މަސްވެރިކަމުގެ ދާއިރާއިން މީހުން ބިނާކުރުމަށް ގިނަ މަސައްކަތްތަކެއް ދަނީ ކުރެވެމުން: ވަޒީރު ޝިޔާމް

މަސްވެރިކަމުގެ ދާއިރާއިން މީހުން ބިނާކުރުމަށް މީގެކުރިން އެއްވެސް ސަރުކާރަކުން މަސައްކަތްނުކުރާ ވަރަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ދަނީ މަސައްކަތް ކުރައްވަމުންކަމަށް މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މަސްވެރިންގެ ދުވަހާއި ގުޅިގެން ހުޅުމާލެ ސެންޓްރަލް ޕާކުގައި ބޭއްވި "މަސްވެރިހަވީރު"ގެ ތެރެއިން ޕީއެސްއެމް ނިއުސްއާ ވާހަކަދައްކަވަމުންނެވެ.

މަސްވެރިންގެ ދުވަހާއި ގުޅިގެން ހުޅުމާލެ ސެންޓްރަލް ޕާކުގައި ބޭއްވި "މަސްވެރިހަވީރު"އަކީ، މަސްވެރިކަމާއި ބެހޭ ވުޒާރާއާއި، މޯލްޑިވްސް ސީފުޑް ޕްރޮސެސާސް އެންޑް އެކްސްޕޯޓަރސް އެސޯސިއޭޝަނު ގުޅިގެން ބޭއްވި ހަރަކާތެކެވެ.

މި ހަވީރު ހުޅުވައި ދެއްވީ މަސްވެރިކަމާބެހޭ ވަޒީރު އަހުމަދު ޝިޔާމް އަދި މިފްކޯގެ ސީއީއޯ ވިތާލީ ލުބިމޯފާއި ރާއްޖޭއިން މަސް އެކްސްޕޯޓް ކުރާ ފަރާތްތަކުގެ ޖަމީއްޔާގެ ރައީސް އުމަރު ޖަމާލްއެވެ.

މި ހަރަކާތް އިފްތިތާހުކޮށްދެއްވުމަށްފަހު ވަޒީރު ވަނީ އެތަނުގައި ސްޓޯލްތައް ބައްލަވާލައްވާފައެވެ. ސްޓޯލްތައް ބައްލަވާލެއްވުމަށްފަހު ޕީއެސްއެމް ނިއުސްއާ ވާހަކަ ދައްކަވަމުން ވަޒީރު ޝިޔާމް ވިދާޅުވީ މަސްވެރި ސިނާޢަތް ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރައްވާފައިވާކަމަށެވެ.

ވަޒީރު ފާހަގަކުރެއްވި ގޮތުގައި، މިފަހަރު މަސްވެރިންގެ ދުވަސް ފާހަގަކުރަމުންދާއިރު، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދުފުޅާއި އެއްގޮތަށް މަސްވެރިންނަށް ދަނީ ފައިސާ ދޫކުރެވެމުންނެވެ. އަދި މިއީ މަސްވެރިންގެ އެންމެ ބޮޑު އެއް ކަންބޮޑުވުންކަން ފާހަގަކުރައްވާ، ވަޒީރު ވަނީ މަސްވެރިންގެ ހުރި އެހެން ގިނަ ކަންބޮޑުވުންތަކަށްވެސް ހައްލު ހޯއްދަވައި ދެއްވަމުންދާކަން ފާހަގަކުރައްވާފައެވެ. މިގޮތުން މަސްވެރިންނަށް ހެޔޮ އަގުގައި ތެޔޮ ފޯރުކޮށްދިނުމުގެ މަސައްކަތާއި، މަސްވެރިންނަށް އައިސް ލިބުމުގެ ދަތިތައް ހައްލުކުރެއްވުމަށް މަސައްކަތް ކުރައްވަމުންދާކަމަށް ވަޒީރު ވިދާޅުވިއެވެ.

މީގެއިތުރުން މަސްވެރިންނަށް ހަމަ އަގު ހޯދުމަށް ކެޕޭސިޓީ އިތުރުކުރުމުގެ މަސައްކަތް ކުރިއަށް އޮތް 2 އަހަރެއްހާ ދުވަހުގެ ތެރޭ ނިމޭނެކަން ފާގަކުރައްވާ ވަޒީރު ވަނީ ރައީސުލްޖުމްހޫރިއްޔާގެ ތަޞައްވުރާއި އެއްގޮތަށް މި ސިނާޢަތަށް މީހުން ބިނާ ކުރުމަށް މުހިންމު މަސައްކަތްތަކެއް ކުރެވޭކަންވެސް ވަޒީރު ފާހަގަކުރެއްވިއެވެ. އަދި މިމަސައްކަތްތަކާއިއެކު މި ސިނާޢަތަކީ ދިވެހިން ޝައުޤުވެރިވާ ސިނާޢަތަކަށް ހެދޭނެ ކަމަށްވެސް ވަޒީރު ވިދާޅުވިއެވެ.

"މީހުން ބިނާކުރުމަށް މީގެ ކުރިން އެއްވެސް ސަރުކާރަކުން ނުކުރާ ވަރަށް ވުޒާރާއިން އެ މަސައްކަތް އެބަކުރެވޭ. ރައީސުލްޖުމްހޫރިއްޔާގެ ތަޞައްވުރާއި އެއްގޮތަސް ދޯނިތަކުން ފޭބި ދިވެހިންނާއި ޒުވާނުން އަނބުރާ ދޯނިތަކަށް އެރުވުމަށް ގިނަ މަސައްކަތްތަކެއް ކުރެވޭ. ޒުވާނުން ޝައުޤުވެރިކުރުމަށް ފިޝަރީޒް ކޮލެޖް ޤާއިމްކޮށް، ދަފްތަރެއް އެކުލަވާލެވޭނެ. މި ބަދަލުތަކާއެކު މުސްތަޤުބަލުގައި މި ސިނާޢަތްވެގެންދާނީ ގިނަ ދިވެހިން ޝައުޤުވެރިވާ ސިނާޢަތަކަށް. " ވަޒީރު ޝިޔާމް ވިދާޅުވިއެވެ.

ސަރުކާރުން މަސްވެރިކަމުގެ ސިނާއަތް ކުރިއެރުވުމަށް ގިނަ މަސައްކަތްްތަކެއް ކުރަމުންދާއިރު، މީސިނާޢަތަށް މީހުން ބިނާކުރުމަށް މޯލްޑިވްސް ނޭޝަނަލް ޔުނިވާސިޓީ ގުޅިގެން މަސްވެރިކަމުގެ ކޮލެޖެއް ޤާއިމްކޮށް މަސްވެރިކަމުގެ ދައިރާގެ ގިނަ ކޯސްތަކެއް ދަނީ ހިންގަމުންނެވެ.