ކުރިއަށް އޮތް އަހަރުތަކުގައި ބަޙްރައިނާ ރާއްޖޭގެ ގުޅުން އިތުރު ހަރުފަތްތަކަކަށް ގެންދެވޭނެ: ރައީސް

ދިވެހިރާއްޖެއާއި ބަޙްރައިނާ ދެމެދުގެ ގުޅުން ކުރިއަށް އޮތް އަހަރުތަކުގައި އިތުރު ހަރުފަތްތަކަކަށް ގެންދެވޭނެ ކަމުގެ ޔަގީންކަން އެބައޮތް ކަމަށް ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ބަޙްރައިންގެ ޤައުމީ ދުވަހުގެ ތަހުނިޔާ ވިދާޅުވެ އެ ޤައުމުގެ ރަސްގެފާނު ހަމަދު ބިން އީސާ އަލް ޚަލީފާ އާއި ވަލީއަހުދު އަދި ބޮޑުވަޒީރު ސަލްމާން ބިން ޙަމަދު އަލް ޚަލީފާއަށް ފޮނުއްވެވި ސިޓީފުޅެއްގައެވެ. އެ ސިޓީފުޅުގައި ރައީސް ވަނީ ދެ ބޭފުޅުންނަށާއި ބަޙްރައިންގެ ރައްޔިތުންނަށް ސަރުކާރާއި ދިވެހި ރައްޔިތުންގެ ފަރާތުން ޤައުމީ ދުވަހުގެ ތަހުނިޔާ ވިދާޅުވެފައެވެ.

ރައީސުލްޖުމްހޫރިއްޔާ ފޮނުއްވެވި ސިޓީފުޅުގައި ވަނީ ދެ ޤައުމުގެ އެކުވެރި ގުޅުން ކުރިއަށް އޮތް އަހަރުތަކުގައި އިތުރު ހަރުފަތްތަކަށް ގެންދެވޭނެ ކަމުގެ ޔަގީންކަން އެބައޮތް ކަމަށް ވިދާޅުވެފައެވެ.

މީގެ އިތުރުން ބަޙްރައިންގެ ރަސްގެފާނާއި ވަލީއަހުދަށް ދުޅަހެޔޮ ސިއްޙަތަކަށް އެދިވަޑައިގަންނަވާ ކަމަށާއި ބަހުރެއިނާއި އެ ޤައުމުގެ ރައްޔިތުންނަށް އުފާ ފާގަތި ދުވަސްތަކަކަށް އެދިވަޑައިގަންނަވާ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ބަހުރެއިންގެ ޤައުމީ ދުވަސް ފާހަގަކުރަނީ ކޮންމެ އަހަރެއްގެވެސް ޑިސެމްބަރު މަހުގެ 16ވަނަ ދުވަހުއެވެ.

ރާއްޖެއާއި ބަހުރެއިނާ ދެމެދު ސިޔާސީ ގުޅުން ގާއިމްކޮށްފައިވަނީ 24 މާޗު 1980ގައެވެ.