އައު އަހަރަށް ޝުކުރުވެރި ހިތަކާއެކު ކުރިމަތިލުން މުހިންމު!

މިރެއަކީ މީލާދީ އަހަރެއް ނިމި އައު އަހަރަކާ އެންމެން ކުރިމަތިލާން ފަށާނެ ރެއެވެ. އައު ފެށުންތަކާއި އައު ވާހަކަތަކުގެރެއެވެ. މިރޭ ދުނިޔޭގެ އެކި ކަންކޮޅުތަކުގައި ކުލަގަދަކޮށް އައު އަހަރު 2025 ފާހަގަކުރާނެރެއެވެ.

އައު އަހަރާއެކު ސްކޫލު ޗުއްޓީއާއި ސަރުކާރު ބަންދު 4 ދުވަސް ލިބުމުން އެކަމުގެ ޖޯޝް ވަނީ ދެގުނައަށް އިތުރުވެފައެވެ. އެގޮތުން އެއްބަޔަކު ބޮޑު ޚަރަދުކޮށްފައި އާއިލާއާއެކު ރާއްޖެއިން ބޭރަށް ފުރަމުންދާއިރު އަނެއްބަޔަކު ތަފާތު ހަރަކާތްތަކާއެކު ޕާޓީތައް ބާއްވައެވެ. އެންމެ ދަށް ފަންތީގެ މީހުން ވެސް ކުޑަމިނުން އާއިލާއާއި ރަހުމަތްތެރިންނާއެކު ރެސްޓޯރެންޓަކުން ކެއުމަކަށް އިންސާފު ކުރެވޭތޯ މަސައްކަތް ކުރެއެވެ.

އައު އަހަރު ފާހަގަކުރަން ބޭނުންނަމަ އަތުން ޚަރަދުތަކެއް ނުކޮށްވެސް އެކަން ކުރެވިދާނެއެވެ. އައު އަހަރަށް އައު އަޒުމެއް ކަނޑައެޅުމާއި ފާއިތުވި އަހަރާމެދު ވިސްނައި ފިކުރުކޮށް ކުރިއަށް އޮތް އަހަރު ބައްޓަން ކުރާނެ ގޮތް ރާވާލުން މުހިންމެވެ. އާއިލާއާއި ގާތް ރަހުމަތްތެރިންނާއެކު ގޭގައި ކެއުމަކަށް އިންސާފު ކުރެވިދާނެއެވެ. ދުރުގައިވާ ގާތް ފަރާތްތަކަށް ގުޅައި ހާލު އަހުވާލު ބަލާލެވިދާނެއެވެ.

2025 ވަނަ އަހަރަކީ އުފާވެރި އަހަރަކަށް ހެދުމަށް ޝުކުރުވެރި ހިތަކުން ކަންކަން ދެކުން މުހިންމެވެ. އެކަމުގެ މަންފާތައް ގިނަ ގުނަވެފައި މަތިވެރިއެވެ. ޝުކުރުވެރިވުމުން ލިބޭ އުފާވެރިކަމުގެ އިޙްސާސްތަކުގެ އިތުރަށް އެހެން މަންފާތައް އެކަމުގައި ހިމެނެއެވެ. މިގޮތުން، ޝުކުރުވެރިވާ މީހުން އުއްމީދީ ހަރަކާތްތެރި މީހުންނަށްވެއެވެ. އަދި އެމީހުންގެ ކިބައިގައި ދީންވެރިކަމާއި ރޫޙާނީ ސިފަތައް ހުރެއެވެ. އެމީހުންނަކީ ފަސޭހައިން މީހުންނަށް އެހީތެރިވާ، އެހެންމީހުންގެ އިޙްސާސްތައް ދެނެގަނެވޭ މީހުންނަށްވެއެވެ.

މި ފެށުނު އަހަރު ތިމާގެ އަމިއްލަ ނަފްސަށާއި ޞިއްޙަތަށް އިސްކަންދީ، ހެލިފެލިވެ އުޅޭ އެކްޓިވް މީހަކަށްވުމަށް އަޒުމުކަނޑައެޅިދާނެއެވެ. ކަސްރަތަކީ ހަށިގަނޑަށް ނުހަނު ބޭނުން ކަމަކަށްވާއިރު ކޮންމެ ދުވަހަކުވެސް މަދުވެގެން 30 މިނެޓް ކަސްރަތު ކުރާ ބަޔަކަށްވުމަކީ އައު އަހަރަށް ކަނޑައެޅިދާނެ އަޒުމެކެވެ.

މި ފެށުނު އައު އަހަރުގެ ޢަޒުމެއްކަމުގައި ކޮންމެ މީހަކުމެ ކަނޑައަޅަންވީ، ކޮންމެ ކަމެއްގައިވެސް، ޞުލްޙަމަސަލަސްކަމާއި ހަމަޖެހުމާއި އެއްބައިވަންތަކަން އިސްކޮށް، ބައިބައިވުމާއި ދެބަސްވުމާއި ދެކޮޅުވެރިކަމަށް ނޫނެކޭ ބުނެ ޚިޔާލު ތަފާތުވުންތަކާ އެކުގައިވެސް، ޤައުމީ މަޞްލަޙަތަށް ބުރޫ އެރިޔަނުދީ މަސައްކަތް ކުރުމަށެވެ.