ވުޒާރާގެ މަސައްކަތްތައް ދަރުބާރުގެއަށް ބަދަލުކުރުމަށްފަހު، އާދީއްތަދުވަހު މަސައްކަތް އަލުން ފެށޭނެ: ގެދޮރުވެރިކަމާބެހޭ ވަޒީރު

އަލިފާނުގެ ހާދިސާއާ ގުޅިގެން ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާގެ މަސައްކަތް މިވަގުތަށް ހުއްޓިފައި އޮތް ނަމަވެސް، އާދީއްތަ ދުވަހު އަލުން މަސައްކަތް ފެށޭނެކަމަށް ގެދޮރުވެރިކަމާބެހޭ ވަޒީރު ޑރ. އަލީ ހައިދަރު އަހުމަދު ވިދާޅުވެއްޖެއެވެ.

ޕީއެސްއެމް ނިއުސްއަށް މައުލޫމާތު ދެއްވަމުން ގެދޮރުވެރިކަމާބެހޭ ވަޒީރު ޑރ. އަލީ ހައިދަރު ވިދާޅުވީ ވުޒާރާގެ މަސައްކަތްތައް ދަރުބާރުގެއަށް ވަގުތީގޮތުން ބަދަލުކުރުމުގެ މަސައްކަތް މިހާރު ކުރަމުން އަންނައިރު ދައުލަތުގެ އެކި މުއައްސަސާތަކާއި ސަރުކާރުގެ ކުންފުނިތަކުގެ އެހީތެރިކަން ލިބެމުންދާ ކަމަށެވެ. އަދި އެ މަސައްކަތް މިރޭ 10:00އަށް ނިންމާލެވޭނެ ކަމަށާއި، އާދީއްތަ ދުވަހު ވުޒާރާގެ މަސައްކަތް ފެށޭނެކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ އަލިފާނުގެ ހާދިސާގައި އެ ވުޒާރާގެ ސަރވާ ސަލާމަތް ނުކުރެވުމުން، އޭގައި ހުރި ހުރިހާ ލިޔެކިޔުމަކާއި ޑޭޓާއެއް އެއްކޮށް ގެއްލިފައިވާ ކަމަށެވެ. އެ ސާވާގައި މުވައްޒަފުންގެ މައުލޫމާތާއި މިހާރު ކުރިއަށްދާ މަޝްރޫއުތަކުގެ މައުލޫމާތުތައްވެސް ހުންނާނެކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ސަރވާ ރިކަވަރ ނުކުރެވުނު ނަމަވެސް ފްލެޓް ލިސްޓަށް އަސަރު ނުކުރާނެ ކަމަށެވެ. ވަޒީރު ވިދާޅުވީ ފްލެޓް ލިސްޓާއި މަޝްރޫއުތަކާ ގުޅޭ މުހިންމު މައުލޫމާތު ރައްކާ ކޮށްފައި ހުންނަނީ އިންޓަރނެޓްގައި ގާއިމްކޮށްފައިވާ ކްލައުޑެއްގައި ކަމަށެވެ.

"ނަސީބަކުން އަޅުގަނޑުމެން ފްލެޓް ލިސްޓުގެ ހުރިހާ މައުލޫމާތަކާއި ގެދޮރުވެރިކަމުގެ މަޝްރޫއާއި ބިންވެރިކަމުގެ ހުރިހާ މަޝްރޫއެއްގެ މައުލޫމާތެއް ރައްކާކުރަމުންދިޔައީ ކްލައުޑުގައި. އެހެންވީމަ ސާވާއަށް ގެއްލުން ލިބުނަސް އަޅުގަނޑުމެންނަށް އެ މައުލޫމާތު ލިބެން ހުންނާނެ ކްލައުޑުން، އެއީ އަޅުގަނޑުމެންނަށް ދުރަށް ވިސްނާފައި ކުރެވުނު މަސައްކަތެއް،" ވަޒީރު ޑރ. ހައިދަރު ވިދާޅުވިއެވެ.

ބުރާސްފަތިދުވަހު ހިނގި އަލިފާނުގެ ހާދިސާގައި ގެދޮރުވެރިކަމާބެހޭ ވުޒާރާގެ އިތުރުން އިމާރާތް ކުރުމާއި ބިނާރާބެހޭ ވުޒާރާ އަދި ތިމާވެއްޓާބެހޭ ވުޒާރާއަށްވެސް ވަނީ ބޮޑެތި ގެއްލުންތަކެއް ލިބިފައެވެ. މި ދެ ވުޒާރާގެ މަސައްކަތްތައްވެސް ވަގުތީގޮތުން ދަރުބާރުގެއަށް ބަދަލުކުރުމުގެ މަސައްކަތް ދަނީ ކުރަމުންނެވެ.