުކޮށްފައިވާއިރު ބައެއް ގައުމުތަކުން ވަނީ ފީފާއިން 2034 ވަނަ އަހަރު ސައުދި އަރަބިއްޔާގައި ބާއްވާ ވޯލްޑްކަޕްގައި އިންސާނީ ހައްގުތައް ރައްކާތެރި ކުރުމާއި ގުޅޭ ގޮތުން އިތުރަށް ސަމާލުވުމަށް ވަކާލާތުކޮށްފަ އެވެ.