ޑްރޯންގެ އެހީގައި އަތުލައިގަތީ ލަންކާގެ ބޯޓެއް
-
ބޯޓުގައި 3 ފަޅުވެރިން ތިބި
-
ބޯޓު ވަނީ ފުލުހުންނާ ހަވާލުކޮށްފައި
ޑްރޯންގެ އެހީގައި ދެނެގަނެ، ރާއްޖޭގެ ސަރަހައްދުން އަތުލައިގަތީ ސްރީލަންކާއަށް ނިސްބަތްވާ މަސް ބޯޓެއް ކަމަށް އެމްއެންޑީއެފުން ވިދާޅުވެއްޖެއެވެ.
މިދިޔަ ބުރާސްފަތި ދުވަހު ރާއްޖެ ސަރަހައްދުުގައި ޤާނޫނާ ޚިލާފަށް ހަރަކާތްތެރިވަމުންދިޔަ ބޭރުގެ މަސް ބޯޓެއް އަތުލައިގަތީ ރާއްޖޭގެ ޚާއްޞަ އިޤްތިޞާދީ ސަރަހައްދު ބެލެހެއްޓުމަށް ހިންގި އޮޕަރޭޝަނެއްގައެވެ. އެ އޮޕަރޭޝަނުގައި މަސް ބޯޓު ހޯދާފައިވަނީ އެމްއެންޑީއެފް އެއަރ ކޯރގެ ޑްރޯންގެ އެހީގައިކަމަށް އެމްއެންޑީއެފުން ވިދާޅުވިއެވެ.
އެ ބޯޓު ހޯދުމަށްފަހު ކޯސްޓްގާޑްގެ ބެލުމުގެ ދަށަށް ގެނެސްފައިވާކަމަށްވެސް އެމްއެންޑީއެފުން އޭރު ވިދާޅުވިއެވެ.
އެމްއެންޑީއެފުން މިއަދު މީޑިއާތަކަށް މައުލޫމާތުދެއްވަމުން ވިދާޅުވީ، އެއީ ސްރީލަންކާއަށް ނިސްބަތްވާ އުޅަނދެއް ކަމަށާއި އެ އުޅަނދުގައި ތިން މީހުން ތިބިކަމަށެވެ. އެ އުޅަނދު މިހާރު ފުލުހުންނާ ހަވާލުކޮށްފައިވާކަމަށްވެސް އެމްއެންޑީއެފުން ވިދާޅުވިއެވެ.