ޗުއްޓީއާ ދިމާކޮށް މޯލްޑިވިއަންގެ ދަތުރުތައް އިތުރުކޮށްފި

ޗުއްޓީއާއި ދިމާކޮށް މޯލްޑިވިއަނުން ރާއްޖޭގެ އެކި ކަންކޮޅުތަކަށް ކުރާ ދަތުރުތައް އިތުރުކޮށްފިއެވެ.

އެކުންފުނިން ވަނީ އެ އެއަރލައިނުން މިހާރު ކުރިއަށްގެންދާ ޝެޑިއުލް ދަތުރުތައް ކުރިއަށް އޮތް 5 ދުވަހަށް އިތުރުކުރުމަށް ނިންމާފައިވާކަން ހާމަކޮށްފައެވެ. އަދި 5 ދުވަހުގެ ދަތުރު ޝެޑިއުލް ވަނީ އާންމުކޮށްފައެވެ. މޯލްޑިވިއަނުން ވަނީ ރާއްޖޭގެ އެތެރޭގެ 10 މަންޒިލަކަށް ކުރާ ދަތުރުތައް އިތުރުކޮށްފައެވެ.

ޗުއްޓީގެ އިތުރުން އީދު ބަންދުތަކާ ދިމާކޮށްވެސް ޤައުމީ އެއަރލައިން، މޯލްޑިވިއަންއިން ރާއްޖޭގެ އެކި ކަންކޮޅުތަކަށް ކުރާ ދަތުރުތައް އިތުރުކުރެއެވެ.

އެފަދަ ބަންދުތަކާ ދިމާކޮށް މޯލްޑިވިއަންގެ ދަތުރުތައް އިތުރުކުރަނީ ބަންދުތަކާ ދިމާކޮށް ޗުއްޓީ ހޭދަކުރަން ރަށްތަކަށްދާ މީހުން އިތުރުވެ، ދަތުރުތަކަށް ޑިމާންޑު ބޮޑުވުމާއި ގުޅިގެންނެވެ.

ޗުއްޓީ ދުވަސްވަރާ ދިމާކޮށް މޯލްޑިވިއަނުން މިހާތަނަށް އިތުރުކުރީ މިމަހުގެ 16 އަދި 20 މި ދެދުވަހުގެ އެތެރޭގެ ބައެއް ދަތުރުތަކެވެ. މީގެއިތުރުންވެސް ޑިމާންޑާއި އެެއްގޮތަށް ދަތުރުތައް އިއުލާން ކުރައްވާނެ ކަމަށް މޯލްޑިވިއަން އިން ވިދާޅުވެއެވެ.

ދަތުރުތައް އިތުރުކުރި މަންޒިލްތައް

• * 16 ވަނަ ދުވަހު - ގަން، ފުވައްމުލައް، ހޯރަފުށި
• * 17 ވަނަ ދުވަހު - ފުވައްމުލައް، ކުޅުދުއްފުށި، ކައްދޫ، ފުނަދޫ
• * 18 ވަނަ ދުވަހު - ހޯރަފުށި، ގަން، ކައްދޫ، ފަރެސްމާތޮޑާ
• * 19 ވަނަ ދުވަހު - ފުވައްމުލައް، ގަން، ދަރަވަންދޫ، ހަނިމާދޫ،
• * 20 ވަނަ ދުވަހު - ފުނަދޫ، މާވަރުލު

Book your tickets now! Additional flights available for upcoming holidays.🌟✈️https://t.co/WbKxMejivi pic.twitter.com/TT6t0sI74T

— MaldivianAero (@MaldivianAero) December 15, 2024

ޗުއްޓީއާއި ދިމާކޮށް މޯލްޑިވިއަނުން ދަތުރުތައް އިތުރުކޮށްފައިވާއިރު، މޯލްޑިވިއަން އިން ވަނީ މި ދުވަސްތަކަށް ޓިކެޓް ނެގުމަށް ހުޅުވާލާފައެވެ.

ރާއްޖޭގެ ސަރަހައްދީ ގިނަ އެއާޕޯޓުތަކަށް ދަތުރު ކުރާ މޯލްޑިވިއަންއިން ކޮންމެ ޗުއްޓީއަކާއި ދިމާކޮށް އަދި ޕީކް ސީޒަނާއި ދިމާކޮށް އެތެރޭގެ އުދުހުންތައް އިތުރުކުރެއެވެ.