20 ރަށެއްގެ ފެނާއި ނަރުދަމާ ނިޒާމްގެ މަސައްކަތް ނިންމާލައިފި
-
5 ރަށުގެ ފެނުގެ ނިޒާމު ޤާއިމްކޮށްފައިވޭ
-
15 ރަށުގެ ފެނާއި ނަރުދަމާ ނިޒާމު ޤާއިމްކޮށްފައިވޭ
ޕީއެސްއައިޕީގެ ދަށުން އެމްޑަބްލިޔުއެސްސީން 20 ރަށެއްގައި ކުރިއަށްގެންދިޔަ ފެނާއި ނަރުދަމާ ނިޒާމް ޤާއިމްކުރުމުގެ މަސައްކަތް ނިންމާލައިފިއެވެ.
މީގެ ތެރޭގައި ހިމެނެނީ 5 ރަށުގެ ފެނުގެ ނިޒާމު ޤާއިމް ކުރުމާއި، އަދި 15 ރަށުގެ ފެނާއި ނަރުދަމާ ނިޒާމު ޤާއިމްކުރުމުގެ މަސައްކަތްކަމަށް އެމްޑަބްލިޔުއެސްސީން ވިދާޅުވެއެވެ.
އެމްޑަބްލިޔުއެސްސީން ފެނުގެ ނިޒާމު ޤާއިމްކޮށްފައިވާ ރަށްތަކަކީ، ހއ.މުރައިދޫ، ށ.ފީވައް، ނ.ހެނބަދޫ، ރ.އިންނަމާދޫ، އ.އ.މަތިވެރިއެވެ. އަދި ފެނާއި ނަރުދަމާ ނިޒާމު ޤާއިމްކޮށްފައިވާ ރަށްތަކަކީ، ހއ. ވަށަފަރު، ހއ.މާރަންދޫ، ހއ.ތަކަންދޫ، ހދ.ހިރިމަރަދޫ، ހދ.ކުމުންދޫ، ށ.ގޮއިދޫ، ނ.މާފަރު، ނ.ފޮއްދޫ، ރ.ފައިނު، ބ.ކަމަދޫ، ބ.މާޅޮސް، ޅ.އޮޅުވެލިފުށި، އދ. ކުނބުރުދޫ، އއ.ހިމަންދޫ، އއ.ފެރިދޫ އަދި އެންމެ ފަހުރަށް ކަމުގައިވާ ހއ.ވަށަފަރެވެ.
މިމަޝްރޫޢުތަކުގެ ދަށުން، ރަށްރަށުގައި ފެން ޕްލާންޓް ބަހައްޓާ ފެސިލިޓީ ބިލްޑިންގ އިމާރާތްކޮށް، ފެން އުފެއްދުމަށް ބޭނުންވާ ފެން ޕްލާންޓާއި އެހެނިހެން ވަސީލަތްތައް ޤާއިމްކޮށް، ފެން ރައްކާކުރުމަށް ތާންގި ބަހައްޓައި، ފެނާއި ނަރުދަމާ ހޮޅީގެ މައިނެޓްވޯރކް އަޅައި އަދި ގޭގެއަށް ފެނާއި ނަރުދަމާ ކަނެކްޝަން ވަނީ ގުޅައިދީފައެވެ. މީގެ އިތުރުން، ނަރުދަމާގެ ޕަންޕިންގ ސްޓޭޝަންތައް ޤާއިމްކޮށް، ސީ އައުޓް ފޯލް އާއި ރިޖެކްޓް ލައިންވެސް ވަނީ އަޅާފައެވެ. އަދި ހަމަ މިއާއި އެކު، ފެނާއި ނަރުދަމާ ނިޒާމު ބެލެހެއްޓުމަށް ބޭނުންވާ ސާމާނާއި އަދި ފެން ތަޙުލީލު ކުރުމަށް ބޭނުންވާ ސަމާނު މި މަޝްރޫޢުގެ ދަށުން ފޯރުކޮށްދެވިގެން ދާނެކަމަށް އެމްޑަބްލިޔުއެސްސީން ވިދާޅުވެއެވެ.
މި 20 ރަށުގެ ފެނާއި ނަރުދަމާ ނިޒާމު ޤާއިމްކުރުމުގެ މަޝްރޫޢުތަކަކީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމް.ޑަބްލިޔު.އެސް.ސީ އާއި ހަވާލުކުރައްވައިގެން ކުރިޔަށްގެންދިޔަ މަޝްރޫޢުތަކެކެވެ. އަދި މިމަޝްރޫޢުތަކަށް ސަރުކާރުން 1.34 ބިލިއަން ރުފިޔާ ޚަރަދުކުރައްވާފައިވާކަމަށްވެސް ސަރުކާރުން ވިދާޅުވެއެވެ.
ޕީއެސްއައިޕީގެ ދަށުން ކުރިއަށްގެންދިޔަ ހުރިހާ ރަށެއްގެ މަސައްކަތް މިއަހަރު ތެރޭގައި ނިންމާލުމުގެ އަމާޒަށް ވާސިލުވެވުނީ ވަރަށްގިނަ ބައެއްގެ ބުރަ މަސައްކަތުންކަން އެމްޑަބްލިޔުއެސީން ފާހަގަކުރައްވައެވެ. އަދި މިމަޝްރޫޢުތަކުގެ ސަބަބުން މި ރަށް ރަށުގެ ރައްޔިތުންނަށް ސާފު ބޯފެނާއި ރައްކާތެރި ނަރުދަމާ ނިޒާމެއް ލިބިގެންދާނެކަންވެސް އެ ކުންފުނިން ފާހަގަކުރައްވައެވެ.