އޮސްޓްރިޔާގައި ދިރިއުޅޭ ސޫރިޔާގެ ރެފިއުޖީން ޤައުމަށް އެނބުރި ދިޔުމަށް އެ ޤައުމުގެ ސަރުކާރުން 1،000 ޔޫރޯ ދިނުމަށް ހުށަހަޅައިފިއެވެ.
ސޫރިޔާގެ ކުރީގެ ރައީސް ބައްޝާރު އަލް-އަސަދުގެ ވެރިކަން މިދިޔަ ހަފުތާގެ ތެރޭގައި ކުއްލި ގޮތަކަށް ނިމުމަކަށް އައިސް، ދިގު އަހުލީހަނގުރާމައަކަށް ފަހު އެ ޤައުމުގައި ހަމަޖެހުން ޤާއިމު ކުރުމުގެ ފުރުޞަތު ވަނީ ފަހިވެފައެވެ. ދަނޑިވަޅުގެ ބޭނުން ހިފައި އަސަދުގެ ވެރިކަން ވެއްޓުނު ދުވަހު އޮސްޓްރިޔާގެ ޗާންސެލަރު ކާލް ނިހެމާ ވަނީ ސޫރިޔާގެ ސަލާމަތީ ޙާލަތު ކުރިއަށް އޮތް ދުވަސްތަކުގައި ގާތުން ބަލައި އޮސްޓްރިޔާގައި ތިބި ސޫރިޔާގެ ރެފިއުޖީން ޤައުމަށް ފޮނުވާލެވޭތޯ ސަރުކާރުން ބަލަން ޖެހޭނެ ކަމަށް އިޢުލާނު ކުރައްވައިފައެވެ.
ސޫރިޔާގެ ކުރިމަގު ސާފުވުމުން ނޫނީ ރެފިއުޖީންގެ ރުހުމާ ނުލައި އެ މީހުން އަނބުރާ ސޫރިޔާއަށް ފޮނުވައެއް ނުލެވޭނެއެވެ. އެހެން ކަމުން އޮސްޓްރިޠާއިން މި ވަގުތު މަސައްކަތް ކުރާނީ ރުހުމުގައި އެ ޤައުމު ދޫކޮށް ސޫރިޔާއަށް އަނބުރާ ދާން ބޭނުންވާ މީހުން ފޮނުވައިލެވޭތޯ ކަމަށް އެ ޤައުމުން ބުނެއެވެ. ވިލާތުގެ އެހެން ގިނަ ޤައުމުތަކެކޭ އެއްގޮތަށް އޮސްޓްރިޔާއިން ވަނީ އެ ޤައުމުގެ ހިމާޔަތް ހޯދުމަށް އެދެމުންދާ ސޫރިޔާގެ ރައްޔިތުންގެ ފޯމުތައް ބެލުން ވެސް ހުއްޓައިލައިފައެވެ.
އެކްސްގައި ކުރެއްވި ޕޯސްޓެއްގައި ޗާންސެލާ ނިހެމާ ވިދާޅުވީ ސޫރިޔާއަށް މިހާރު ބޭނުންވަނީ ޤައުމު އަލުން ބިނާކޮށް އާރާސްތު ކުރާނެ ރައްޔިތުންތަކެއް ކަމަށެވެ. އެ ގޮތުން އޮސްޓްރިޔާގައި ތިބި ސޫރިޔާގެ ރައްޔިތުންގެ ތެރެއިން ޤައުމަށް އެނބުރި ދާން ބޭނުންވާ މީހުންނަށް ފައިސާގެ ހަދިޔާއެއް ދެއްވާނެކަމަށް އޭނާ ވިދާޅުވިއެވެ.
ނަމަވެސް އޮސްޓްރިޔާގެ ސަރުކާރުގެ މި ހުށަހެޅުން ޤަބޫލު ކުރާނީ ސޫރިޔާގެ ކިތައް ރައްޔިތުން ކަމެއް ސާފެއް ނޫނެވެ. އޮސްޓްރިޔާގެ ޤައުމީ އެއާލައިން، އޮސްޓްރިއަން އެއާލައިންސްގެ ދަތުރުތައް މެދުއިރުމައްޗަށް މެދުކަނޑާލާފައިވާ އިރު، ސޫރިޔާއަށް އެނބުރި ދިޔުމަށް ކުރާ ދަތުރަށް އެކަނި ވެސް އޮސްޓްރިޔާގެ ސަރުކާރުން ހުށަހަޅާފައިވާ ފައިސާއިން ފުދޭނެކަމާ މެދު ޝައްކު އުފެދެއެވެ.