އައު އަހަރު ފާހަގަކުރަން ޑްރޯން ޝޯއަކާއިއެކު ހަވާއަރުވަނީ

އައު އަހަރަށް މަރުހަބާ ކިޔުމަށް ހުޅުމާލޭގައި، ކުލަގަދަކޮށް ޚާއްސަ ހަރަކާތްތަކެއް ބާއްވަން ނިންމާފައިވާކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ވިދާޅުވެއްޖެއެވެ.

އެމްއެމްޕީއާރްސީން ވިދާޅުވީ އާ އަހަރު ފާހަގަކުރުމަށް މި މަހު 31ވަނަ ދުވަހުގެ ރެއާއި، ޖެނުއަރީ އެއްވަނަ ދުވަހު ވެސް ހަރަކާތްތައް ބާއްވަން ނިންމައިފައިވާ ކަމަށެވެ. މި ހަރަކާތްތައް އޮންނާނީ ހުޅުމާލޭ ސެންޓްރަލް ޕާކުގައެވެ.

އެގޮތުން 31ވަނަ ދުވަހުގެރޭ 20:00 އިން 00:00 ސެންޓްރަލް ޕާކުގައި ޑްރޯން ފެސްޓިވަލެއް ކުރިއަށް ގެންދިއުމަށް ހަމަޖެހިފައެވެ. މިފެސްޓިވަލުގައި ފަތުރުވެެރިއެއްގެ ދަތުރު ދައްކުވައިދޭ 15 މިނިޓުގެ ޚާއްސަ ޑްރޯން ޝޯއެއް ކުރިއަށްދާއިރު، އެރޭ 12 ޖަހާއިރު ހަވާއެރުވުންވެސް އެ ސަރަހައްދުގައި އޮންނާނެއެވެ.

އެމްއެމްޕީއާރުސީން ވިދާޅުވީ މިހަރަކާތްތަކުގެ އިތުރުން އާ އަހަރާ ދިމާކޮށް ފުޑް ފެސްޓިވަލެއް ވެސް އޮންނާނެކަމަށެވެ. ފުޑް ފެސްޓިވަލް އޮންނާނީ މި މަހުގެ 31 ވަނަ ދުވަހާއި ޖެނުއަރީ އެއްވަނަ ދުވަހެވެ.

ފަހަކަށް އައިސް ކޮންމެ އަހަރަކުވެސް އައު އަހަރަށް މަރުޚަބާ ކިޔުމުގެ ގޮތުން މާލޭ ސިޓީއާއި، ރާއްޖޭގެ އެކި ކަންކޮޅުތަކުގައި ދަނީ ކުލަގަދަ ހަރަކާތްތަކެއް ބާއްވަމުންނެވެ.