ރާއްޖޭގައި އިސްލާމިކް ޑިޖިޓަލް އެސެޓް ސެންޓަރެއް ޤާއިމްކުރުމަށް ދިރާސާއެއް ހަދަނީ

ރާއްޖޭގައި އިސްލާމިކް ޑިޖިޓަލް އެސެޓް ސެންޓަރެއް ޤާއިމުކުރުމަށް ދިރާސާއެއް ހެދުމަށް މޯލްޑިވްސް މަނިޓަރީ އޮތޯރިޓީއިން، އެމްއެމްއޭއިން ނިންމައިފިއެވެ.

މަރުކަޒީ ބޭންކުން ވިދާޅުވީ، ޑިޖިޓަލް އެސެޓްތަކާއި އިސްލާމިކް ފައިނޭންސަށް ޤައުމުތަކުގެ މެދުގައި ޝައުގުވެރިކަން އިތުރުވަމުންދާއިރު، މިދާއިރާއިން ރާއްޖެއަަށް ކުރިއެރުންތައް ގެނެސް، ސަރަހައްދީ ހަބަކަށް ހެދުމަކީ އަމާޒެއްކަމަށެވެ.

އެގޮތުން މި ސެންޓަރު ޤާޢިމްކުރުމުގެ މަޤްޞަދުތަކުގެތެރޭގައި އިސްލާމީ ޝަރީޢާ އާއި އެއްގޮތް ހައްލުތައް ގެނެސް މާލީ ބައިވެރިވުން އިތުރުކުރުން ހިމެނެއެވެ. އަދި ބޭރުގެ އިންވެސްޓަރުންގެ ޝައުޤުވެރިކަން ސަރަހައްދީގޮތުންނާއި ތަންފީޒީ ގޮތުން އިތުރުކުރުމަކީވެސް އެމްއެމްއޭގެ އަމާޒެކެވެ. މީގެއިތުރުން އިސްލާމީ ފިންޓެކް ދާއިރާ ކުރިއެރުވުމަކީވެސް މިފަދަ ސެންޓަރެއް ޤާއިމުކުރުމަށް އެމްއެމްއޭގެ މަޤްޞަދަކެވެ.

އިސްލާމިކް ޑިޖިޓަލް އެސެޓް ސެންޓަރެއް ރާއްޖޭގައި ޤާއިމުކުރުމުގެ މަސައްކަތް ކުރަމުންދާއިރު، އިސްލާމީ ޝަރީއާގެ ހަމަތަކުގެ ތެރެއިން ބޭނުން ކުރާ ޑިޖިޓަލް އެސެޓްތަކަށް ދުނިޔޭގެ ޤައުމުތަކުގައި ލިބެމުންދާ މަޤުބޫލުކަން ދަނީ އިތުރުވަމުންނެވެ. އެގޮތުން ޝަރީޢާ ހަމަތަކަށް ފެތޭ ކްރިޕްޓޯ ކަރަންސީއާއި، ހަލާލް އެންއެފްޓީއާއި، ވަޤްފް ޓޮކެން އަދި ޑިޖިޓަލް ސުކޫކްތަކަކީ މިހާރުވެސް ބައެއް ޤައުމުތަކުގައި ބޭނުން ކުރާ ޑިޖިޓަލް އެސެޓުގެ ބާވަތްތަކެވެ.

މި ސެންޓަރު ޤާޢިިމުކުރުމަށް ބޭނުންވާ ދިރާސާއެއް ހަދައިދޭނެ ފަރާތެއް ހޯދުމަށް މަރުކަޒީ ބޭންކުން މިހާރު ހުޅުވާލާފައިވާއިރު، އަންނަ ހަފްތާގެ އަންގާރަ ދުވަހުގެ ދިރާސާގެ މައުލޫމާތު ސާފުކުރަން ޖެހެއެވެ. އަދި މި ދިރާސާގެ އަންދާސީ ހިސާބު ޑިސެންބަރު 29 ވާ އާދީއްތަ ދުވަހުގެ 11:00 ކުރިން ހުށަހެޅުމަށް އެ އިދާރާއިން ވަނީ ހުޅުވާލާފައެވެ.

މިދިޔަ އޮކްޓޯބަރ މަހު އެމްއެމްއޭއިން ވަނީ ރާއްޖެއަށް ޑިޖިޓަލް ފައިސާ ތަޢާރަފް ކުރުމުގެ މަސައްކަތް ކުރަމުންދާކަން ހާމަކޮށްފައެވެ. އެގޮތުން ފުރުސަތު ދޭނީ އެސެޓް ބޭކްޑް ނުވަތަ ރުފިޔާ ބެކްކޮށް ތަޢާރަފްކުރާ އޮންލައިން ފައިސާއަށް ކަމަށް އެމްއެމްއޭއިން ވިދާޅުވެއެވެ. އަދި މިއާއި ގުޅޭ ޖޮއިންޓު ރެގިއުލޭޓަރީ ފްރޭމްވޯކެއް ކެޕިޓަލް މަރކެޓު ޑިވެލޮޕްމަންޓު، ސީއެމްޑީއޭއާއި ގުޅިގެން އެކުލަވާލުމުގެ މަސައްކަތް ކުރަމުންދާ ކަމަށް އެމްއެމްއޭއިން ވަނީ ވިދާޅުވެފައެވެ.

ރާއްޖެއަށް ޑިޖިޓަލް އެސެޓްތައް ތަޢާރަފްކުރުމުގެ މަސައްކަތް ކުރަމުންދާއިރު، ރާއްޖެއަކީ މާލީ ހަބަކަށް ހެދުމަކީ ސަރުކާރުގެ އަމާޒެކެވެ. އަދި 2030 ވަނަ އަހަރާ ހަމައަށް، ރާއްޖޭގެ ޖީޑީޕީގެ 15 އިންސައްތަ ޑިޖިޓަލް ދާއިރާ ހިއްސާ ކުރާ ގޮތަށް ހެދުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތަޞައްވުރެކެވެ.