2024: ދީނީ ޝިޢާރު ފުޅާކުރުމުގެ ގިނަ މަޝްރޫޢުތަކެއް ހިންގި އަހަރެއް

ފާއިތުވި 2024 ވަނަ އަހަރަކީ ދީނީ ޝިއާރު ފާޅުކުރުމާއި، ދީނީ ހޭލުންތެރިކަން އިތުރުކުރުމަށް، މީގެ ކުރިން ދުވަހަކުވެސް މަސައްކަތް ނުކުރެވޭހާ ގިނައިން މަސައްކަތްކުރިއަހަރެކެވެ. އަދި ރާއްޖޭގެ ޒަކާތު ނިޒާމު ހަރުދަނާ ކުރުމަށްޓަކައި ޚާއްސަ މަސައްކަތްތަކެއް ކުރެއްވި އަހަރެކެވެ.

ފުރަތަމަ ފަހަރަށް "ޒަކާތު ހައުސް" އުފައްދައި ޒަކާތާ ގުޅޭގޮތުން ރައްޔިތުން ހޭލުންތެރިކަން އިތުރުކުރުމަށް ޚާއްސަ މަސައްކަތްތަކެއްވެސް ފެށިއެވެ. ފުރަތަމަ ފަހަރަށް ޒަކާތް ނެރުމާއި ބެހުމުގައި އަމަލުކުރާނެ މިންގަނޑެއް އާންމުކުރިއެވެ. މި ހުރިހާ މަސައްކަތާއެކު ޒަކާތު ފަންޑަށް އެންމެ ގިނައިން ފައިސާ ޖަމާވި އަހަރަކީ ނިމުނު 2024 ވަނަ އަހަރެވެ.

ފަޤީރުން ޙައްޖަށް ފޮނުވުން

ފަސް އަހަރުގެ ތެރޭގައި 1000 ފަޤީރުން ޙައްޖަށް ފޮނުވުމަށް ރައީސުލްޖުމްހޫރިއްޔާ ވެވަޑައިގެންނެވި ވަޢުދުފުޅާއެއްގޮތަށް ފަޤީރުންގެ ދަފްތަރުގައި ހިމެނޭ 50 ފަޤީރަކު 2024 ވަނަ އަހަރު ވަނީ ހައްޖުގެ އަޅުކަމަށް ފޮނުވާފައެވެ. މިއީ ދައުލަތުން ޚަރަދުކޮށްގެން ރާއްޖޭގައި ފަގީރުން ޙައްޖަށް ފޮނުވި ފުރަތަމަ ފަހަރެވެ.

ރާއްޖެއިން ހައްޖަށް މީހުންގެންދަން ލިބޭ ހުރިހާ ކޯޓާއެއް ހައްޖުކޯޕަރޭޝަނާ ހަވާލުކޮށް މިދިޔަ އަހަރު ރާއްޖެއިން ހައްޖަށްދިޔަ އެންމެންވެސް އެއަޅުކަން އަދާކުރުމަށް ސައުދީއަށް ގެންދިޔައީ އެކޯޕަރޭޝަނުންނެވެ. ޙައްޖަށް ދިޔުމުގެ ފުރުޞަތު މިހާރު ކޮންމެ މީހަކަށްވެސް ލިބޭއިރު ފުރަތަމަ ފަހަރަށް ޙައްޖުވާން ބޭނުންވާ މީހުންނަށް ޚާއްސަކޮށްގެން އެ ފުރުޞަތު ދިނުމާ ގުޅޭގޮތުން އާންމުގެ ޚިޔާލު ހޯދުމުގެ މަސައްކަތްވަނީ ފަށާފައެވެ.

ޙައްޖުގެ އިތުރަށް އުމްރާއަށް މީހުން ގެންދިޔުމުގައިވެސް ލުއިފަސޭހަތް ގޮތްތަކެއް ވަނީ ހަމަޖައްސައިދީފައެވެ. އެގޮތުން ކުރިން ވަކި މުއްދަތެއްގެ ތެރޭގައި ޢުމްރާއަށް މީހުން ގެންދިޔުމުގެ ހުއްދަ ކުންފުނިތަކަށް ދިންނަމަވެސް މިހާރު ކޮންމެ ދުވަހަކުވެސް ހުއްދައަށް އެދެވޭގޮތް ވަނީ ހަމަޖައްސާފައެވެ.

ކީރިތި ޤުރުއާންގެ ޢިލްމު ފުޅާކުރުން

ކީރިތި ޤުރުއާނުގެ އިލްމު ފުޅާކުރުމަށް ކުރަމުންދާ މަސައްކަތްތަކުގެ ތެރެއިން މިސްކިތްތަކުގައި ޤުރުއާން ކްލާސްތައް ހިންގަން ވަނީ ފަށާފައެވެ.

މީގެ އިތުރުން ހާފިޒުކަމުގެ ސަނަދު ދިނުމަށް ވަކި ޚާއްސަ ހަފްލާއެއް ބާއްވަން ނިންމައި ކޮންމެ އަހަރެއްގެ ރަމަޟާން މަހުގެ 27 ވިލޭރޭގައި އެހަފްލާ ބޭއްވުމަށް ވަނީ ނިންމާފައެވެ. އަދި ޤުރުއާން މުބާރާތްތައް ބޭއްވުމާއި ރާއްޖެއިން ބޭރުގައި އޮންނަ މުބާރަތްތަކުގައި ބައިވެރިވުމުގެ ފުރުޞަތު މިދިޔަ އަހަރުވެސް ދީފައިވެއެވެ.

ކީރިތި ޤުރުއާންގެ ޢިލްމް ފުޅާކުރުމުގެ ގޮތުން ކީރިތި ޤުރުއާނާ ބެހޭ ޤައުމީ މަރުކަޒެއް ވަކި އިމާރާތެއްގައި ބިނާކުރުމަށް ސަރުކާރުން ވަނީ ނިންމަވާފައެވެ.

އިމާމުންނައި ޚަތީބުން ތަމްރީނުކުރުން

މިސްކިތްތަކާ ގުޅޭ ކަންކަން ހަރުދަނާ ކުރުމަށް ކުރެއްވި މަސައްކަތްތަކުގެ ތެރެއިން މިސްކިތްތަކާ ބެހޭ ޤައުމީ މަޖިލިސް އެކުލަވާލާފައިވެއެވެ. އަދި ޒުވާން އިމާމުން ތަމްރީން ކުރުމުގެ މަސައްކަތާއި މިހާރު ތިބި އިމާމުން ތަމްރީން ކުރުމުގެ މަސައްކަތް ކޮށްފައިވެއެވެ.

އެގޮތުން 818 އިމާމަކު 2024 ވަނަ އަހަރުގެ ތެރޭގައި ވަނީ ތަމްރީންކޮށްފައެވެ. އަދި ރާއްޖެއިން ބޭރުން 100 އިމާމުން ތަމްރީނުކުރިއެވެ.

އިސްލާމީ މަރުކަޒުތަކާއި މިސްކިތްތައް އަދި ވަޤުފު އިމާރާތްތައް

މިދާއިރާގެ އުމްރާނީ މަސައްކަތްތަކަށް ބަލާއިރު ހުއްޓިފައި ހުރި މަޝްރޫއުތައް ކުރިއަށް ގެންދިޔުމަށް ކުންފުނިތަކަށް ފައިސާ ދައްކައި އަލުން މަޝްރޫޢުތައް ފަށާފައިވެއެވެ. އެގޮތުން 2 އިސްލާމީ މަރުކަޒެއް ތަރައްޤީ ކުރުމުގެ މަސައްކަތްތަކާއެކު 28 މަޝްރޫޢޫއެއް މިހާރުވެސް ކުރިއަށް އެބަގެންދެއެވެ.

މީގެ އިތުރުން ވަޤުފު އިމާރާތްތައް އިތުރުކުރުމުގެ މަސައްކަތްތައްވެސް ވަނީ ފަށާފައެވެ. އެގޮތުން މާލެއާއި ހުޅުމާލޭގައި 2 ވަޤުފު އިމާރާތް ތަރައްޤީކުރުމަށް ވަނީ ނިންމާފައެވެ. އަދި އަތޮޅުތެރޭގައިވެސް މި މަޝްރޫޢު މިހާރު ވަނީ އިފްތިތާޙްކޮށްފައެވެ.

އިސްލާމީ ހޭލުންތެރިކަން އިތުރުކުރުމަށް ޤައުމީ ފެންވަރުގައި ކުރައްވާ މަސައްކަތްތަކަށް ބަލާއިރު ރިސާލާތު ޕްރޮގްރާމްގެ ނަމުގައި ޚާއްސަ މަސައްކަތްތަކެއް ވަނީ ފަށްޓަވާފައެވެ.

މި ވޭތުވެދިޔަ އަހަރަކީ ޤައުމު ބިނާ ކުރުމަށްޓަކައި ކުރާ މަސައްކަތްތަކުގައި ދީނީ ހޭލުންތެރިކަމުގެ ދާއިރާއިން ގިނަ މަސައްކަތްތަކެއްކުރި އަހަރެކެވެ. ޚާއްސަކޮށް ތަރައްޤީގެ މަޝްރޫޢުތަކުގެ އިތުރުން ރާއްޖޭގައި ދީނީ ޝިއާރު ފާޅުކުރުމާއި ދީނީ ހޭލުންތެރިކަން އިތުރުކުރުމަށް މީގެކުރިން ނުކުރާހާ ގިނަ މުހިންމު މަސައްކަތްތަކެއް 2024 ވަނަ އަހަރު ކުރިއެވެ.