ސޫރިޔާގެ އުތުރުގެ އަލަވީ ފަރުބަދަތަކުގައި ހުރި އަސްކަރީ މަޤާމުތަކުން ރަޝިޔާގެ ސިފައިން ފަހަތަށް ޖެހެން ފަށާފައިވީ ނަމަވެސް، ސޫރިޔާގައި ހުންނަ ރަޝިޔާގެ ދެ އަސްކަރީ މަރުކަޒު ދޫކޮށްނުލާ ކަމަށް އިތުބާރުހުރި ބައެއް މަސްދަރުތަކުން ބުނެފިއެވެ.
ސޫރިޔާގެ ކުރީގެ ރައީސް ބައްޝާރް އަލް-އަސަދުގެ އިތުރުން އޭނާގެ ބައްޕާފުޅު ހާފިޒް އަލް-އަސަދާ އެކު ރަޝިޔާއިން ގާތް ގުޅުމެއް އުފައްދާފައި އޮތުމަށްފަހު، އަސަދުގެ ވެރިކަން ވެއްޓުމާ އެކު، ރަޝިޔާއިން އަލްލާޒިޤިއްޔާގައި ހިންގާ ޙުމީމީމް ވައިގެ މަރުކަޒާއި ޠުރްޠޫސްގައި ހިންގާ ކަނޑުގެ ސިފައިންގެ މަރުކަޒުތަކުގެ މުސްތަޤްބަލާ މެދު ވަނީ ސުވާލު އުފެދިފައެވެ.
ހުކުރު ދުވަހުގެ ސެޓެލައިޓް މަންޒަރުތަކުން ފެންނަ ގޮތުގައި، ދުނިޔޭގެ އެންމެ ބޮޑު މުދާ އުފުލާ އަސްކަރީ މަތިންދާބޯޓުތަކުގެ ތެރޭގައި ހިމެނޭ އެންޓޮނޮވް އޭއެން-124 މަރުކާގެ ދެ އުޅަނދު ޙުމީމީމް ވައިގެ މަރުކަޒުގައި މުދާ އަރުވަމުންދާ ކަމަށް ބެލެވެއެވެ.
އަދި އޭގެ ތެރެއިން އެއް މަތިންދާބޯޓު ޙުމީމީމް ވައިގެ މަރުކަޒުން ލީބިޔާއާ ދިމާލަށް މިޞްރާބު ޖަހާފައިވާ ކަމަށް ބެލެވެއެވެ.
ރަޝިޔާއާ ގުޅުން ހުރި ސޫރިޔާގެ އަސްކަރީ އަދި ސަލާމަތީ މަސްދަރުތަކުން ބުނީ، ރަޝިޔާއިން ކުރީ ސަފުގައި ތިބި ސިފައިން ފަހަތަށް ޖައްސައި، ބައެއް ސާމާނުތަކާއި ސޫރިޔާގެ އިސް އޮފިސަރުން އަނބުރާ ގެންދަމުން ކަމަށެވެ.
ނަމަވެސް، ނަން ނުޖެހުމަށް ޝަރުތުކޮށް ވާހަކަ ދެއްކި މަސްދަރުތަކުން ބުނީ ރަޝިޔާގެ މައި ދެ މަރުކަޒު މުޅީން ދޫކޮށް ދިޔުމުގެ ވިސްނުމެއް ނެތް ކަމަށާއި، ޙާލަތު ނިއުޅެމުންދާ ގޮތަށް ބަލައި، މިހާރަށް ވުރެ ވަރުގަދައަށް އެނބުރި އައުން އެކަށީގެންވާ ކަމަށެވެ.
ސޫރިޔާގައި މިހާރު އޮތް ވަގުތީ ސަރުކާރާ ގާތް ގުޅުމެއް އޮންނަ މަސްދަރަކުން ބުނީ ސޫރިޔާގައި ރަޝިޔާ ސިފައިން ތިބުމާއި، އަސަދުގެ ސަރުކާރާއި ރަޝިޔާއާ ދެމެދު ކުރިން ވެވުނު އެއްބަސްވުންތަކާ މެދު މަޝްވަރާ ނުކުރެވޭ ކަމަށެވެ.
"މިއީ ކުރިއަށް އޮތް ތަނުގައި ކުރަންޖެހޭ މަޝްވަރާއެއް. އެ ކަމުގައި އެންމެ ފަހު ބަސް ބުނާނީ ސޫރިޔާގެ ރައްޔިތުން" އޭނާ ބުންޏެވެ.
އެ ދެ އަސްކަރީ މަރުކަޒާ ގުޅޭގޮތުން ސޫރިޔާގެ އައު ސަރުކާރާ އެކު މަޝްވަރާ ކުރާނެ ކަމަށް ރަޝިޔާއިން ވެސް މީގެ ކުރިން ވަނީ ބުނެފައެވެ.
ފިނި ހަނގުރާމަ ފެށުނު ދުވަސްވަރުން ފެށިގެން، ރަޝިޔާއިން ދަނީ ސޫރިޔާއަށް ތާޢީދު ކުރަމުންނެވެ. ސޫރިޔާގައި އޮތް ފަރަންސޭސިވިލާތުގެ އިސްތިޢުމާރީ ވެރިކަން ނިންމަން މަސައްކަތަށް ހިތްވަރު ދިނުމުގެ ގޮތުން ރަޝިޔާއިން ވަނީ 1944 ވަނަ އަހަރު ސޫރިޔާގެ މިނިވަންކަން ޤަބޫލުކޮށްފައެވެ. އޭގެ ފަހުން، ސޫރިޔާ މެދުވެރިކޮށް ރަޝިޔާއިން ދުނިޔެއަށް ޖާސޫސް ކުރަމުންދާ ކަމަށް ހުޅަނގުގެ ގިނަ ޤައުމުތަކުން ވަނީ ތުހުމަތުކޮށްފައެވެ.
ސޫރިޔާގައި ޤާއިމުކޮށްފައިވާ ރަޝިޔާގެ އަސްކަރީ ދެ މަރުކަޒަކީ، ދުނިޔޭގައި ރަޝިޔާގެ އަސްކަރީ ބާރު ދެމެހެއްޓުމަށް މުޙިންމު ދެ މަރުކަޒެކެވެ.