ތުއްތުއިރުން ފެށިގެން ކުއްޖާގެ ޞިއްޙަތާބެހޭ ހުރިހާ މަޢުލޫމާތެއް ލިބޭނެ ޕޯޓަލެއް ތައާރަފުކޮށްފި

ތުއްތުއިރުން ފެށިގެން ކުއްޖާގެ ސިއްޙަތާއި ގުޅުންހުރި ހުރިހާ މައުލޫމާތެއް އެއްތަނަކުން ލިބޭގޮތަށް "މޯލްޑިވްސް އިންޓަގްރޭޓެޑް ހެލްތު އިންފޮރމޭޝަން ސިސްޓަމް" މިހިސް، ޕަބްލިކް ޕޯޓަލް އިފްތިތާހުކުރައްވައިފިއެވެ.

ސިއްޙީ ވުޒާރާ އާއި ދުނިޔޭގެ ސިއްޙަތު ޖަމިއްޔާ، ޑަބްލިއުއެޗްއޯ ގުޅިގެން ތަރައްޤީކޮށްފައިވާ މި ޕޯޓަލް އިފްތިތާހުކޮށްދެއްވީ ސިއްޙީ ވަޒީރު އަބްދުﷲ ނާޒިމެވެ.

"މޯލްޑިވްސް އިންޓަގްރޭޓެޑް ހެލްތު އިންފޮރމޭޝަން ސިސްޓަމް"، މިހިސްއަކީ ރާއްޖޭގެ ސިއްޙީ ދާއިރާގެ މައުލޫމާތު އެއްކުރުމަށް ބޭނުންކުރަމުންދާ ސިސްޓަމްތަކުގައި ހިމެނޭ ހުރިހާ މައުލޫމާތެއް އެއްތަނަކުން ފޯރުކޮށްދިނުމަށް ކުރިއަށްގެންދާ މަޝްރޫއެކެވެ.

މިހިސް ޕަބްލިކް ޕޯޓަލުން އަންނަމަހުގެ އެއްވަނަ ދުވަހުން ފެށިގެން އުފަންވާ ކޮންމެ ކުއްޖެއްގެ ވެކްސިން މައުލޫމާާތާއި ދެވޭ ވިޓަމިން އޭ އަދި ފަނިބޭހުގެ މައުލޫމާތުގެ އިތުރުން ހެދިބޮޑުވުމުގެ ޗާޓުގެ މައުލޫމާތު ލިބެން ހުންނާނެއެވެ.

މި ޕޯޓަލްގެ ޒަރިއްޔާއިން ބެލެނިވެރިންނަށް ކުއްޖާ ހެދިބޮޑުވަމުންދާ މިންވަރު މޮނިޓަރކުރެވޭނެއެވެ. އަދި ކުއްޖާއަށް ވެކްސިން ޖަހަންޖެހޭ ދުވަސް ކައިރިވުމުން ސިސްޓަމް މެދުވެރިކޮށް ބެލެނިވެރިޔާއަށް އެސްއެމްއެސްގެ ޒަރިއްޔާއިން ނޮޓިފިކޭޝަން ފޮނުވޭގޮތްވެސް ޕޯޓަލުގައިވެއެވެ.

ސިއްޙީ ވަޒީރު ޢަބްދުﷲ ނާޒިމް ވިދާޅުވީ ރާއްޖެ އުފެދިފައި އޮންނަގޮތުން ކުދި އާބާދީތަކަށް ފޯރުކޮށްދޭ ސިއްޙީ ޚިދުމަތުގެ ފެންވަރު ރަނގަޅުކުރުމަށް މިއީ އެޅިގެންދިޔަ މުހިންމު ފިޔަވަޅެއް ކަމަށެވެ. އަދި ރާއްޖޭގެ ސިއްޙީ ދާއިރާގެ ޕްލޭން ނުވަތަ ހެލްތު އާކިޓެކްޗަރ ބްލޫ ޕްރިންޓް އެކުލަވައިލުމުގެ މަސައްކަތް ކުރަމުންދާ ކަމަށާއި އެ ޕްލޭން އަންނަ އަހަރުގެ މެދުތެރޭގައި ތަންފީޒު ކުރެވޭނެ ކަމަށްވެސް ވަޒީރު ވިދާޅުވިއެވެ.

"މި ބްލޫ ޕްރިންޓް އެކުލަވާލައި ތަންފީޒު ކުރެވެންފެށުމުން ކޮންމެ ރައްޔިތަކަށް އެ ރައްޔިތެއްގެ މުހިންމު ސިއްޙީ މައުލޫމާތުތަކަށް އެންމެ ތުއްތު އިރުން ފެށިގެން ރައްކާތެރިގޮތަކަށް ފަސޭހައިން އެކްސެސް ލިބޭނެ މަގުފަހިވެގެންދާނެ. ނަތީޖާއަކަށް ވެގެންދާނީ ކޮންމެ ރައްޔިތަކަށްވެސް އެ ރައްޔިތެއްގެ އަމިއްލަ ސިއްޙީ މައުލޫމާތުތަކަށާއި ބަލީގެ ހުރި އިތުރު ހިރާސްތަކަށް ރިއާޔަތްކޮށް ބަލި ޖެހުމުގެ ކުރިން އެބަލިތަކުން ރައްކާތެރިވުމަށް އަޅަންޖެހޭ ފިޔަވަޅުތައް އަޅައި ބަލި ޖެހިއްޖެ ހާލަތެއްގައިވެސް އަމިއްލަ ސިއްޙި ހާލަތު ގާތުން ބަލައި ލިބެންޖެހޭ ފަރުވާތައް ހޯދުމަށް އަމިއްލައަށް ބާރުވެރިވެގެންދިއުން،" ވަޒީރު ވިދާޅުވިއެވެ.

ޑަބްލިއުއެޗްއޯގެ ރާއްޖޭގެ އޮފީސް ހިންގުމާ ހަވާލުވެވަޑައިގެން ހުންނެވި ޑރ. ޕަދްމަލް ޑިސިލްވާ ވިދާޅުވީ މިހިސްގެ ޕަބްލިކް ޕޯޓަލްގެ ސަބަބުން ރައްޔިތުންނަށް އަމިއްލަ ސިއްޙަތާ ގުޅޭ މައުލޫމާތު ލިބި، އަމިއްލަ ސިއްޙީ ހާލަތު ރަނގަޅު ކުރުމަށް ބާރު ލިބިގެންދާނެ ކަމަށެވެ. އަދި ސިއްޙީ ދާއިރާއިން ރާއްޖޭގައި މިގޮތަށް ކުރިއަށްގެންދާ މުހިންމު ކަންކަމުގައި ކުރިއަށް އޮތްތަނުގައިވެސް އެ ޖަމުއިއްޔާގެ އެއްބާރުލުން ލިބިގެންދާނެ ކަމަށްވެސް ޑރ. ޕަދްމަލް ޑިސިލްވާ ވިދާޅުވިއެވެ.

ސިއްޙީ ވުޒާރާއިން ވަނީ މިހިސް ޕަބްލިކް ޕޯޓަލް އިތުރަށް ތަރައްގީ ކުރުމަށް ނިންމަވާފައެވެ. އެގޮތުން، ކުރިއަށް އޮތްތަނުގައި މި ޕޯޓަލްގެ ޒަރިއްޔާއިން މާބަނޑު މީހުންގެ ސިއްޙީ މައުލޫމާތާއި ކޮންމެ ރައްޔިތެއްގެ ސިއްޙީ މައުލޫމާތު ރައްކާކުރެވޭނެ އިންތިޒާމް ހަމަޖެހިގެންދާނެކަމަށް އެ ވުޒާރާއިން ވިދާޅުވެއެވެ. އަދި ޕްރައިމަރީ ހެލްތު ކެއަރ ނިޒާމުގެ ތެރެއިން އެއްކުރެވޭ މައުލޫމާތުތައްވެސް މި ޕޯޓަލުން ކުރިއަށް އޮތްތަނުގައި ލިބިގެންދާނެކަމަށް ސިއްޙީ ވުޒާރާއިން ވިދާޅުވެއެވެ.