އިނގިރޭސި ޕްރިމިއަރ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީން މި ސީޒަނުގައި ނެރެމުންދާ ދަށް ނަތީޖާތަކުގެ ޒިންމާ ހުރިހާ އެންމެން ނަގަންޖެހޭނެ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފިއެވެ.
ޕްރިމިއާ ލީގުގައި އެންމެ ފަހުން ކުޅުނު އަށް މެޗުގެ ތެރެއިން އެންމެ މެޗަކުން ސިޓީ މޮޅުވެފައިވާއިރު ގާޑިއޯލާ ބުނެފައިވަނީ އެކަމުގެ ޒިންމާ އާލިން ހާލަންޑް އެކަނި ނަގަން ނުޖެހޭނެ ކަމަށާއި އެ ޒިންމާ ހުރިހާ ކުޅުންތެރިން އެއްވަރަކަށް ނަގަންޖެހޭނެ ކަމަށެވެ.
ޕްރިމިއާ ލީގުގެ ހަތްވަނައިގައި މިވަގުތު މެންޗެސްޓަރ ސިޓީ އޮތްއިރު ތާވަލުގެ އެއްވަނައިގައި އޮތް ލިވަޕޫލް އާއި ދެމެދު 12 ޕޮއިންޓުގެ ފަރަގެއް އެބައޮތެވެ.
ލީގުގެ ފުރަތަމަ ފަސް މެޗުގައި ހާލަންޑް 10 ގޯލު ޖަހާފައިވީ ނަމަވެސް އެންމެ ފަހުން ކުޅުނު އަށް މެޗުގައި އޭނާއަށް ޖެހިފައިވަނީ 2 ލަނޑެވެ. އަދި އެއީ އޭނާ އެކަނި ނަގަން ޖެހޭ ޒިންމާއެއް ނޫން ކަމަށާއި ލަނޑުތައް ނުޖެހެނީ މުޅި ޓީމުގެ ކުޅުމާއި ގުޅުން ގޯސްވުމުގެ ސަބަބުން ކަމަށް ގާޑިއޯލާ ވަނީ ބުނެފަ އެވެ.
ޕްރިމިއާ ލީގުގައި ތިބި އެންމެ މޮޅު ކޯޗުންގެ ތެރޭގައި ހިމެނޭ ގަޑިއޯލާގެ މުޅި ކޯޗިން ހަޔާތުގައި މިހާ ދަށް ނަތީޖާތަކަކާއި އޭނާ ކުރިމަތިލާން ޖެހިފައެއް ނުވެއެވެ. އަދި މިއީ އޭނާއަށް މުޅިން އައު ތަޖުރިބާއެކެވެ.
ޕްރިމިއާ ލީގުގައި މާދަމާ އެވަޓަން އާއި ދެކޮޅަށް މެންޗެސްޓަރ ސިޓީ ނިކުންނައިރު އެ ޓީމަށް ވަނީ އަނިޔާގެ މައްސަލަތަކާއި ކުރިމަތިލާން ޖެހިފަ އެވެ. ލީގުގެ 15 ވަނައިގައި އެވަޓަން އޮތް ނަމަވެސް މި ސީޒަނުގައި އެ ޓީމުގެ ޑިފެންސްލައިން ފެންނަނީ ވަރަށް ވަރުގަދަ ކޮށެވެ. އެހެންކަމުން މި މެޗަކީ އަނެއްކާވެސް ސިޓީ އަށް ކުރިމަތިވެފައިވާ ބޮޑު އިމްތިހާނެކެވެ.
އެވަޓަން އިން ވަނީ ލީގުގައި އެންމެ ފަހުން ކުޅުނު ހަ މެޗުގެ ތެރެއިން ފަސް މެޗުގައި ބައިކޮޅަށް ލަނޑެއް ވަނަނުދީ ހިފަހައްޓާފަ އެވެ.