ސޫރިޔާގައި އެމެރިކާއިން ވާގިވެރިވާ ކުރުދީ ހަނގުރާމަވެރި ޖަމާޢަތްތަކާއި ތުރުކީވިލާތުން ތާޢީދުކުރާ ހަނގުރާމަވެރި ޖަމާޢަތްތަކުގެ މެދުގައި ކުރިމަތިލުންތައް އިތުރުވެފައިވާ ދަނޑިވަޅެއްގައި، ހަމަޖެހުން ޤާއިމުކުރުމުގެ މަޝްވަރާތަކަށް އެމެރިކާގެ ޚާރިޖީ ވަޒީރު އެންތަނީ ބްލިންކެން ތުރުކީއަށް ވަޑައިގެންފިއެވެ.
ސޫރިޔާގެ ރައީސް ބައްޝާރް އަލް-އަސަދުގެ ވެރިކަން ކުއްލި ގޮތަކަށް ވެއްޓުނު ފަހުން، މެދުއިރުމައްޗަށް ކުރެއްވި ފުރަތަމަ ދަތުރުގައި ބްލިންކެން ވަނީ އަންކާރާގެ އެސެންބޯގާ އެއާޕޯޓުގައި ރައީސް ރަޖަބް ޠައްޔިބް އުރުދުޣާނާ ބައްދަލުކުރައްވާފައެވެ.
އުރުދުޣާނާއި ބްލިންކެން ސޫރިޔާގައި މިހާރު އޮތް ޙާލަތާ ގުޅޭގޮތުން މަޝްވަރާ ކުރައްވާފައިވާއިރު، ސޫރިޔާގެ މުއައްސަސާތައް އަލުން ބިނާކުރުމަށް ބައިނަލްއަޤްވާމީ މުޖުތަމައޫ ގުޅިގެން މަސައްކަތް ކުރުމަށް އުރުދުޣާން ގޮވާލެއްވި ކަމަށް، ތުރުކީގެ ރައީސް އޮފީހުން ނެރުނު ބަޔާނެއްގައި ބުންޏެވެ.
އަދި ތުރުކީވިލާތުގެ ޤައުމީ ސަލާމަތަށްޓަކައި، އެންމެ ތަންކޮޅެއް ވެސް ދޫނުދީ، ނިރުބަވެރި ޖަމާޢަތްތަކާ ދެކޮޅަށް މަސައްކަތް ކުރުމުގައި ދެމިތިބޭނެ ކަމަށް ބްލިންކެން އަރިހު އުރުދުޣާން ވިދާޅުވި ކަމަށް އެ ބަޔާނުގައިވެއެވެ.
އެމެރިކާގެ ޚާރިޖީ ވުޒާރާގެ ތަރުޖަމާނު މެތިއު މިލަރ ނެރުއްވި ބަޔާނެއްގައި ވިދާޅުވީ، ސޫރިޔާގައި އެންމެންގެ ބައިވެރިވުން އޮތް ޒިންމާދާރު އިންތިޤާލީ ސަރުކާރެއް ޤާއިމުކުރުމަށްޓަކައި ތުރުކީވިލާތުން ގެންގުޅޭ ވިސްނުން އެމެރިކާއިން ވެސް ޙިއްސާކުރާ ކަމަށް ބްލިންކެން ފާހަގަކުރެއްވި ކަމަށެވެ.
އަދި އައިއެސް ޖަމާޢަތް ބަލިކުރުމަށް، ގުޅިގެން ކުރެވޭ މުޙިއްމު މަސައްކަތް ކަށަވަރުކުރަންޖެހޭ ކަމަށް ބްލިންކެންނާ ހަވާލާ ދެއްވައި މިލަރ ވިދާޅުވިއެވެ.
ނޭޓޯގެ ބައިވެރިންގެ ގޮތުގައި، އެމެރިކާ އާއި ތުރުކީވިލާތުން، ސޫރިޔާގެ 13 އަހަރުވީ ދާޚިލީ ހަނގުރާމައިގައި ސޫރިޔާގެ ހަނގުރާމަވެރިންނަށް ވާގިދިން ނަމަވެސް، ކުރުދީން އިސްވެ އުފައްދާފައިވާ ސީރިއަން ޑިމޮކްރެޓިކް ފޯސަސް (އެސްޑީއެފް)އާ ގުޅޭ ގޮތުން އެ ދެ ޤައުމުގެ މެދުގައި ވަނީ ދެބަސްވުން އުފެދިފައެވެ.
އައިއެސްގެ ހަނގުރާމަވެރިންނާ ދެކޮޅަށް އެމެރިކާގެ އެންމެ ވަރުގަދަ ހަތިޔާރަކީ އެސްޑީއެފްއެވެ. ނަމަވެސް، ތުރުކީވިލާތުން ޤަބޫލުކުރާ ގޮތުގައި، އެސްޑީއެފަކީ ޕަލްސް ޕްރޮޓެކްޝަން ޔުނިޓްސް (ވައިޕީޖީ) ފަހަތުގައި އޮތް ކުރުދީސްތާން ވޯކަރސް ޕާޓީ (ޕީކޭކޭ) ގޮތްޕެެކެވެ. ޕީކޭކޭއަކީ، ފާއިތުވި 40 އަހަރު ތުރުކީވިލާތުގެ ދައުލަތާ ދެކޮޅަށް ހަނގުރާމަ ކުރަމުންދާ ޖަމާޢަތެކެވެ.
އަންކާރާއަށް ވަޑައިގަތުމުގެ ކުރިން ބްލިންކެން ވަނީ ޕީކޭކޭއަކީ ތުރުކީވިލާތަށް އޮތް ނުރައްކަލެއް ކަމަށް ވިދާޅުވެފައެވެ.
"ހަމައެއާއެކު... އަޅުގަނޑުމެން ބޭނުންވަނީ ސޫރިޔާގައި އިތުރު ހަމަނުޖެހުންތަކެއް ނުހިނގައި، ވަގުތީ ސަރުކާރަކަށް އަދި ރަނގަޅު މިސްރާބަކަށް ގެންދިޔުން،" ބްލިންކެން ވިދާޅުވިއެވެ.
އަސަދުގެ ވެރިކަން ވެއްޓުނު ދަނޑިވަޅުގެ ފައިދާ ނަގައި، އައިއެސްގެ ހަނގުރާމަވެރިން ސޫރިޔާއަށް އަތްގަދަކުރަން ފުރުޞަތު ނުދޭނެ ކަމަށް ވެސް ބްލިންކެން މީގެ ކުރިން ވަނީ ވިދާޅުވެފައެވެ.