ރާއްޖެ އަބަދުވެސް ދެމިއޮންނާނީ މެހެމާނުންނަށް އަމާން ރާއްކާތެރި މަންޒިލެއްގެ ގޮތުގައި: ފަތުރުވެރިކަމާ ބޭހޭ ވުޒާރާ

ރާއްޖެ އަބަދުވެސް ދެމިއޮންނާނީ މި ޤައުމަށް ޒިޔާރާތްކުރާ އެންމެންނަށްވެސް އަމާން ރާއްކާތެރި މަންޒިލެއްގެ ގޮތުގައި ކަމަށް ފަތުވެރިކަމާއި ބެހޭ ވުޒާރާއިން ވިދާޅުވެއްޖެއެވެ. ފަތުރުވެރިކަމާއި ބެހޭ ވުޒާރާއިން މިހެން ވިދާޅުވެފައިވަނީ އެ ވުޒާރާގެ ސްޓޭޓް މިނިސްޓަރ މުޙައްމަދު ނިހާދު ސަސްޕެންޑް ކުރިކަން ހާމަކުރައްވައި އޭނާގެ ވާހަކަތަކަކީ ސަރުކާރުގެ ސްޓޭންޑް ނޫންކަން ހާމަކުރުމުގެ ގޮތުން ރުނު ނޫސްބަޔާނުގައެވެ.

ފަތުރުވެރިކަމާއި ބެހޭ ވުޒާރާއިން ނެރުނު ނޫސްބަޔާނުގައި ވިދާޅުވީ، އެ ވުޒާރާގެ ސްޓޭޓް މިނިސްޓަރ މުޙައްމަދު ނިހާދު ދެއްކެވި ވާހަކަތަކަކީ ސަރުކާރުގެ ރަސްމީ ބަހެއް ނޫން ކަމަށެވެ. އަދި އޭނާގެ މަޤާމުން ސަސްޕެންޑްކުރެވިފައިވާކަން ފަތުރުވެރިކަމާއި ބެހޭ ވުޒާރާއިން ފާހަގަކުރެއްވިއެވެ.

ފަތުރުވެރިކަމާއި ބެހޭ ވުޒާރާއިން ވަނީ ޒިޔާރަތްކުރާ މެހެމާނުންގެ ސަލާމަތާއި ރައްކާތެރިކަން ކަށަވަރުކުރާނެ މަންޒިލެއްގެ ގޮތުގައި ރާއްޖެ ދެމިއޮންނާނެ ކަމުގެ ޔަޤީންކަން ދެއްވާފައެވެ. އެގޮތުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުގައި ރާއްޖެއަކީ ފަތުރުވެރިންނަށް އަމާން އަދި މަޤުބޫލު މަންޒިލެއްގެ ގޮތުގައި ބޭއްވުމަށް ގިނަ މަސައްކަތްތައް ކުރެވިފައިވާ ކަމަށް ފަތުރުވެރިކަމާއި ބެހޭ ވުޒާރާއިން ވިދާޅުވިއެވެ.

އެގޮތުން ރައީސުލްޖުމްހޫރިއްޔާގެ ތަޞައްވުރާއި އެއްގޮތަށް ރާއްޖެއަކީ ފަތުރުވެރިންނަށް ހިތްގައިމު މަންޒިލެއްގެ އިތުރުން އަމާންކަމާއި ރައްކާތެރިކަން ކަށަވަރުކޮށްދޭ ތަނަކަށް ހެދުމަށް މިސިނާޢަތުގެ ހުރިހާ ފަރާތްތަކާއި ގުޅިގެން މަސައްކަތް ކުރަމުންދާކަމަށާއި، ކޮންމެ ފަތުރުވެރިއަކަށްވެސް ފުރިހަމަ މެހެމާންދާއިއެއް ދިނުމަށް މަސައްކަތް ކުރަމުންދާކަން އެވުޒާރާއިން ފާހަގަކުރެއެވެ.

ރާއްޖެއަށް ދެމިލިޔަން ފަތުރުވެރިން ގެންނަން ސަރުކާރުން ހިފާފައިވާ އަމާޒު ހާސިލްވުމާއި ގާތަށް ދެވިފައިވާއިރު، މިއަހަރުގެ މިހާތަނަށް ގިނަ ކާމިޔާބީތަކެއް ހާސިލްކުރެވިފައިވާކަން ފަތުރުވެރިކަމާއި ބެހޭ ވުޒާރާއިން ފާހަގަކުރެއެވެ. އެގޮތުން މިހާތަނަށް އެއްދުވަހު ތެރޭ އެންމެ ގިނަ ފަތުރުވެރިން އައިސްފައިވަނީ މިއަހަރުގެ ފެބްރުއަރީ މަހުގެ 10 ވަނަ ދުވަހު ކަމަށް އެ ވުޒާރާއިން ވިދާޅުވެއެވެ. އެދުވަހު ރާއްޖެއަށް 10،213 ފަތުރުވެރިން ޒިޔާރަތްކޮށްފައިވެއެވެ. އަދި ހަމަ އެމަހަކީ އެންމެ ގިނަ ފަތުރުވެރިން އެއް މަހެއްގެ ތެރޭ އެންމެ ގިނަ ފަތުރުވެރިން ރާއްޖެ ޒިޔާރަތްކުރި މަސްކަން ފަތުވެރިކަމާއި ބެހޭ ވުޒާރާއިން ވިދާޅުވެއެވެ. މިއަހަރު ފެބްރުއަރީ މަހު 217،392 ފަތުރުވެރިން ރާއްޖެ ޒިޔާރަތްކޮށްފައިވާ ކަމަށް އެވުޒާރާއިން ވިދާޅުވެއެވެ.

އަދި މިކާމިޔާބީތަކުން ދައްކުވައިދެނީ އެތައް މިލިޔަން ފަތުރުވެރިން މެދުގައި ރާއްޖެއަށް އޮންނަ އިތުބާރު ކަމަށް އެ ވުޒާރާއިން ވިދާޅުވިއެވެ.