ފާއިތުވި ގަރުނެއްގެ ތެރޭގައި އުފެދުނު އެންމެ ބާރުގަދަ ތޫފާން، ފަރަންސޭސިވިލާތުގެ ދަށުގައި އޮންނަ އިންޑިޔާ ކަނޑުގެ ޖަޒީރާ ސަރަޙައްދެއް ކަމަށްވާ މަޔޮޓަށް އަރައި އެތައް ހާސް ބަޔަކު މަރުވެފައިވާ ކަމުގެ ފުރުޞަތު ބޮޑުކަމަށް، ފަރަންސޭސިވިލާތުގެ ސަރުކާރުން ބުނެފިއެވެ.
"އަޅުގަނޑަށް ހީވަނީ ހަމަ ޔަގީނުންވެސް [މަރުވި މީހުން] އެތައް ސަތޭކަ ބަޔަކު ނޫނީ ފަހަރެއްގައި ހާހަކަށް، ނޫނީ އެ އަދަދު އެތައް ހާހަށް އެރުމުގެ ފުރުޞަތު އެބައޮތް، ބަޔަކު ވެސް ވާސިލްވެދާނެހެން،" ފަރަންސޭސިވިލާތުގެ ސަރުކާރުން ބުނެފައިވެއެވެ.
ތޫފާން ޗީޑޯގައި މަރުވި މީހުންގެ ޢަދަދާ ބެހޭ ގޮތުން ސުވާލު ކުރުމުން ފަރަންސޭސިވިލާތުގެ ދާޚިލީ ވުޒާރާއިން ބުނީ މަރުވި މީހުންގެ ސީދާ އަދަދު ހޯދޭނެ ގޮތެއް އަދި ނެތް ކަމަށެވެ.
ގަޑިއަކު 200 ކިލޯމީޓަރަށް ވުރެ ބާރުމިނުގެ ވަޔާ އެކު، ތޫފާން ޗިޑޯ މަޔޮޓަށް އަރައި، ގެތަކާއި ސަރުކާރުގެ އިމާރާތްތަކާއި ހޮސްޕިޓަލްތަކަށް ވެސް ބޮޑެތި ގެއްލުންތައް ލިބިފައިވާ ކަމަށް ސަރުކާރުން ވަނީ ބުނެފައެވެ. މިއީ ފާއިތުވި 90 ވަރަކަށް އަހަރުގެ ތެރޭގައި، އެ ޖަޒީރާ ރަށްތަކަށް އައި އެންމެ ބާރުގަދަ ތޫފާން ކަމަށް މޫސުމާބެހޭ އިދާރާއިން ބުންޏެވެ.
ވައިގެ މަގުން ނަގާފައިވާ ފޮޓޯތަކާއި ވީޑިޔޯތަކުން ފެންނަ ގޮތުގައި، ކައިރީގައި އޮންނަ ކޮމޮރޯސް އިން ޤަވާއިދާ ޚިލާފަށް މީހުން ހިޖުރަކޮށް، ދިރިއުޅުން ބިނާކޮށްފައިވާ، މަޔޮޓްގައި އަޅާފައިވާ އެތައް ސަތޭކަ ވަގުތީ ގެތަކެއް ވަނީ މުޅީން ސުންނާފަތިވެފައެވެ.
މަޔޮޓުގެ ހޮސްޕިޓަލުގެ އެތެރޭގައި ވެސް ފެންބޮޑުވެ، އިމާރަތްތަކުގެ މައްޗަށް ރުއްގަސްތައް ވެއްޓި ބޮޑެތި ގެއްލުންތައް ލިބިފައިވާ ކަން ލޯކަލް މީޑިޔާތަކުން ޢާންމުކޮށްފައިވާ ފޮޓޯތަކުން ވެސް ފެނެއެވެ.
ފާއިތުވި 10 ވަރަކަށް އަހަރުގެ ތެރޭގައި، އިރުމަތީ އެފްރިކާގެ އައްސޭރިފަށުގައި އޮންނަ ކޮމޮރޯސުން އެތައް ހާސް ބަޔަކު ވަނީ، ރަނގަޅު ދިރިއުޅުމެއް ހޯދުމަށް މަޔޯޓްއަށް ހިޖުރަކޮށްފައެވެ.
ފަރަންސޭސިވިލާތުގެ ދާޚިލީ ވުޒާރާއިން ލަފާކުރާ ގޮތުގައި، ކޮމޮރޮސްސަށް ނިސްބަތްވާ 100،000އަށް ވުރެ ގިނަ މީހުން ވަނީ މަޔޮޓްގައި ޤަވާއިދާ ޚިލާފަށް ވަޒަންވެރިވެފައެވެ.