ނިމިގެންދިޔަ ނައިންޓީ ޕްލަސް ގޯލްޑް ކަޕް 2024 ގެ ފައިނަލް މެޗުގައި އައްޑޫ ސިޓީ 2-0 ގެ ނަތީޖާއަކުން ބަލިކޮށް ފަޚުރުވެރި ޗެމްޕިއަންކަން ހޯދި ބ. އޭދަފުށީ ފުޓްބޯޅަ ޓީމު ޓްރޮފީއާއެކު ރަށަށް ދިޔުމުން ރަތްދޫލައިގެ ހޫނު މަރުހަބާއެއް ކިޔައިފިއެވެ.
ރަތުން މުޅި ރަށް ޖަރީކޮށްފައިވާ އޭދަފުއްޓަށް އިއްޔެ ހަވީރު ފުޓްބޯޅަ ޓީމު ދިއުމާއެކު މުޅި ބަނދަރު ސަރަހައްދު ފުރާލާފައިވަނީ މަރްހަބާކިއުމަށް ނިކުމެ ތިބި ރައްޔިތުންނެވެ. ރަތްދޫލައިގައި ކުޅުންތެރިން ރަށަށް ފައިބައިގެން ދިޔައިރު މާފަތި އެޅުވުމާއި، ތަހްނިޔާގެ މެސެޖްތައް ދިޔައީ އޮއްސަމުންނެވެ.
އޭދަފުށީ ޓީމު ރަށަށް ދިޔައީ ނައިންޓީ ޕްލަސް ގޯލްޑްކަޕް 2024 ގެ ތައްޓާއެކު މުޅި ރަށް ހެއްވާލަދިނުމަށެވެ. ރަށުން ކީ މަރްހަބާއަކީ ކުޅުންތެރިންނަށް ހަނދާނުން ފިލުވާނުލެވޭހާ ހޫނު މަރުހަބާއެކެވެ. ފަޅުތެރޭގައި ކުރުފަލި ޖެހުމުގެ ހަރަކާތެއްވެސް ޓީމުގެ ޝަރަފްގައި ބޭއްވިއެވެ.
ކުޅުންތެރިންނާއި ޓީމުގެ އޮފިޝަލުންނަށް ހާއްސަ ހަފްލާއެއް އެރަށު ފުޓްބޯޅަ ދަނޑުގައި ރޭގަނޑު ބާއްވާފައިވާއިރު ރަށުގެ ހެޔޮ އެދޭ ފަރާތްތަކުން ވަނީ ފުޓްބޯޅަ ޓީމަށް އެއް ލައްކަ ރުފިޔާގެ ޗެކެއްވެސް ހަވާލުކޮށްފައެވެ.
އަދި އޭދަފުށީގެ ވިޔަފާރިވެރިއެއްގެ ފަރާތުން ޓީމަށް ދޭ ހަދިޔާ ހަވާލުކުރުމާއި، ބޮޑު ކޭކެއް ފެށުމާއި، މަރްހަބާއާއި ޝުކުރު އަދާކުރުމުގެ ގޮތުން ނެށުމުގެ ހަރަކާތްތަކެއްވެސް ބޭއްވިއެވެ.
މިއީ މުޅި ރާއްޖެއަށް ހުޅުވާލައިގެން ބޭއްވި އެކި އެކި މުބާރާތްތަކުން އޭދަފުށި ކާމިޔާބު ހޯދާފައިވާ އަހަރަކަށްވާތީ ގޯލްޑްކަޕްގެ އިތުރުން މިއަހަރުގެ ގޯލްޑެން ފުޓްސަލް ކަޕްގެ ޗެމްޕިއަންކަން ލިބުމުގެ އުފާވެސް މުޅި ރަށުގައި ފާޅުކުރިއެވެ.
އޭދަފުއްޓަކީ ފުޓްބޯޅައިގެ ރަސްގެފާނުކަން ގޯލްޑް ކަޕުން ހާމަކޮށްދީފައިވާއިރު، އޭދަފުށިން ބުނަނީ އެއީ ރާއްޖޭގެ ބްރެޒިލް ކަމަށެވެ. އަދި ހޮނިހިރު ބަތްޕެން ޖަހާފައިވާ ބެނާތަކާއި، ބްރެޒިލް ދިދަ އުފާފާޅުކުރުންތަކުގައިވެސް އޭދަފުށީ ރައްޔިތުން ގެންގުޅުނެވެ.
އޭދަފުށީ ފުޓްބޯޅަ ޓީމުގެ ގިނަ ކުޅިންތެރިންނަކީ ރާއްޖޭގެ މަޝްހޫރު ކުލަބުތަކުގެ ފުރަތަމަ ޑިވިޝަނުގެ ތަޖްރިބާކާރު ކުޅުންތެރިންނެވެ. ޒަމާނުއްސުރެ އޭދަފުއްޓަކީ ފުޓްބޯޅައިގެ ރަށެވެ. މޮޅެތިފުޓްބޯޅަ ކުޅުންތެރިން އުފައްދާފައިވާ އޭދަފުއްޓަކީ ރާއްޖޭގައި ބޮޑު ފުޓްބޯޅައަށް ހާއްސަ ލޯތްބަކާއި އިސްކަމެއްދޭ ރަށެއްކަން ފާހަގަ ކުރެވެއެވެ.