އެންމެ ހިންގުންތެރި ކައުންސިލުގެ އެވޯޑް ޖެހިޖެހިގެން 4 ފަހަރު ލިބުމާއެކު ބޮޑުފޮޅުދޫއަށް ބޮޑު ފަޚުރެއް
-
ބޮޑުފޮޅުދޫ ކައުންސިލުން އަންނަނީ 2020 ވަނަ އަހަރުން ފެށިގެން މި އެވޯޑް ދިފާޢުކުރަމުން
-
ކައުންސިލުގެ މަސައްކަތްތައް ރަށުގެ މުއައްސަސާތަކާއި ރައްޔިތުން ބަލައިގަނޭ
ރާއްޖޭގެ އެންމެ ހިންގުންތެރި ރަށު ކައުންސިލްގެ އެވޯޑު މިއަހަރު ކާމިޔާބުކުރި އަރިއަތޮޅު އުތުރުބުރި ބޮޑުފޮޅުދޫ ކައުންސިލަކީ ނަމޫނާ މަސައްކަތްތަކެއް ކުރަމުން އަންނަ ކައުންސިލެކެވެ. މިއީ ބޮޑުފޮޅުދޫ ކައުންސިލުން މި އެވޯޑް ވިދިވިދިގެން ކާމިޔާބުކުރި 4 ވަނަ ފަހަރެވެ.
އެ ކައުންސިލަށް މި އެވޯޑު ލިބިފައިވަނީ 2023 ވަނަ އަހަރުގެ ކަންގަތި އެވޯޑު ހަފްލާގައެވެ. މި އެވޯޑަކީ ލޯކަލް ކައުންސިލް ޕާރފޯމަންސް އިންޑެކްސްއިން އެންމެ މަތީ ވަނަތައް ހާސިލްކުރާ ކައުންސިލްތަކަށް، ލޯކަލް ގަވަރމަންޓް 2015 ވަނަ އަހަރުން ފެށިގެން ދެމުން އަންނަ އެވޯޑެކެވެ.
ކަންގަތި އެވޯޑަކީ އަތޮޅު ކައުންސިލްތަކާއި ރަށު ކައުންސިލްތަކުގެ ތެރެއިން ކޮންމެ އަހަރަކުވެސް އެންމެ ހިންގުންތެރި ކައުންސިލްތަކުގެ އަގުވަޒަންކުރުމުގެ ގޮތުން ލޯކަލް ގަވަރމަންޓް އޮތޯރިޓީން ދެމުން އަންނަ އެވޯޑެކެވެ. ލޯކަލް ކައުންސިލްތަކުގެ ޕަފޯމަންސް އިންޑެކްސް ބިނާވަނީ ކައުންސިލްތަކުން އެލްޖީއޭއަށް ހުށަހަޅާ ކިތާބީ ހެކިތަކަށެވެ.
ބޮޑުފޮޅުދޫ ކައުންސިލުން ހާޞިލުކުރި މި ކާމިޔާބީ އެރަށުގެ ރައްޔިތުން ބަލައިގަންނަނީ ރަށަށް ލިބުނު ބޮޑު ފަޚުރަކާއި ޝަރަފެއްގެ ގޮތުގައެވެ. މިއަހަރުގެ އެވޯޑާއެކު ކައުންސިލުގެ ރައީސާއި މެންބަރުން ރަށަށް ވަޑައިގަތުމުން، އެރަށުގެ ރައްޔިތުން ވަނީ ހޫނު މަރުޙަބާއެއް ކިޔާފައެވެ. ރަށުގެ ބަނދަރު ސަރަޙައްދުގައި އެކަމަށްޓަކާ ބޭއްވި ރަސްމިއްޔާތުގައި ރަށުގެ ކުދިބޮޑު އެންމެންހެން ވަނީ ބައިވެރިވެފައެވެ.
މި ރަސްމިއްޔާތުގައި ވާހަކަދައްކަވަމުން ބޮޑުފޮޅުދޫ ކައުންސިލްގެ ރައީސް ޝުޖާޢު އާދަމް ވިދާޅުވީ، މިއީ ހަމައެކަނި ކައުންސިލަށް ލިބުނު ކާމިޔާބީއެއް ނޫންކަމަށެވެ.
މިކަމުގައި ކައުންސިލް މެންބަރުންނާއި މުވައްޒަފުންގެ އިތުރުން، ރަށުގައި ހަރަކާތްތެރިވާ މުއައްސަސާތަކާއި، ޖަމްޢިއްޔާތަކާއި، ރައްޔިތުންގެ ބައިވެރިވުމާއި ޝާމިލުވުންވެސް ބޮޑުކަމަށް ޝުޖާޢު ވިދާޅުވިއެވެ. އަދި މިއީ މުޅި ރަށަށް ލިބުނު ބޮޑު ފަޚުރަކާއި ރީތިނަމެއްގެ ގޮތުގައި ކައުންސިލްގެ ރައީސް ފާހަގަކުރެއްވިއެވެ.
ޝުޖާޢު ވިދާޅުވީ، އެ ރަށު ކައުންސިލާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި މުވައްޒަފުންގެ އެންމެ ބޮޑު އަމާޒަކީ އަހަރީ ޕްލޭންގައިވާ ކަންކަން އެގޮތުގައި ތަންފީޒުކުރުމާއި ރައްޔިތުންނާއި ގާތުން ޚިދުމަތްދީ ރައްޔިތުންގެ ފުރިހަމަ އިތުބާރު އޮތް އިދާރާއަކަށް ހެދުން ކަމަށެވެ.
"އަޅުގަނޑުމެން ބޭނުންވަނީ އޯގާތެރި މުޖުތަމަޢުއެއް ބިނާކުރަން. ހުރިހާވެސް އަމާޒެއް ހުރީ ރައްޔިތުންނަށް ޚިދުމަތްދިނުމަށް. ރައްޔިތުން ބަލައިގަންނަ، ރައްޔިތުން އެދޭގޮތަށް ޚިދުމަތްތައް ފޯރުކޮށްދޭން." ކައުންސިލުގެ ރައީސް ވިދާޅުވިއެވެ.
ބޮޑުފޮޅުދޫ ކައުންސިލުގެ ރައީސް ޝުޖާޢު ވިދާޅުވީ، މި ލިބުނު ކާމިޔާބީން ރަމްޒުކޮށްދެނީ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީއާއި، ރަށުގެ މުއައްސަސާތަކާއި މަދަނީ ޖަމްޢިއްޔާތަކުގެ މެދުގައި އޮތް ބަދަހިގުޅުންކަމުގައެވެ. އަދި އެރަށަކީ ރަށުގެ ތަރައްޤީއާއި ގުޅުން ހުރި ކަންކަމުގައި ސިޔާސީ ފިކުރު އެއްފަރާތްކޮށް އެކުގައި މަސައްކަތް ކުރާ އެއްބައިވަންތަ ބައެއްގެ ގޮތުގައި ތިބުމަށް އިސްކަންދޭ ރައްޔިތުންތަކެއް ދިރިއުޅޭ ރަށެއްކަމަށް ޝުޖާޢު ވިދާޅުވިއެވެ.
އެންމެ ހިންގުންތެރި ކައުންސިލްގެ އެވޯޑު އަރިއަތޮޅު އުތުރުބުރީ ބޮޑުފޮޅުދޫ ކައުންސިލުން ހާސިލުކުރި މިއީ 4 ވަނަ ފަހަރެވެ. އެ ކައުންސިލުން އަންނަނީ 2020 ވަނަ އަހަރުން ފެށިގެން މި އެވޯޑު ހާސިލުކުރަމުންނެވެ.
ބޮޑުފޮޅުދޫ ކައުންސިލާއި، ރައްޔިތުންގެވެސް އަމާޒު ހުރީ ރަށަށް ލިބިފައިވާ މި ރީތިނަން އެގޮތުގައި ދަމަހައްޓާ، މި އެވޯޑް ދިފާޢުކުރުމަށެވެ.