ބިންވެރިޔާ ސްކީމް މައްސަލައިގައި ދައުވާ ކުރަން މަޝްވަރާކުރަނީ ކުރީގެ ސަރުކާރުގެ 4 މީހެއްގެ މައްޗަށް

ބިންވެރިޔާ އަދި ގެދޮރުވެރިޔާ ސްކީމްގެ މައްސަލާގައި ކުރީ ސަރުކާރުގެ 4 މީހަކަށް ދައުވާކުރުމާމެދު ގޮތެއްނިންމުމަށް ޑިއުޓީ ޕްރޮސިކިއުޝަން މަރުހަލާ ފަށައިފިއެވެ.

އޭސީސީން ވިދާޅުވީ އެކޮމިޝަނުން ތަހުޤީގުކުރައްވަމުން ގެންދަވާ ގެދޮރުވެރިޔާ ސްކީމްގެ ދަށުން ފްލެޓް ދޫކުރުމުގެ މައްސަލާގައި ހިމެނޭ ފަރާތްތަކުގެ މައްޗަށް ދައުވާކޮށްދިނުމާމެދު ގޮތެއް ނިންމެވުމަށް ޕްރޮސެކިއުޓަރ ޖެނެރަލްގެ އޮފީހާއެކު ޑިއުޓީ ޕްރޮސެކިއުޝަން ފަށާފައިވާކަމަށެވެ. އަދި ޑިއުޓީ ޕްރޮސެކިއުޝަންގެ މަސައްކަތް ނިންމައި، ދައުވާކުރެވޭނެ ފަރާތްތަކުގެ މައްޗަށް ދައުވާކޮށްދިނުމަށް ކުރަންޖެހޭ މަސައްކަތްތައް އެ ކޮމިޝަނުން ވީ އެންމެ އަވަހަށް ކުރަމުންގެންދާނެ ކަމަށްވެސް އޭސީސީން ވިދާޅުވިއެވެ.

މިކަމުގައި ދައުވާކުރުމާ މެދު ޕީޖީއާއެކު އޭސީސީން މަޝްވަރާ ކުރައްވަމުން ގެންދަވަނީ ބިންވެރިޔާ ސްކީމާއި ގުޅޭގޮތުން ފެންމަތިވެގެން އުޅޭ ކޮރަޕްޝަންގެ މައްސަލައާ ގުޅިގެން ކޯޓު އަމުރެއްގެ ދަށުން ޕާސްޕޯޓު ހިފަހައްޓާފައިވާ ކުރީގެ ސަރުކާރުގައި ހައުސިންގ މިނިސްޓްރީގައި އިސްކޮށް ތިއްބެވި 4 އޮފިޝަލެއްގެ މައްސަލާގައެވެ.

އެއީ ކުރީގެ ސްޓޭޓް މިނިސްޓަރ އަކްރަމް ކަމާލުއްދީނާއި ސީނިއަރ އެކްޒެކެޓިވް ޑިރެކްޓަރު މުޙައްމަދު އާރިފު އާއި ސީނިއަރ އެގްޒެކެޓިވް ޑިރެކްޓަރު ލިރުގާމް ވަހީދު އަދި ޑިރެކްޓަރ ޖެނެރަލް އަހުމަދު ވިޝާން ނަސީމެވެ.

މި މައްސަލައިގައި އަކްރަމް ކަމާލުއްދީނާއި އާރިފުއާއި ލިރުގާމް އަދި ވިޝާންގެ ޕާސްޕޯޓް ހިފަހައްޓާފައިވަނީ އޭސީސީން މިހާރު ކުރިއަށްގެންދާ ތަހުގީގާ ގުޅިގެން އެ ކޮމިޝަނުން އެދިގެން ކްރިމިނަލް ކޯޓުންނެވެ.

ގެދޮރުވެރިޔާ ސްކީމްގެ ދަށުން ފްލެޓް ދޫކުރުމުގެ މައްސަލާގައި ދައުވާކުރުމާމެދު ގޮތެއް ނިންމަވަމުންދާއިރު، އެ ސްކީމްގެ ދަށުން ބިން ދޫކުރުމުގައި ކޮރަޕްޝަންގެ އަމަލުތަކެއް ފެންމަތިވެގެން އެ މައްސަލަ ކަމާބެހޭ އިދާރާތަކުން ގެންދަވަނީ ތަހުޤީގުކޮށް، ފިޔަވަޅު އަޅުއްވަމުންނެވެ. މި މައްސަލައަކީ ރައްޔިތުންގެ މަސްލަހަތު ހިމެނޭ ބޮޑު މައްސަލައަކަށްވާތީ ވީހާވެސް އަވަހަށް ތަހުގީގު ނިންމައި، ދައުވާ ކުރަންޖެހޭނަމަ ދައުވާކުރަން ފޮނުވުމަށް ޕްރޮސެކިއުޓަރ ޖެނެރަލްވެސް ވަނީ ދިވެހި ފުލުހުންގެ ޚިދުމަތާއި އޭސީސީއަށް އަމުރުކުރައްވާފައެވެ.