އަލިފާނުގެ ހާދިސާ ހިނގި ސަރަހައްދު އަދިވެސް ދަނީ މޮނިޓަރކުރަމުން

އިއްޔެ އަލިފާނުގެ ހާދިސާ ހިނގި ސަރަހައްދު އަދިވެސް މޮނިޓަރ ކުރަމުންދާ ކަމަށް މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފް އިން ވިދާޅުވެއްޖެއެވެ.

ޕީއެސްއެމް ނިއުސްއަށް މައުލޫމާތު ދެއްވަމުން އެމްއެންޑީއެފުން ވިދާޅުވީ އަލިފާނުގެ ހާދިސާއެއް ހިނގައިފިނަމަ އަލިފާން ނިއްވުމަށްފަހުވެސް އިތުރަށް ރޯވުމުގެ ފުރުސަތު އޮންނާނެތީ މޮނިޓަރ ކުރާނެ ކަމަށެވެ. އެގޮތުން، އިއްޔެ އަލިފާނުގެ ހާދިސާ ހިނގި އިމާރާތުގެ ތެރޭގައި އަދިވެސް ހޫނުކަން ހުރުމުން އަލުން ރޯވުމުގެ ފުރުސަތު އެބައޮތް ކަމަށް ވިދާޅުވިއެވެ.

އެމްއެންޑީއެފްގެ ފަޔަރ އެންޑް ރެސްކިއު ސަރވިސް، އެފްއާރުއެސްއިން ޕީއެސްއެމް ނިއުސްއަށް މައުލޫމާތު ދެއްވި ގޮތުގައި އަލިފާނުގެ ހާދިސާގެ ރިޕޯޓް ލިބުނީ އިއްޔެ ހެނދުނު 6:27 ގައެވެ. ކުޑަ ވަގުތުކޮޅެއްގެ ތެރޭގައި ފަސްޓް ރެސްޕޮންޑާސް ވެހިކަލް ހަރަކާތްތެރިވެފައިވާ ކަމަށާއި އެވަގުތުވެސް މުޅި ސަރަހައްދަށް ވަރަށް ބޮޑަށް ދުމުގެ އަސަރުކޮށްފައިވާ ކަމަށް އެފްއާރުއެސް އިން ވިދާޅުވިއެވެ.

އަލިފާން ކޮންޓްރޯލް ކުރުމަށް ކުރި މަސައްކަތުން ފަސް ގަޑިއިރު ތެރޭގައި ކޮންޓްރޯލް ކުރެވުނު ކަމަށްވެސް އެފްއާރުއެސްއިން ވިދާޅުވެއެވެ.

އިއްޔެ ހެނދުނު އަލިފާން ރޯވެފައިވަނީ ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާއާއި އިމާރާތްކުރުމާއި ބިނާރާބެހޭ ވުޒާރާ ހިންގަމުން އަންނަ އިމާރާތުގައެވެ. އެ ހާދިސާގައި އެ އިމާރާތުގެ ބޮޑުބައެއް ވަނީ ބޭނުން ނުކުރެވޭ ވަރަށް އަނދާފައެވެ.

މި ހާދިސާގައި މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާ ހިންގަމުން އަންނަ އިމާރާތުގައިވެސް ރޯވިއެވެ. މީގެ ސަބަބުން ތިން ވުޒާރާގެ މަސައްކަތްތައްވެސް ވަނީ ވަގުތީ ގޮތުން ހުއްޓިފައެވެ. ތިން ވުޒާރާގެ މަސައްކަތްތައް އަލުން ފެށުމަށް ދަރުބާރުގޭގައި ވަގުތީ ސެޓަޕްތައް ހެދުމުގެ މަސައްކަތް މިހާރު ދަނީ ކުރަމުންނެވެ.