ޑޮލަރު މާރުކުރުން ލާޒިމްކުރާ ބޭރުފައިސާގެ ޤާނޫނަށް ޢަމަލުކުރަން ފަށައިފި

ބޭންކުތަކަށް ޑޮލަރު މާރުކުރުން ނުވަތަ ޑޮލަރު ޖަމާ ކުރުން ލާޒިމްކުރާ ބޭރުފައިސާއާއި ބެހޭ ޤާނޫނަށް ޢަމަލުކުރަން ފަށައިފިއެވެ. މި ޤާނޫނުގެ ދަށުން ބޭރުފައިސާގެ އާމްދަނީ ލިބޭ ވިޔަފާރިތަކުން އެ ފަރާތްތަކަށް ލިބޭ އާމްދަނީ ބައެއް ބޭންކުތަކަށް މާރުކުރަން ޖެހެއެވެ.

އަލަށް ޢަމަލުކުރަން ފަށާ މި ޤާނޫނުގެ މަޤްޞަދަކީ، ދިވެހިރާއްޖޭގައި ބޭރު ފައިސާއިން ކުރެވޭނެ މުޢާމަލާތްތައް ކަނޑައަޅައި، ބޭރު ފައިސާ އެތެރެކޮށް ބޭނުންކުރުމާއި ގެންގުޅުމާއި އަދި ޖަމާކޮށް މާރުކުރުމާއި ގުޅޭ އުސޫލުތައް ކަނޑައަޅައި ހިންގުމަށް ބޭނުންވާ ޤާނޫނީ އޮނިގަނޑެއް ކަނޑައަޅައި އެކުލަވާލުމެވެ. މި ޤާނޫނުގެ ދަށުން އިސްތިސްނާވާ މުޢާމަލާތްތައް ފިޔަވައި އެހެން ހުރިހާ މުޢާމަލާތްތައް ކުރަން ޖެހޭނީ ދިވެހި ރުފިޔާއިން ކަމަށް ވަނީ ބަޔާންކޮށްފައެވެ.

މީގެއިތުރުން، ބޭރު ފައިސާއިން ލިބޭ އާމްދަނީ ނުވަތަ ރިއަލައިޒްޑް ސޭލްސް ޕްރޮސީޑްސް ލިބޭ، ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކާއި އަދި އެނޫންވެސް ވިޔަފާރިތަކަށް އަހަރެއްގެތެރޭގައި ފަނަރަ މިލިޔަން އެމެރިކާ ޑޮލަރު ލިބޭނަމަ ވަކި މުއްދަތުތަކެއްގައި އެމް.އެމް.އޭގައި ރަޖިސްޓްރީކުރަން ޖެހެއެވެ. އަދި އެފަރާތްތަކުން ވިއްކާ ނުވަތަ ފޯރުކޮށްދޭ މުދަލާއި ޚިދުމަތްތަކުން ލިބޭ ބޭރު ފައިސާގެ އާމްދަނީ، ރާއްޖޭގައި ހުޅުވާފައިވާ ބޭންކަކަށް ޖަމާކުރަން ވަނީ ކަނޑައަޅާފައެވެ.

މިއާއެކު ބޭރު ފައިސާގެ އާމްދަނީ ލިބޭ ފަރާތްތައް 3 ގިންތިއަކަށް ވަނީ ބަހާފައެވެ. މިގޮތުން އެ ފަރާތްތަކަށް ބޭރު ފައިސާއިން ލިބޭ އާމްދަނީން ބައެއް، ބޭންކަކަށް މާރުކުރަން ލާޒިމްކޮށްފައިވާއިރު، ބޭންކުން އެ ފައިސާގެ ވަކި އިންސައްތައެއް، އެމް.އެމް.އޭ އިން ކަނޑައަޅާ މުއްދަތެއްގެތެރޭގައި، ވިއްކަން ޖެހޭގޮތަށް އަލަށް ޢަމަލުކުރަން ފެށި ޤާނޫނުގައި ވަނީ ހިމަނާފައެވެ.

ކެޓަގަރީ - އޭ

ކެޓެގަރީ - އޭގައި ފަތުރުވެރިންނަށް ޚިދުމަތްދޭ ވިޔަފާރިތަކުގެ ތެރެއިން ދިވެހިރާއްޖޭގައި ހިންގާ ޓޫރިސްޓް ރިސޯޓުތަކާއި، އިންޓްގްރޭޓެޑް ޓޫރިސްޓް ރިސޯޓުތަކާއި، ޕްރައިވެޓް އައިލަންޑްތަކާއި، ރިސޯޓު ހޮޓާތަކާއި، އެނޫންވެސް އެފަދަ ތަންތަން ހިމެނެއެވެ. އެތަންތަނުން މިލާދީ މަހެއްގެ ތެރޭގައި އެ އެތަނަކަށް އަންނަ ކޮންމެ ފަތުރުވެރިއަކަށް ބޮލަކަށް 500 އެމެރިކާ ޑޮލަރުގެ މަގުން، އެ މަހެއްގެ ތެރޭގައި އައިސްފައިވާ ޖުމުލަ ފަތުރުވެރިންނަށް ޖެހޭ ޢަދަދު ބޭންކަށް މާރުކުރަން ނުވަތަ މީލާދީ މަހެއްގައި ތެރޭގައި އެތަނަކަށް ލިބޭ ބޭރު ފައިސާގެ އާމްދަނީގެ (ގްރޮސް ސޭލްސް) ގެ 20 އިންސައްތަ ބޭންކަށް މާރުކުރަން ޤާނޫނުން ލާޒިމްކުރެއެވެ. ވިޔަފާރިތަކަށް މި މިއިން ކޮންމެވެސް އެއްގޮތެއް އިޙްތިޔާރު ކުރެވިދާނެއެވެ.

ކެޓެގަރީ - ބީ

ކެޓެގަރީ - ބީ ޓޫރިޒަމް ހިމެނެނީ ފަތުރުވެރިންނަށް ޚިދުމަތްދޭ ތަންތަނުގެ ތެރެއިން ޓޫރިސްޓް އުޅަނދުތަކާއި، ޓޫރިސްޓު ހޮޓާތަކާއި، ޓޫރިސްޓް ގެސްޓްހައުސްތަކެވެ. އެތަންތަނުން މީލާދީ މަހެއްގެ ތެރޭގައި އެ އެތަނަކަށް އަންނަ ކޮންމެ ފަތުރުވެރިއަކަށް ބޮލަކަށް 25 އެމެރިކާ ޑޮލަރުގެ މަގުން، އެ މަހެއްގެ ތެރޭގައި އައިސްފައިވާ ޖުމުލަ ފަތުރުވެރިންނަށް ޖެހޭ ޢަދަދު، ނުވަތަ މީލާދީ މަހެއްގައި ތެރޭގައި އެތަނަކަށް ލިބޭ ބޭރު ފައިސާގެ އާމްދަނީގެ (ގްރޮސް ސޭލްސް) ގެ 20 އިންސައްތަ ބޭންކަށް މާރުކުރަން ޤާނޫނުން ލާޒިމް ކުރެއެވެ. މި ކެޓަގަރީ ހިމެނޭ ފަރާތްތަކަށްވެސް މިއިން ކޮންމެވެސް އެއްގޮތެއް ބޭރުފައިސާ މާރުކުރުމުގައި އިޙްތިޔާރު ކުރެވޭނެއެވެ.

މި ޤާނޫނުގެ ދަށުން ފަތުރުވެރިކަމުގެ ޚިދުމަތްދޭ ތަންތަނަށް އިތުރު ލުއިތަކެއް ވަނީ ދީފައެވެ. އެގޮތުން ކެޓަގަރީ އޭ އަދި ބީ ގައި ހިމެނޭ ވިޔަފާރިތަކަށް އަންނަ ފަތުރުވެރިންގެ ތެރެއިން، 24 ގަޑިއިރު އެތަނެއްގެ މަޑު ނުކުރާ ފަތުރުވެރިންނާއި 12 އަހަރު ނުފުރޭ ކުޑަކުދިންނަށާއި އަދި އެތަނެއްގައި ހިލޭ މަޑު ކުރާ ފަރާތްތަކަށް މާރުކުރަން ނުޖެހޭނެއެވެ.

ކެޓަގަރީ އޭ އަދި ބީ ގައި ނުހިމެނޭ ވިޔަފާރިތައް

ކެޓަގަރީ އޭ އަދި ބީ ގައި ނުހިމެނޭ ބޭރުފައިސާގެ އާމްދަނީ ލިބޭ ވިޔަފާރިތަކުން، ވިއްކާ ނުވަތަ ފޯރުކޮށްދޭ މުދަލާއި ޚިދުމަތްތަކަށް ފާއިތުވި މީލާދީ އަހަރުގެތެރޭގައި ބޭރު ފައިސާއިން މަދުވެގެން 15،000،000 އެމެރިކާ ޑޮލަރުގެ އާމްދަނީއެއް ލިބިފައިވާ ފަރާތްތަކުން، އެ ފަރާތްތަކުން ވިއްކާ ނުވަތަ ފޯރުކޮށްދޭ ޚިދުމަތަށް، މީލާދީ މަހެއްގެތެރޭގައި އެ ފަރާތަކަށް ލިބޭ ބޭރު ފައިސާގެ އާމްދަނީގެ 20 އިންސައްތަ، ބޭންކަށް މާރުކުރުމަށް ޤާނޫނުގައި ހިމަނާފައިވެއެވެ.

މި ޤާނޫނަށް ޢަމަލު ކުރަށް ފަށާފައިވާއިރު، ބޭރުފައިސާ މާރުކޮށް ޖަމާކުރަން ފަށާނީ، މި ޤާނޫނު އައުމުގެ ކުރިން އެމްއެމްއޭއިން މިކަމަށް ހާއްސަކޮށް ތައްޔާރުކޮށްފައިވާ ޤަވާއިދުގެ ދަށުން މިމަހުގެ 28 ވަނަ ދުވަހުއެވެ. އަދި ޤާނޫނު ޢަމަލުކުރަން ފެށުމާއެކު ޤާނޫނުގައި ކަނޑައެޅިފައިވާ ކަންކަމަށް ޢަމަލުނުކުރާ ފަރާތްތަކާއި މެދު ފިޔަވަޅު އެޅުމުގެ ބާރު ޤާނޫނު ތަންފީޒުކުރާ މަރުކަޒީ ބޭންކް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ލިބިގެންދެއެވެ.

ބޭރުފައިސާގެ ޤާނޫނަށް ޢަމަލުކުރަން ފަށާފައިވާއިރު، މިއީ ދިވެހިރާއްޖެއަށް ދިމާވެފައިވާ ޑޮލަރުގެ ދަތިކަމަށް ހައްލެއް ގެނައުމަށް ސަރުކާރާއި ކަމާއިބެހޭ އިދާރާތަކުން ތަޢާރަފްކޮށްފައިވާ ޤާނޫނެކެވެ. މިއާއެކު މި ޤާނޫނު ފުރިހަމައަށް ތަންފީޒުވާން ފެށުމުން ރައްޔިތުންނަށް ބޭނުންވާ ޑޮލަރު ބޭންކުތައް މެދުވެރުކޮށް ލިބުމަށް ފަސޭހަވެގެންދާނެ ކަމަށް ސަރުކާރުން ވިދާޅުވެއެވެ.